Sins Lâka 16 - DAWAN BÎLA AISKA

¹ Daukaia luki ba lika upla dukia sika, prakaia bîla ba lika Dawan brisa.

² Diara nani sut dauki ba waitna bui pain kaikisa; sakuna Dawan sika, yawan daukaia luki ba, lâ tânka ni aisi dauki ba.

³ Man warkkam nani Dawan mihta ra mangks, bara diara nani kupiam ra luki paskram ba dauki sâkma.

⁴ Dawan diara kumi bani daukan ba witin ai warkka dukiara sa, âu, upla watawikira ba sin daukan, trabil yua ra klala yaia ba.

⁵ Kupia praut uplika nani ba Dawan bui saura pali kulkisa, naiwa, yauhka kabia pat pali klala bribia.

⁶ Kupia pinhka bara kasak tânka ba wal, watawanka ba kli wapni takan sakisa, bara Dawan ra kulkaia ba mita upla nani lâ saura wina laihura takisa.

⁷ Upla nani daukanka ra Dawan yamni kaiki ba ra, witin ai waihla nani ra munan, witin wal kupia kumi takisa.

⁸ Kanra yamni sa diara wiria baman briaia, kasak lâka ra diara ailal briaia ba lâ wapnika daukras kira ni.

⁹ Upla kupia ba lika wark nani daukaia ba yabalka ba luki plikisa, sakuna Dawan sika, witin ai warkka luki dauki ba wapnika mangkisa.

¹⁰ Dawan aisin bîla ba wina king ba brih aisisa; bamna lâ aisi daukaia tilara, ai bîla wina kunin aisabia apia.

¹¹ Paun mangkaia daukan ba wapnika lâka kat paskan sa; mangkaika ba, Dawan dukia; paun mangkaika ba Dawan mita daukan sa.

¹² Watawi daukaia lâka ba, king nani bui saura pali kaikisa; king iwaika ba, kasakka lâka ni dutki bapan sa bamna.

¹³ King nani ba latwan lâka manis brisa, latwan sa bara sin yamni kaikaia lâka ba, baha nani kulkanka lâka bara kasakka lâka ra aisi nani ba ra.

¹⁴ King kupia baiwanka ba lika, prura sturka twilkisa baku sa, bara sinskira nani dukia sa lamni daukaia ba.

¹⁵ King mawan liliaka ra sika wan rayaka briaia ba bâra sa; bara witin, yawan ra yamni luki ba lika, kasbrika ra lî bâra ba baku sa.

¹⁶ Sins lâka alki briaia ba, kanra yamni sa gul pain briaia ba wal. Diara tânka brih, lukaia lâka pliki briaia ba sin, silbar wal kanra yamni sa.

¹⁷ Wapnikira nani ba lâ saura ba wina dakwi takaia sa, daukanka alki yamni alki bri ba uplika lika ai rayaka aihwaki kaiki brisa.

¹⁸ Praut lâka ninara sauhki tikan lâka sin aula; pura luaia spiritka ba ninara, kauhanka tara sin balisa.

¹⁹ Kanra yamni sa, umpira nani aikuki bawan lâka bri kaia ba wihki yuyakira takaia, prautkira nani wal.

²⁰ Ya pain pura kaiki tâ bribia ba, diara sut ra pain baman kabia, ¡yamni kabia baha nani Dawan ra kasak luki ba!

²¹ Ya sins lâka ra luki kaiki ba, baha ba sinskira nina mâkisa, kupia yamni bîla aisanka ba, kau pain kasak lukaia wankisa.

²² Diara tânka kaikaia lâka brih uplika mapara, raya kaia laya kârma sa; taniskira nani ra diara smalki ba sin, tanis lâka pali man sa.

²³ Upla sinskira luki kaiki ba, tânkira sturi aisisa, ai bîla aisinka nani ba sin, tânka kau param aisi marikisa.

²⁴ Bîla painkira nani aisi ba lika, nasma laya damnira baku sa; wan kupia ra damni sa, bara karnika raya wankisa.

²⁵ Yabal bâra sa upla nakra ra wapni man sa; sakuna baha yabalka tnata ba lika prura.

²⁶ Wark taki uplika ba lika, plun pin dauki ba mita ai warkka daukisa, plun dauki ba mita witin ra karna munisa.

²⁷ Upla watawikira ba, saurka lâka kubuska kum sa; ai bîla aisinka pali nani ba wina pauta lakni man takisa.

²⁸ Watawikira ba, blahwan lâka baman bukisa; upla dusa kakuhbra ba mita waihla lâka ra wan brih wisa.

²⁹ Rausasauhkra ba, ai walka ba ra kunin munisa, bara yabal yamni apia bâk sin brih auya.

³⁰ Saura daukaia luki uplika ba ai nakra kiuskisa; saura ba daukan ba ra ai napa kapak sami brisa.

³¹ Wan tâwa pihwan ba lika prana tara kraunka kum sa, baha sika kasakka lâka yabalka ra kasak wapi tauki ba tânka.

³² Kau yamni sa kupia swapni kaia wihki kupia karna kaia ba wal, kau yamni sa, ai wîna ra taibi muni pura lui ba wihki, tawan kum pura luaia ba wal.

³³ Upla bani sika lat lulkisa; ban sakuna dîa takaia sut ba Dawan mihta ra sa.