Sins Lâka 21 - DAWAN BÎLA AISKA

¹ King lukanka ba Dawan mihta ra sa; tingni nani lî plapi ba baku nina blikisa Dawan yabalka ra brin dauki ba kat.

² Upla ba mapara diara sut dauki ba pain baman sa, kuna Dawan wan kupia lukra nani ba paun mangki kaikisa.

³ Kasakka lâka bara wapni lâka ba dauks, kan Dawan mita baha ba kanra yamni kaikisa daiwan nani iki angki dauki ba wal.

⁴ Ai nakra ni praut kaiki ba ai kupia lukra tara sa luki ba, upla watawikira ingnika ba sut, saurka lâka sika.

⁵ Aman pali luki kaiki daukan dukia nani ba sut pain takisa; sakuna istikira man daukan dukia ba, sut slingwi tiwisa.

⁶ Kunin lâka ra dukia kukan ba bribia kaka, lilka kasak apia bahki lupia baku baha nani wina prura baman pliki ba.

⁷ Watawikira nani ba un ai saurka ra sauhki tikan kabia, wapni lâka ba daukras tâwan.

⁸ Upla watawikira nani daukanka ba warha sa, pain apia sa sin; kunin âpu uplika diara dauki ba lika wapni sa.

⁹ Kanra yamni sa, utla bahna rayka ra iwi kaia ba wihki utla yahpa tara ra iwi kaia, mairin unsasabra ba wal.

¹⁰ Upla watawikira kupia ba diara saura baman daukaia lukisa; ban kaia ra ai uplika ra yamni kaikras.

¹¹ Lawaska kiki uplika ra klala yabi ba ra, dahra yamni walras uplika ba lan takisa; bara sinskira ra kupia krauki ba ra, witin diara kaikaia lâka prak alkisa.

¹² Gâd kasakkira ba kaikisa upla watawikira watla ba; bara watawikira nani ai saurka dauki ba mita aisawaia ra mangkisa.

¹³ Umpira ba wini ba ra ya ai kiama praki ba, baku sin witin hilp brima apia hilp makabia piua ra.

¹⁴ Sins bri tânka ra prisant yabi ba wan kupia baiwanka kau tara ba sin lamni daukisa.

¹⁵ Upla kasakkira lilia sa, lâ wapnika aisi dauki ba, bara saura dadaukra nani ba, ai sauhki tikanka ba bribia.

¹⁶ Ya daukanka kum sins tânka ra nina blikras kaka, pruan nani tilara wih takaskbia.

¹⁷ Lilia lâka baman lihki uplika ba, diara luha pali uplika kabia; wain laya bara isint nani sin lihki uplika ba lika lalahkira takbia apia.

¹⁸ Upla kuninkira bara watawikira ba, kasakkira bara kulkan bri nani ba watlika ra, pât wahwaia sa.

¹⁹ Kanra yamni sa upla iwras tasbaya ra iwaia, wihki mairin kum kupia babaiwra bara unsabras wal iwaia kaka.

²⁰ Upla sinskira watla ra yuya bâra sa, bara isint sin; sakuna taniskira nani diara bri ba sut danh daukisa.

²¹ Ya kasakka lâka bara kupia pihni lâka wal nina bliki ba, rayaka wih pain kulkan lâka saki bribia.

²² Sinskira ba, tawan karnakira pain kan kahbi bri ba mapara aiklabisa, bara witin nani luki tniwi kan ba karnika batakan.

²³ Ya ai tânka brisa dîa aisi ba, aima kumi sin pât ra dimras sa.

²⁴ Praut lâka ra ai wîna tara puli uplika ba nina, “Lawaska Kakikra” mâkan sa, witin ai kupia baiki praut luki ai warkka dauki ba.

²⁵ Upla sringwaskira, kupia brinka mita witin ba ikuya; kan ai mihta nani wark takan daukras bamna.

²⁶ Witin bâra sa yu aiska ai brinka karna ba wal, diara brin dauki iwisa; sakuna upla kasakkira diara yabisa ai mihta takaskras kira.

²⁷ Watawikira nani daiwan iki angki dauki ba ra, Dawan mita saura pali kaikisa; kan aiska witin nani ai kupia lukra saura wal brih aula bamna.

²⁸ Witnis kuninkira aisi uplika ba, sauhki tikan kabia; sakuna ya wali tânka ba uplika ba lika pana aisi ban kaia sip kabia.

²⁹ Waitna watawikira ai mawan karna daukisa, ai daukanka ba aihwa sakaia; kuna wapnikira ba lika, ai dahra walisa ai tânka dutki sa.

³⁰ Dawan mapa ra, sins lâka nani ba bahki baman takisa, diara tânka alkaia lâka, lâ tânka smalkaia sin âpu sa.

³¹ Upla ba aras nani ridi daukisa war aiklabaia dukiara, sakuna pura lui buaia ba, Dawan mita yabisa.