Sins Lâka 26 - DAWAN BÎLA AISKA

¹ Mani lapta piua ra sno kauhi ba, uya yamni waras, mâ krikaia piua ra lî sin auhi ba yamni apia sa; baku sin upla sinskas mayunra tara briaia ba tâ apia sa.

² Tininiska namhpa namhpa pâli watla tauki ba baku, tânkas lahtubanka ba ban taukisa, kuna diara takras sa.

³ Wipaika lika aras dukia, kakma kiwka lika biriku tim daukaia dukia, klala ba sin upla taniskira ba nina dusa dukia sa.

⁴ Upla taniskira mapara, ai taniska lâka kat pana aisapara, man sin witin wal baku kra takmara sîa.

⁵ Upla taniskira mapara pana aisaia lan kaia, witin ai sinska pali ba tara baku kaikbiara sîa.

⁶ Ya uplika taniskira kasak luki ai bîla bliki ba walisa ba ra, witin ai mina klaki dakbisa, bara kau pât briaia sin plikisa.

⁷ Upla skahwa kum ai kuhma dusa saura ba, sip wapi laihura waras bara baku sa maprika lilka dahra kum, upla taniskira nani mita aisin ba.

⁸ Upla mita praukpraukia ra walpa wilki ba baku sa, upla taniskira ra mayunra tara yabaia ba.

⁹ Kiaya kum waitna blakira mihta ra diman ai dahra walras ba, baku sa maprika lilka dahra kum upla taniskira nani bîla ra.

¹⁰ Trisba lalulkra bui upla sut ra mangki kaiki ba, baku sa upla taniskira ra ba watla ra wark yabaia.

¹¹ Yul witin aikabata ba kli tawi pi ba, baku sa upla taniskira ai taniska kli aima wala dauki ba.

¹² Taniskira wina kau bîla kaikaia sip sa, wihki ya uya sinskira puli ba wal.

¹³ Wark takan sîa sringwaskira ba aisisa, latara, yabal tani ra layan kum prawisa.

¹⁴ Dur aipamaika nani ra alki namhpa namhpa tawisa; naku sin sringwaskira ba ai krikrika purara aikarwisa.

¹⁵ Upla sringwaskira ai mihta ba plit tara bilara dingkisa, sakuna ningkara sip apia pali sa pata ba ai bîla ra brih waia.

¹⁶ Upla sringwaskira ba lukisa witin ai sinska lâka ba kau diara tara baku kaikisa, diara tânka latan kaiki uplika 7 sinska lâka ba wal.

¹⁷ Upla blahwanka tilara dimaia ba, sim yul kum kiama wina alkaia ba baku sa.

¹⁸ Lal tanis takan uplika pauta klauhan nani lulki yakabi ba, trisbaya nani, prura dukia nani sin yakabi ba,

¹⁹ baku sa, ani waitnika ai uplika ra kunin muni si; bara wisa: “Yang aihka mai puli kapri.”

²⁰ Pauta âpu ba ra, pauta klauhi ba daswuya, bara dusa kakuhbra âpu kaka, blahwan sin âpu.

²¹ Pauta muki daskaia kaka, masku bâra sa; pauta klauhaia kaka, pauta bâra sa; bara unsaban bukaia kaka, unsasabra bâra sa.

²² Dusa kakuhbra upliki bîla aisinka nani ba lika plun lalihkra baku sa; sakuna baha nani lika tânka tihu kat iwi auya.

²³ Silbar ni sumi taya purara lalaubi prakan ba, baku bîla nani swapni painkira aisi ba lika lukanka saura brisa.

²⁴ Misbara kaiki uplika ba pain luki baku aisisa; sakuna ai kupia mununhtara kunin man paskisa.

²⁵ Witin ai bîla yamnikira baku aisi ba ra, witin ra kasak lukpara; kan ai lukanka saura lâka ni banhwan sa.

²⁶ Witin misbara wan kaiki ba maisa kapanka bîla aisi ba bikaia lukisa, sakuna upla sut mawanra ai saurka ba param sâkbia.

²⁷ Unta pakni salhki uplika ba, witin baha bilara kli kauhbia; bara walpa kitbi karbi uplika ba, witin ai purara kat kli tawi taibia.

²⁸ Kuninkira ba kasak lâka ra, misbara kaikisa, bara bîla lalalwi aisi ba, bîla mita upla swakswaka mangkisa.