Sins Lâka 13 - DAWAN BÎLA AISKA

¹ Luhpa waitna sinskira ba ai papika smalki ba walisa, sakuna luhpa saura ba lika, smalki bîla ba walras sa.

² Upla ai bîla aisinka mâ ba wina diara yamni pibia, sakuna upla âiatkra ba, plun dauki baku sa saura munaia mapara.

³ Witin ai bîla alki yamni bri ba, ai rayaka ba sin alki brisa; sakuna ai bîla uya kwâki ba lika, sauhki tikan kabia.

⁴ Upla sringwaskira kupia ra diara brin dauki ba bribia apia, ya wark takbia ba lika, tara pâwan kabia.

⁵ Upla kasakkira ba kunin aisaia waihla sa; swira bara kulkras lâka ba rugkira nani dukia sa.

⁶ Saura lâka luha ra kasak ba mita kaina kahbisa; saurka lâka ba, saura dadaukra ra sauhki tikisa.

⁷ Upla tila yuyakira kaia munisa, sakuna diara sut luha sa; upla tila sin umpira baku pulisa, sakuna yuya ailal brisa.

⁸ Upla ai yuyaka ailal bri ba baha wal ai rayaka swaki sakisa, sakuna diara âpu uplika lika saura munaia aisi ba walras.

⁹ Kasakkira nani ba lamp kum baku ingwisa, watawikira ba lamp kum daswan ba baku sa.

¹⁰ Praut lâka bri ba wina lika unsaban baman sâkbia, kuna sins lâka ba lika, bawan lâka bri uplika nani ba wal sa.

¹¹ Upla kunin lâka wina ai yuyaka ailal saki ba, pat pali sirpi takbia, sakuna ai mihta warkka ni tawa tawa wahbi ba, diara ailal sakisa.

¹² Wan kanra briaia luki ba, wihka takaski ba mita, wan kupia ba sari wahwisa, sakuna yawan brin wan dauki ba bal takan ba ra, raya kaia dusa ba baku sa.

¹³ Bîla smalkan nani ba wina kum bahki kulkbia uplika ba lika ai bîla saki inbia, sakuna lâ bîla ra sibrin luki uplika ba, ai mana bribia.

¹⁴ Upla sinskira smalkanka ba lika raya kaia lâka kârma sa, bara pri mai sakan kabia prura wilkanka ba wina.

¹⁵ Tânkira munaia ba tâka mita yamni wan kaikuya, sakuna upla âiatkra nani yabalka ba sauhki tikaia ra auya.

¹⁶ Ya tânka bri nani ba sins tânka ra diara daukisa, sakuna taniskira ba ai taniska ba pain skahkisa.

¹⁷ Saki blikan uplika watawikira ba lika swira lâka baman twilkisa, sakuna saki blikan uplika kasakkira ba wan rakaika brih aula.

¹⁸ Umpira bara saura pali kulkan kabia, baha nani smalkanka ra saura kulkbia ba, kulkanka tara bribia ya smalkanka ba walbia kaka.

¹⁹ Wan brinka kat sut dauki ba, lilia wan sakisa. Sinskas nani ba sip apia lukisa saura ba wina laihura waia ba.

²⁰ Sinskira nani wal tauki bas, bara sinskira kama; taniskira nani wal tauki bas, bara mai sauhki mai tikbia.

²¹ Trabil lika upla saurakira nani nina blikisa, sakuna kasakkira nani ra mana diara yamni pali yaban kabia.

²² Upla yamni ba ai dukia kukanka ai mula nani dukia swisa, sakuna saura dadaukra ai yuyaka manis bri ba, upla kasakkira nani dukia suni swisa.

²³ Upla umpira nani tasbaya ra lika plun manis bâra sa, sakuna kasakka lâka daukras ba mita, sut lus takisa.

²⁴ Klala alki takaski uplika ba, ai luhpia ra misbara kaikisa, sakuna witin ra latwan kaiki ba, mahka smalkuya kau tukta ba piua ra.

²⁵ Upla kasakkira ba plun pîsa ai kupia brinka sut daskbia ba kat, sakuna watawikira nani biara ba lika, kau plun dauki takaskisa.