Sins Lâka 23 - DAWAN BÎLA AISKA

- 6 -

¹ Man mai paiwan wihta tara wal plun piaia iwisma ba ra, pain luki kaiks ya aikuki iwisma ba.

² Ban plun uya pali pin mai dauki kama sakuna, brinkam ba takaski bris.

³ Witin nani pata auhni nani ba man tumpara, kan man lukankam ra kunin munaia sip sma.

- 7 -

⁴ Lalahkira takaia mata uya pali wînam ikpara; baha dukiara trabil taki lukpara.

⁵ Pain laki kaikma kaka, man kaikma yuya tara ba âpu sa, bara aihni pali auya, yakal baku ai tnawa pat takan baku.

- 8 -

⁶ Upla slablira ba wal plun pipara, bara witin pata auhni ba sin tumpara.

⁷ Witin ai lukanka ra dîa luki ba witin ba baku sa; mai wisa bal piaia, diaia, sakuna ai kupia ba man wal apia sa.

⁸ Aikuki sâkma plun pima ningkara, bara bîlam aisinka painkira nani aisatma ba sut, bahki man takbia.

- 9 -

⁹ Upla taniskira kiama ra sins lâka nani ba aisapara, aisisma ba wali lamwaska kikbia bamna.

- 10 -

¹⁰ Tasba markka almuk bâra kan ba, man kitpara, bara rau nani nasla ra dimpara.

¹¹ Kan witin nani ai tâwan aisasara karnakira kum brisa, lâ dauki ba tilara, witin bui man mampara witin nani hilpka aisabia.

- 11 -

¹² Mai smalkan yaba kat kupiam mangki bas, sins lâka bîla aisinka nani sin kiamam ra mangks.

- 12 -

¹³ Swipara wahma ra, tiara ra smalkisma ba wina; klala kulki wipma ba mita witin ra ikma apia;

¹⁴ man bui witin ba klala ni wipma ba mita, ai rayaka ba pruan nani tasbaya wina dakbi sâkma.

- 13 -

¹⁵ Luhpi, man sins lâka ba alkma ba ra, yang wal upla wala kau lilia ba âpu kabia.

¹⁶ Kupi mununhta ba kat âiyapah kira lilia kamna, man unam nani diara wapnikira nani aisabia ba ra.

- 14 -

¹⁷ Upla saurakira nani ra kupiam tumbiara, sakuna yu aiska Dawan sibrinka wal kama.

¹⁸ Kasak yamni pali rayakam tnata alkma; bara man kainamra bîla kaikisma ba, sauhki tikan kabia apia.

- 15 -

¹⁹ Luhpi, wali bas, bara sinskira bas; kupiam sin yabal pain bâk wapi bas.

²⁰ Wain dadira nani tilara aikuki kapara, upan papira gridikira nani tilara sin apia.

²¹ Tahpla dadira wih bîla maihsira nani wal diara luha takbia bamna; bara sringwaskira nani kwala kalwan man dimbia.

- 16 -

²² Man aisikam pali ra pain wals, witin mai baikan ba; bara yaptikam almuk takbia ra bahki kulkpara.

²³ Kasak tânka ba bara sins lâka ba atki bris, smalkanka bara diara tânka alkaia ba, ¡atkrika wabiara!

²⁴ Aisika ai luhpia waitna pain sinskira bri ba aitani sa witin lilia kalwi kaia;

²⁵ ¡bamna papikam bara yaptikam ra yas, lilia ai dahra walbia bara sin ai kulkanka tara bribia!

- 17 -

²⁶ Man bui yang ra aiska aman wali bas, yang luhpi; namkra nani sin yarka yang yabalki nani yamni kaiki kabia.

²⁷ Rug mairin, yabal mairka nani ba lika, liwanhta bîla sirpi pakni salhkan ba baku sa.

²⁸ Âu, witin nani kunin mamunra, upla nina maya dimisa, âimplikra baku; bara daukisa waitna ailal ban tanis tiwaia ba.

- 18 -

²⁹ ¿Ya pât wahwisa? ¿Ya ba inisa? ¿Ya unsaban ra wini inisa? ¿Ya kabia ni bahki man insauhkan kabia ba? ¿Ya nakra pauni pali takan kabia ki?

³⁰ Baha nani sika wain di swiras ba, wain sât sât abalki daukan trai kaikaia auya ba.

³¹ Wain ba witin pauni taki ba ra kaikpara, kâp bilara ai mapla latan lakwi ba ra, wan kârma ra lalalwi dimi auya ba ra sakaia.

³² Sakuna tnata ra piuta baku wan samuya, ai napa sin piuta baku latwan pali wan samisa.

³³ Namkra nani ra yaka diara aihka pali nani kaikbia, kupiam lukanka ra yaka sin diara tanis pali nani man aisi kabia;

³⁴ bara mai munka kabu biara ra prawisma ba baku damra wali kama, man ba but tara dusa bapan ba tâ pali ra aitnikisma baku damra wali kama,

³⁵ bara man wima: “Ai prukan sa bara latwan kaikras, ai wipan kuna daihra walras kapri; sakuna yang kli kupi krawbia ba ra, kau ban baha wainka ba pliki kamna.”