Sins Lâka 22 - DAWAN BÎLA AISKA

¹ Kanra yamni sa mayunra pain bri kaia bara kulkanka sin, gul bara silbar uya briaia ba wal.

² Lalahkira bara umpira ba wal diara sin dukia bri ba; wâlsut ra Dawan mita paskan ba.

³ Aman kaiki uplika ba, diara saura kaiki bâra takaskisa; sakuna dahra yamni walras nani ba, ban ai tâura auya bara pât ra dimisa.

⁴ Dawan ra bawaia lâka bara pain kulkaia lâka ba wal baha wina lika prisantka dukia kukanka nani takisa, yamni kulkan lâka bara rayaka sin.

⁵ Kiaya nani, kiwa wilkanka nani, upla warha yabalka ra bâra sa: sakuna ya ai rayaka aihwaki kaiki uplika, baha nani wina laihura wabia.

⁶ Tuktan ba ai rayaka yabalka lâka ba, pain smalki paki bas naiwa piua ra, baku mika witin almuk takbia ba ra, baha wina tnaya ra tawbia apia.

⁷ Umpira nani tilara, lalahkira ba king sa; tras dadimra tilara, lalah lin mamunra ba.

⁸ Ya watawika lâka mâ mangki ba, pât tara mâ krikbia; Dawan ai kupia baiwras klalka nani ba krikan kabia.

⁹ Upla wala ra yamni kaiki uplika ba, yamni pali munan kabia, witin ai pata ba wina umpira nani ra yabi bamna.

¹⁰ Lawaska kakikra ba kangbi sâks, bara blahwan lâka taki wabia, bara aiklabanka ba takaskbia, bahki wan kulkan lâka ba sin.

¹¹ King ba yamni kaikisa ya ai kupia ra kunin luha ba, bara ai uplika takaia lukisa ya kupia yamni lâka ra aisi ba.

¹² Dawan ba sinskira purara aihwaki kaikisa, bara kunin aisasara bîla aisinka ba bahki kaikisa.

¹³ Wark sîa sringwaskira ba wisa latara, yabal tani ra layan kum bâra sa, bara witin ra ikaia want sa.

¹⁴ Marit lâka sasauhkra nani bîla ba liwanhta pakni nani baku sa; ya bâra kauhan ba Dawan mita lahtubisa.

¹⁵ Tanis lâka ba lika kau tuktan nani ba kupia lukanka tâka sa; sakuna kupia kraukaia klalka ba mita baha wapni daukisa.

¹⁶ Ya ya umpira uplika ra taibi muni ba witin ai dukia kan manis briaia mata, apia kaka ya yuyakira diara yabi ba, baha uplika diara luha takbia.

Sinskira nani diara 30 aisi ba

¹⁷ Sinskira bîla nani aisinka ba, man kiamam pri tniki wals, dîa mai wi ba kat aman wals.

¹⁸ Diara painkira sa man baha nani kupiam ra ban brima kaka, Bara baha sut kli aisi sâkma kaka.

¹⁹ Naiwa yang bui man ra baha maisam pakri sa, man Dawan ra kasak luki tniwi kama ba mata.

²⁰ Aima 30 yang bui man ra ulbri sa, lâ tânka smalkaia dukiara, diara tânka kaikaia dukiara sin.

²¹ Lan mai daukaia mata kasak ba kakaira takma bara sip kama ai bîla kat ulbi yabaia ya mamkabi walbia kaka.

- 1 -

²² Upla umpira ba umpira sa wisi diara bri ba dakpara, kan witin ba, lâ wihta nani mawanra hilpkas bûi ba taibi munpara,

²³ lâ dauki tilara Dawan bui witin tâwan aisabia bamna, bara taiban kabia ya tataibra ba.

- 2 -

²⁴ Kupia baiwi uplika wal uplikam takpara, bara kupia lapta waitnika aikuki wapara.

²⁵ Man bui witin nani natka saura nani ba lan takma ba ra, man mita kiwa ba namna ra mangkma.

- 3 -

²⁶ Upla wala traska aibapaia wisi pramis takpara,

²⁷ man aibapaia diara âpu sma kaka, krikrikam kat sin mai dakban kabia.

- 4 -

²⁸ Tasba markka nani damikam nani mita mangkan bâra ba baha markka ba man mita kitpara.

- 5 -

²⁹ Ya ai warkka pain daukisa kaka, king dukia dadaukra kabia; bara upla bahki dukia dadaukra kabia apia.