Sins Lâka 4 - DAWAN BÎLA AISKA

Yabal yamnikira bâk watauki kaia smalkanka nani

¹ Luhpi waitna nani, aisikam mai smalki ba wals, diara tânka alki latan kaikaia mata, aman wali bas.

² Yang bui man ra smalkanka pain kum maikri sa, baku bamna smalkanki ba kupiam lukras kapara.

³ Kan yang na sin luhpa waitna kum katna, yaptiki bui aihka painkira latwan ai kaiki kata,

⁴ bara papiki ba naku ai smalki kata: “Kupiam ra yarka bîli aisanki nani ba ulbi pain bris, yang dîa daukaia mai wimna ba dauki bas bara raya kama.

⁵ Sins lâka pliki bris, bara lâ wapni aisi daukanka ba sin; âmya tiwbiara, yang bîli aisinka nani ba.

⁶ Sins lâka ra latwan kaiks, baha ba lulki swipara; bara witin main mai kaikbia.

⁷ Diara sut purkara, sins lâka ba alki bri bas, bara lâ wapni aisi dauki ba sin.

⁸ Witin ra latwan kaiks, bara sin laih purara mai bukbia; kiaubi alks bara kulkanka lâka maikbia.

⁹ ¡Man ra kraun painkira kum prisant maikbia bara witin wal lamla ra sakahkaia!”

¹⁰ Luhpi, yang bîli aisanka ba bri man dukiam dauks, bara kau rayakam manka ba praki maikan kabia.

¹¹ Yang sins lâka yabalka bâk mai bri wamna; maikrika yabal pain bâk tauki kama.

¹² Man tauki kama ba ra, wapankam nani bilara trabil kumi sin âpu kabia; kan ba plapma bara minam ra lalahbra mita mai munka kauhma apia.

¹³ Diara mai smalkan yaba dutki alks, bara aihwakras lika kapara; aihwaki kaiki bris, baha ba man rayakam bamna.

¹⁴ Upla watawikira nani yabalka bilara aimakpara; ai daukanka saura nina blîkpara.

¹⁵ Ai yabalka bâk lui waia ba wina plaps; tnaya ra taws witin nani wina bara tâm kat impaki bas.

¹⁶ Witin nani saura daukras kaka, sip kupia kumi lâka ba briras sa; upla kum pan batakras kaka, witin nani sip yapan daukras sa.

¹⁷ ¡Witin ai pata bara ai diaika ba, saurka lâka bara tanis lâka ba!

¹⁸ Upla kasakkira nani yabalka bîla ba, yu wala ingnika baku sa: baha kau ban kanra ingwisa, yu aihwa ulan ba wal.

¹⁹ Sakuna upla watawikira nani yabalka ba lika tihmia tara ra sa; witin nani ai dahra walras, dîa mita ai mina prukisa sapa.

²⁰ Luhpi, bîli aisika nani na aman wals; diara nani aisisna sna ba kat kiamam tniki wals.

²¹ Ban pali yarka namkra nani wina tiwi wabiara; lukankam ra ulbi bris.

²² Witin yabisa rayaka bara wan wîna aihwa bri kaia lâka ya sut mita pliki sâkbia ba.

²³ Lukankam main kaiks diara sut purkara, kan witin sika rayaka kârma.

²⁴ Kunin aisaia lâka wina plaps; kunin lâka wina tnaya ra taws.

²⁵ Piu bani ra namkra ba kainam kat kaiki bas; piu bani ra tâm kat kaiki bas.

²⁶ Pain kaiks anira minam mangkisma ba, bara piu bani ra tasba karna ra baman taibi kama.

²⁷ Yabalkam ba wina aimawahkpara; minam ba saura wina laihura sâks.