Sins Lâka 28 - DAWAN BÎLA AISKA

¹ Watawikira ba plapisa upla ai nina blikras kabia sin, kuna kasakkira nani ba, layan baku sibrin luha bâra sa.

² Kuntri kum ra, lâ sauhkanka manis bal taki ba tâka wina sika, ai wihtka nani ailal bal takisa; sakuna pain tâ bri ba sip sa wapni lâka kat briaia.

³ Watawikira ba mita umpira nani ra taibi muni ba, lî karna auhi plun mangkan nani sut tiki ba baku sa.

⁴ Mahka lâ yamni swin uplika nani ba mita, upla watawikira nani ra mayunisa; kuna lâ ban brih dauki banhwi ba lika, baha nani ba mapara buisa.

⁵ Watawikira nani ba kasakka lâka tânka briras, sakuna Dawan ra plapi tauki nani ba sut tânka brisa.

⁶ Kanra yamni sa upla umpira ai lâka aihwa man tilara tauki ba, wihki upla lalahkira lukanka saura yabal warha bâk wapi tauki ba wal.

⁷ Ya Gâd lâka alki yamni brih uplika ba lika upla luhpia sinskira sa, sakuna bîla maihsira nani ai pânika bri ba lika, ai papika swira tara paskisa.

⁸ Ya ai yuyaka ailal dauki brisa kaka, lin muni pura praki diara bri ba mita, upla umpira nani ra yamni muni ba, uplika nani ra yaia kukisa.

⁹ Ya Gâd ra lâ walaia apia wisi ai kiama laki ba, Gâd sin witin ai pura sunra ba saura pali kulkan sa.

¹⁰ Ya upla wapnikira nani ra yabal saura brih auya, witin mita unta pakni salhkan ba ra kauhbia, sakuna aihwa man dauki uplika nani ba ai dukia diara yamni tara bribia.

¹¹ Lalahkira ai sinska ba tara pali brisa baku ai dahra walisa, sakuna upla umpira diara tânka bri ba witin dîa luki ba, pliki ban sakaia sip sa.

¹² Kasakkira nani pura luanka brisa ba ra lilia tara daukisa, sakuna upla watawikira nani pura luanka bri ba ra, upla nani mahka yukuwi banhwisa.

¹³ Ani uplika ai saurka nani pura biki ba, ai bisniska ba sip yamni takbia apia; sakuna baha nani ai dahra saki si mahka swi ba, saurka swih tikbia.

¹⁴ Yamni pali sa, Dawan sibrinka brih ban luki uplika ba, sakuna ai kupia karna dauki ba uplika lika trabil ra kauhi dimbia.

¹⁵ Layan ihbi ba, wingku tara sin plun wahwi ba, baku sa upla wihta watawikira kum, umpira uplika nani wihtka aimaki ba.

¹⁶ Wihta tara sinskas tânka sip luki briras ba, upla rausauhki taibaia lâka ba tara sakisa; sakuna gridi lâka âpu ba ai rayaka yua yari bribia.

¹⁷ Ya upla kum upla wala iki si plapi ba, plapi takaskbia apia witin sin raiti bilara aimakbia ba kat: ¡upla kumi sin baha takaskbiara!

¹⁸ Upla kasakkira swak takan lâka ra mangkan kabia, sakuna yabal warha ra tauki nani ba lika, trabil kum ra kauhbia.

¹⁹ Ai nasla warkka dauki uplika ba plun aitani bribia; sakuna ya upla sringwaskira nani nina bliki ba, umpira lâka ni banhwan kabia.

²⁰ Upla kasak aitani kulkanka bri ba mayunan kabia, sakuna ya lalahkira takaia aihni muni ba, pâtkas kulkan kabia apia sa.

²¹ Yamni apia sa upla ra mâyara kulkaia ba, plun yuya kum pali dukiara, upla ba saura daukaia sip sa.

²² Upla lalah lalihkra ba, yuyakira takaia aihni munisa, bara naika diara luha takaia ba lika ai dahra walras sa.

²³ Ya upla kupia krauki ba naika ra kupia yamni lâka kau kanra saki bribia ai twisa lalalni upla nina baman aisi ba wal.

²⁴ Upla âikra nani ai uplika bri ba sika ai papika ra impliki, ai yaptika ra sin impliki bara wisa, witin saura daukras.

²⁵ Gridikira uplika ba aiklaban bukisa, sakuna Dawan kat luki tniwi uplika mapara diara sut pain takbia.

²⁶ Tanis uplika ba lika witin ai kupia lukan pali kat luki tniwisa, sakuna sins lâka ra dauki watauki uplika lika swaki sakan kabia.

²⁷ Upla umpira ra diara yabi uplika ba, sip diara luha kabia apia; sakuna ai nakra praki tnaya ra laki uplika ba ra kasak lahtuban kabia.

²⁸ Upla watawikira nani pura lui buya ba ra, upla wala nani mahka yukuwisa; sakuna witin nani âpu taki tanis tiwi ba ra, kasakkira nani ba mita kli pura lubia.