Sins Lâka 30 - DAWAN BÎLA AISKA

Agur aisinka nani ba

¹ Jaqué, Masá tawanka wina ba luhpia waitna nina Agur, witin dahra aisin bîla nani ba. Itiel ra bara Jucal ra sin aisi, win:

² Kasak, yang na kau sinskas sna upla wala nani sut ba wal, upla diara tânka alki ba sinska luha sna.

³ Sins lâka sin briras kapri, holikira tânka ba sin kakaira apia sna.

⁴ ¿Yamna kasbrika purara uli wan bara kli bal iwan? ¿Yamna pâsa nani ba ai mihta kruskan ra alki briaia sip ba? ¿Yamna kabu laya nani ba ai watlika ra alki mangkan? ¿Yamna tasba tnata lainka nani sut dutki bapan? ¡Yang ra ai wipara ai nina ba nu sma, bara kau pali ai luhpia nina ba!

⁵ Dawan ba kan kahbisa ya witin ra kasak luki ba, ai bîla aisinka ban ba kasak aihwa sa.

⁶ Witin aisin bîla nani ba pura prakpara, witin bui man ra lawi mai dauki, kupiam kraukbiara sîa, bara kuninkira baku mai kulkbia.

⁷ Dawan, diara wâl baman lika man wina briaia mamkabri; yang wina alki takaskpara, yang kau pruras sna ba ra aik:

⁸ bahki lâka wihki kunin aisi bîla ba wal yang wina laihura saki brih was, bara umpira kaia sapa, lalahkira kaia sapa, wâlsut aikpara; yang pati yu bani briaia praiska ba kat baman aik.

⁹ Kan yang brinki ba pura lui brimna kaka, bara mai kulkras naku mai wimna: “¿Dawan ba ya sa ki?” Apia kra diara luha kamna kaka, upla dukia alkamna bara alkamna ra; Dawanki, ninam sin lahtubi aisamnara sîa.

¹⁰ Alba ba saurka dahra kwahkpara ai dawanka ba mawanra, baku kaka ban kra man ra lamhtubi mai daukbia, bara saurka pâtka ba man mita twilkma.

¹¹ Tila upla bâra sa, ai papika ra ai bîla sawi ba, bara ai yaptika ra sin yamni pali wiras ba.

¹² Upla tila sin bâra sa, witin ai nakra nani ra witin ba sunu pali sa, ban sakuna witin nani ai tâskika wina sikbi sakras sa.

¹³ Upla tila sin bâra sa, bukisa witin ba uba tara pali sa, bara upla wala ba ai nakra ra bahki kaikisa.

¹⁴ Upla tila bâra sa, sord ba brisa ai napa watlika ra, bara skiru brisa ai napa rahia watlika ra baku kuntri uplika umpira nani ba sut âpu daukaia dukiara.

¹⁵ Riprapra ai luhpia mairin wâl bri ba, diara makabia baman lan takan sa. Diara yumhpa bâra sa bara walhwal kat sin ban pali sip ai âuyapah lâka briras:

¹⁶ pruan nani tasbaya ba, wan biarapara ba, tasba ba lâwan, bara pauta klauhan âuyapah apia ba.

¹⁷ Ya ai aisika bahki kaiki ba bara ai yaptika almuk takan ba lawaska kiki ba, aitani sa kuskuspiram mita nakra nani ba daiki sakaia, bara yakal nani mita pibia.

¹⁸ Diara aihkakira pali yumhpa bâra sa, tânka ba yang ra tihu pali sa; âu, walhwalka ba tânka sin yang sip briras:

¹⁹ Yakal tara yabalka ba kasbrika purara sa, piuta yabalka ba walpa tara purara sa, duri tara kum yabalka ba kabu lalma ra sa, bara waitna yabalka ba mairin tiara ra sa.

²⁰ Marit lâka sauhki mairka ba naku daukisa: witin plun pi si ai un dikisa bara wisa: “Yang diara watawi kumi sin daukras.”

²¹ Upla sât yumhpa bara walhwal kat bâra sa, sip wankan wan kupia alki takaskras bara kuntri kum ra yaban nikbisa:

²² alba ba king lâka ra auya piua ra upla taniskira kum kata ba, plun ai pura luan brisa,

²³ mairin lulki swin kata ba ai maya sakisa bara alba mairin kum kata ba ni ai dawanka mairin watlika ra aimakisa.

²⁴ Daiwan sirpi nani walhwal bâra sa tasba ra, kuna witin nani kau sinskira sa, sinskira nani ba wal:

²⁵ papu nani ba ailal sa, karnika âpu, sakuna lapta mani piua ra ai pata suni brisa;

²⁶ bangbang nani ba, dakni sirpi sa, sakuna walpa tara nani tilara iwisa;

²⁷ tristrisia nani ba ai kingka âpu sa, kuna ai adarka kat wapni impakisa;

²⁸ anansi man mihtam ni prak alkaia sip ba, bara king watla kat dimisa.

²⁹ Kupia karnira yumhpa bâra sa bara walhwal kat bâra sa sibrin luha kira wapisa:

³⁰ Layan tara ba, daiwan tara kau sibrinkira pali ba, daiwan wala nani sut mawan wina ai ninara tawras, mawan wina sin plapras;

³¹ kalila wainhka prautkira, guts wainhka ba, bara king ba sin, ai kwârika tara mawanra taki wapi ba witin nani mapara buaia upla âpu sa.

³² Man tanis lâka ra ban kra mahka mamyuni tit buram kaka, man kra diara saura munaia lukram kaka, mihtam ba bîlam ra alki takaski luki kaiks;

³³ bîp tialka laya batil ra mangki singma bara butar sâkma, upla kakma ra prukma kaka tala takbia, man upla wala ra kupia baikisma kaka, aiklabankam wal tnata alkma.