Sins Lâka 29 - DAWAN BÎLA AISKA

¹ Kli kli upla kupia kraukan ban ai lal karna dauki brukwi ba, tisku bâk krikan kabia, rakaika sin âpu kabia.

² Kasakkira nani pura aimaki ba ra, upla nani ba lilia takisa, sakuna upla watawikira kum wihta aimaki ba ra, upla nani ba pât wahwisa.

³ Luhpia waitna sinskira ba, aisika lilia sakisa; sakuna rug mairin nani wal tauki ba lika ai yuyaka tanis tikisa.

⁴ King lâ wapni aisi dauki ba mita, tasbaya ba buki bapisa; sakuna lal mana sakaia upla ra taibi makabi waitnika, ai tasbaya ba dringbisa.

⁵ Ya piu bani ai uplika mayuni ba, witin kainara mina alkaika kahbisa.

⁶ Watawikira nani mina alkaika ba, witin nani un saurka lâka ra sa; kuna upla kasakkira ba lika aiwani lilia kabia.

⁷ Upla kasakkira lika, umpira uplika nani lâ dimi ba dukiara uya lukisa, sakuna upla watawikira lika, ai kupia wiria sin lukras.

⁸ Lawaska kakikra nani, tawan aiska pauta ni mukisa, kuna sinskira nani lika, lawan tara ba kli lamni daukisa.

⁹ Sins bri waitnika ba taniskira wal unsabisa kaka, ai kupia baikbia, lawaska kiki lâka bribia bara diara kumi sin wapni daukbia apia.

¹⁰ Upla âikra nani bara saurakira nani mita upla wapnikira pruaia kat misbara kaikisa.

¹¹ Upla taniskira ai kupia laptika tara ba sut saki aisisa, sakuna sinskira ba baha alki takaski ai kupia daskisa.

¹² Wihta kum upla kuninkira kum bîla aman walbia kaka, ai dukia dadaukra nani sut ba upla watawikira man daukbia.

¹³ Upla taiban lâka ra bara wih tataibra waitnika ba wâlsut dukia bri ba, Dawan mita wâlsut ra nakra yaban.

¹⁴ King kumi kasak tânka kat upla umpira nani lâka aisi dauki ba, witin iwaika ba lika ban kaia ra dutki bapan kabia.

¹⁵ Klala wihki wan kupia kraukanka wal sins lâka wankisa, sakuna tuktan ban swin tauki ba ai yaptika swira daukbia.

¹⁶ Upla watawikira nani ailal taki ba ra, lâ sauhkanka lika manis takisa, sakuna kasakkira nani bui witin nani kauhanka ba kaikbia.

¹⁷ Luhpiam ba smalki paks, bara witin ris maikbia, witin bui man rayakam ra sin lilia painkira nani âuyapah maikbia.

¹⁸ Anira Dawan lâka wapni âpu ba ra, wapni lâka ba bâra âpu sa; ¡kuna lâ ba ban alki bri uplika ba yamni pali kabia!

¹⁹ Wan bîla nani aisin baman ba mita ni alba ba sip smalki wapni daukras sa, kan witin tânka brisa, sakuna bîla walras.

²⁰ Upla taniskira ba kau bîla kaikaia brisa wihki, waitna kum diara luki, kaikras ban inipis sturi aisi ba wal.

²¹ Ya ai albika ra tukta wina lihki diara pain nani sut yabi paki ba, tnata ra witin yu kum inaia kabia.

²² Lawan tara bri waitnika ba blahwan bukisa, bara kupia lapta uplika piua bani lâ manis sauhki unsabisa.

²³ Upla prautkira ai prautka mita witin ba tasba ra batakbia, kuna ai spiritka ra mâyara bawi uplika ba mayunra alkbia.

²⁴ Âimplikra wal tauki uplika lika, ai rayaka pali ra misbara kaikisa; kan lahtubanka bîla aisin ba walisa bara ai dahra sakras.

²⁵ Upla ra uya sibrin briaia ba wan mina alkaia kiwka wan mangkisa, sakuna Dawan ra luki tniwi uplika ba laih purara bukan kabia.

²⁶ Upla manis wihta mawanka plikisa ai lâka aisi daukaia, sakuna Dawan baman kasak lâka daukisa.

²⁷ Upla kasakkira nani nakra ra waitna watawikira ba saura pali sa, bara upla watawikira nakra ra yabal ra wapni tataukra ba saura pali sa.