Sins Lâka 27 - DAWAN BÎLA AISKA

¹ Yauhka ba dukiara mamyunpara; baha yua ra dîa takbia sapa man kaikras bamna.

² Yarka upla wala bui mamyunbia; yamni apia sa man silp mamyunisma ba.

³ Walpa lika wirha, kabu auhya wirhika sin tara sa; sakuna baha wâlsut ba wal kanra wirha sa upla taniskira kupia baiwanka ba.

⁴ Wan kupia laptika ba krakraka sa, lawan tara ba sin diara sauhki tikisa; sakuna diara tumaia lâka ba sip alki takaskras.

⁵ Param ra kupia kraukaia ba kanra yamni sa, yukuwi ra latwan kaikaia ba wal.

⁶ Kanra sip sa kasak lukaia wan uplika mita insauhki ba wihki wan waihla mita wan kiawali ba wal.

⁷ Biara banhwan uplika ba nasma damnira ba sin want apia wisa, kuna plun dauki uplika ba, diara tahpla ba sut damni kaikisa.

⁸ Tnawira luhpia ai watla wina taki laihura wih watauki ba, baku sa ya aisubi takan tasbaya wina laihura watauki ba.

⁹ Batana laya kîa yamni ba wal wan kupia lilia daukisa, baku sa wan uplika tawa muni wan smalki ba wan sulka lilia daukisa.

¹⁰ Man uplikam nani ba, man aisikam uplika nani ba sin lulki swipara. Muihkam watla ra wapara man pâtkam tara yua ra. Wan lamara pali iwi uplika ba, kanra yamni sa wan muihnika laihura iwi ba wal.

¹¹ Luhpi, sinskira bas, bara kupi lilia daukma, bara laihtubi uplika ra pana diara aisaia sip kamna.

¹² Aman kaiki uplika diara saura ba kaikisa, bara takaskisa, kuna dahra yamni walras nani ba, bâk luisa, bara pât ra tawisa.

¹³ Tringsar kum hilpka ra aibapaia takram uplika, prâka dimi ba daiki bris, bara tras kli aibapaia tukinka baku alki bri bas.

¹⁴ Ya ai bîla baikra tara ni ai uplika ra lakula wisa titan kau puk ba ra; baha ba lahtubanka baku witin ra kulkan kabia.

¹⁵ Mairin kum unsasabra wal baku sa lî auhi piu bani ra ba.

¹⁶ Witin aisi ba alki takaskaia kaka, pâsa alki brih takaskaia baku sa, apia kaka batana laya mihtam bilara laiki alki takaskaia baku sa.

¹⁷ Silak ni silak mala daukisa, baku sin waitna, waitna ai tahkia mawanka aihwa daukisa.

¹⁸ Kwah damni dusa aihwaki kaiki uplika ba, baha mâ wina pîsa, baku ai dawanka dukia nani ban aihwaki kaiki uplika ba, kulkanka bribia.

¹⁹ Liura wan mawan lilka lika, wan mawan tânka kat wan marikisa, baku sin upla lukanka lilka ba upla lukanka kat sa.

²⁰ Prura ba, raiti ba bara upla gridika lâka ba, ban pali âuyapah takras sa.

²¹ Gul bara silbar ra, pauta klauhan mita angki kaikisa; upla ra lika mayunra dauki mita laki kaikisa.

²² Man bui upla taniskira ba, unuh bilara plawar mâ kapan tilara, unuh mita ni kapma kra, witin ai taniska ba witin wina ban taki wabia apia.

²³ Sîpkam nani ba nahki sa sapa kasak kaiki bas, kupiam ra sin daiwram daknika nani ra aman luki bas,

²⁴ kan wan dukia ailal ba bara kraunka sin, ban kaia ra bâra kabia apia bamna.

²⁵ Twi ba pâwi takbia, bara inma kura sin pâwi kabia, bara daiwan pata sâtka nani il nani ra pâwi ba wahbi brih balbia;

²⁶ sîp lupia nani wina kwalkam bri kama, bara guts wainhka lika lalahka insla kum atkaia mana kabia,

²⁷ bara guts nani tialka laya aitani kabia patam kaia suliarka banhwi ba pata sin, bara dukiam dadaukra nani sin baha wina bribia.