Sins Lâka 24 - DAWAN BÎLA AISKA

- 19 -

¹ Man upla watawikira nani ra tumpara; baha nani wal kaia sin plikpara;

² witin nani lika upla rausauhki dukia dakbia baman ai kupia ra lukisa bamna, ai un nani sin wark saura sturka baman aisisa.

- 20 -

³ Sins lâka mita utla ba mâkan kabia; diara tânka alkaia ba mita sin, dutki bapbia playa ba.

⁴ Diara tânka ni, ai yapaika bîla ba banhwan kabia, yuya pain manakira nani sâtka ba ra pain kaikan kabia.

- 21 -

⁵ Kanra yamni sa waitna sinskira kaia wihki waitna karna kaia wal; kanra yamni sa sin tânka bri kaia wihki karnika wal.

⁶ Daukaia lukanka bri nani ba, kasak pain ni war daukisa; bara lâ uplika daknika ailal mita pura luisa.

- 22 -

⁷ Taniskira ba, lâ aisi dauki ba mawanra, witin nani dîa aisaia tânka sip briras, kan sins tânka ba witin wina laihura sa bamna.

- 23 -

⁸ Saura man daukaia ai kupia ra luki paski uplika ba, witin ai nina ba lika saura mamunra dawanka mâkan kabia.

⁹ Upla taniskira lukanka ba sika, saurka lâka ba; ¡upla âpu sa taniskira wal ai kupia alki takaskaia!

- 24 -

¹⁰ Man trabil saura yua ra dring swapma kaka, karnika ba uya âpu sma.

- 25 -

¹¹ Pruaia pâtka ra brih wan nani ba swaki sâks; baha nani sin prura pâtka briaia lamara ba pri sâks.

¹² Man wima kaka: “Kaiks, yang nani naha tânka kaikras kapri”, kuna witinka wan kupia nani paun mangki kakaira ba baha tânka bribia; pain nu kabia baha aihwaki main kaiki ba witinka ya dîa dauki ba kat aibapi ba.

- 26 -

¹³ Luhpi, nasma laya dis watla wina; bara kaikma nahki damni ba.

¹⁴ Baku sin man mampara damni kabia sins tânka ba bara diara tânka bri ba wal; pliki sakuma kaka, tnata piua ra diara yamni brima bara bîla kaikanka ba ban kaia ra sauhki tikan kabia apia.

- 27 -

¹⁵ Man upla watawikira bui upla kasakkira watla ba nina maya dimi aihwakpara; ai bawaika ba sin sauhkpara,

¹⁶ kan upla kasakkira ba aima 7 kauhan kaka kuna kli aima wala buaia sip sa; kuna watawikira nani trabil ra kauhi ba kau rungwan kabia.

- 28 -

¹⁷ Waihlam kumi kauhbia ba ra, lilia taki lilia tara daukpara; witin sin ai mina pruki ba ra man âmyapah takpara.

¹⁸ Dawan baha kaikbia, bara witin ai nakra nani ra saura kabia, baku witin sin ai lawanka tara baha uplika wina kli sâkbia.

- 29 -

¹⁹ Saura dadaukra nani ba dukiara kupiam sauhkpara, upla watawikira nani dukiara sin tumpara,

²⁰ kan upla saura nani ba naika diara yamni bribia apia; upla watawikira ba lamp kum baku daskan kabia bamna.

- 30 -

²¹ Luhpi, Gâd ra bara king ra sin sibrin luks; waihla nani ba wal asla kapara;

²² witin nani wîna sauhkanka tara aihni pali balbia bamna, upla kumi sin tânka briras, ahkia Dawan wina baku sin king wina klala briaia ba.

Sinskira aisinka wala nani ba

²³ Baku sin naha bîla nani sin sinskira nani aisin bîla ba: Yamni apia sa lâ aisi daukaika iwaika ra upla mawanka kulkaia.

²⁴ Ya mita watawikira ra pâtkas wibia kaka, upla nani witin ra lahtubi kabia, upla sâtka nani sin witin ra misbara kaiki kabia.

²⁵ Kuna witin baha nani ra klala yabia kaka, witin ra yamni takbia bara upla nani wina yamnika tara, witin nani purara bri balbia.

²⁶ Ai bîla wapnikira nani ni pana aisi uplika ba, upla un kat kiawalan ba baku sa.

²⁷ Bisniskam nani ba yabal ra dauks bara namsla ra sin ridi dauki bris warkkam nani ba; bara baha ningkara wamtla ba mâkma.

²⁸ Walkam mapara pâtka kaikras pali, witniska aimakpara; aisinkam nani ba sin kunin aisabiara.

²⁹ Pana munaia lâka ba ban pali lukankam ra bripara, wala ra munma kra sin dukia witin mita mai munata ba baku.

³⁰ Waitna sringwaskira nasla lama bâk lui wari, bara sins yamni luha uplika wainka nasla lama bâk sin luri;

³¹ bara yang kaikri baha nasla aiska bîla ba, rahra pali man pâwan kan, baha yarka kutbanka ba sin walpaya nani ba slingwan kan.

³² Yang baha kaikri bara kupi kat mangki lukri; kaikri bara naha smalkanka lan takri:

³³ kau man yaprisauhkan kaikisma bara upi lamla wauhisma ba ra, man mihtam nani ba kruski mangkuma kau pain yapaia dukiara,

³⁴ umpira lâka ba balbia bara mampara bubia upla tanis kirhbi ba war dukia bri ba baku.