Sins Lâka 31 - DAWAN BÎLA AISKA

Lemuel aisinka ba

¹ Lemuel, Masá tasbaya kingka, ai yaptika mita naha kupia kraukaia bîla nani witin ra smalkan ba, baha bîla nani ba witin aisin.

² Yang luhpi waitna, man biaira wina takram mâ ba, man dukiamra puri sunra Dawan walan ba, ¿yang kau dîa man ra mai wimna ki?

³ Mairin nani wal prawi karnikam ba bahki tikpara, kan mairin nani tâwan king nani sin ai karnika bahki ra tikisa.

⁴ Bara Lemuel, king nani wihki wihta tara nani sin wain diaia laya tahpla nani sin diaia aitani apia sa,

⁵ kan witin nani baha di ba mita lâ nani ba ai âuya tiwaia sip sa, bara bawikira uplika nani ra lâka wapnika daukaia ba sin aihka man lakbia.

⁶ Wain laya wih laya tahpla sin taiban uplika nani ra bara kupia kriwan nani ra yas dibia;

⁷ ¡bara witin nani baha di ba mita ai umpirka lâka, pât sin wahwi kan ba kli lukbia apia!

⁸ ¡Upla bîlas ba dukiara bîlam ni aisas; upla sut witin nani ra lulki swin ba tâwan aisas!

⁹ ¡Bîlam baikra buks, bara kasakka lâka ba dauks; umpira nani ba tâ baiks bara bawikira nani ba sin!

Mairin yamni lukanka bara daukanka nani sin

¹⁰ Yabal yamni wan mariki mairka kum pliki sakaia ba, karna sa; walpa klauhira mana tara bri nani ba wal sin, ¡mairin yamni ba kau mana tara sa!

¹¹ Ai maya waitna kupia ba, witin kat kasak luki tniwisa, waitnika ba sin umpira takbia apia.

¹² Mairin ba ai rayaka yua nani sut ra ai maya waitna ba ra âuyapah lâka baman yabisa.

¹³ Mairka ba sîp taya kwalka bara linin kwalka ba pliki auya, bara yu bani liliakira ni ai mihta warkka daukisa.

¹⁴ Slaup tara kum tasba kumi wina wala kat plun bri si atki tauki ba baku sa, baha mairka ba sin laih wina plun atki ai watla ra kwahki brih aula.

¹⁵ Titan pali kau puk ba ra witin pat buisa, bara ai luhpia nani ra, ai albika mairin nani ra sin titan pata dakakisa.

¹⁶ Tasba kum witin pain laki kaiki bara atki brisa, bara baha wina lalah pura sakuya ba wal, wain mâ nasla mangkisa.

¹⁷ Ai karnika ni ai prâka baku dimisa, bara ai kupia lukra brinka ba wal karna wark takisa.

¹⁸ Witin aihwaki kaikisa, diara nani suni atki ba sut pain auya sapa, bara tihmia aihwa kat sin kau ban wark takisa.

¹⁹ Witin ai mihta pali ni pitbaia kiwka nani purbi diara mamisa.

²⁰ Upla umpira ra bara diara luha uplika ra sin witin yu bani diara yabisa.

²¹ Kauhla pali iwi ba piua ra, witin baha dukiara sibrin lukras sa, kan ai watla bilara iwi uplika nani ba sut kwala twakni dimaia brisa bamna.

²² Witin krikri ra palkaia kwalka twakni ai mihta ni paskisa, bara kwala kau painkira ba ni ai prâka brih dimisa.

²³ Ai maya waitna ba sin tawan ra upla sut mita kakaira pali sa, bara baha tasbaya aiska uplika nani tilara tara pali kulkan sa.

²⁴ Mairka ba dimaia kwalka tara nani paskisa, wan maisa wila nani sin, bara diara wauhi âiatkra nani ra atkisa.

²⁵ Aitani kulkan lâka wihki karnika wal ba witin ai kwalka baku dimisa, bara yauhka yua diara briaia ba dukiara ai kupia wal aisaras.

²⁶ Diara tânka kaikaia lâka bîla nani aisisa, ai smalkanka ba sin latwan lâka bîla nani wal smalkisa.

²⁷ Witin ai watla bilara, diara sut mapara kau ai kanra wiaia ba dukiara aihwaki kaikisa, bara aima kumi sin plun mana luha piras sa.

²⁸ Ai luhpia nani, ai maya waitna ba sin witin ra mayuni wisa:

²⁹ “Mairin yamni nani ailal bâra sa, sakuna baha nani sut tilara man kau yamni sma.”

³⁰ Mawan painka ba bahki man sa, wan wîna tara prana ba sin lilka baman sa; sakuna Dawan ra yamni kulki mairka ra mayunaia ba aitani sa.

³¹ ¡Upla sut mawanra baha mairka ba mayuns! ¡Witin diara daukan ba dukiara, yamni kulkaia mayunra yas!