Sakaraya 9 - DAWAN BÎLA AISKA

Tawan lamara iwi nisanka nani ba klala bribia

¹ Naha bîla nani na sika, Dawan aisin ba Hadrac kuntrika, Damaskus tawanka mapara: “Siria tawanka tara nani sut ba, Dawan tawanka sa, Israel kiamka nani sut Dawan uplika nani ba baku.

² Hamat uplika nani ba, baha lamara tawanka Hadrac wal ai lamara ba, bara Tiro Sidón wal uplika iwi natka ba, baha nani sut ba, Dawan uplika kulkisa.

³ Tiro uplika nani utla karna nani mâkan, gul, silbar bara slaubla baku ailal kuki brisa.

⁴ Sakuna Dawan baha dukia kukanka nani ba sut dakbia, bara kabu ra lulkbia, bara tawanka ba aiska pali angkbia.

⁵ “Ascalón tawanka uplika nani baha kaikbia ba ra, kasak sirang iwbia. Gaza tawanka uplika nani sin pât uya wauhbia, Ecrón uplika nani sin bîla kaikanka âpu takbia. ¡Gaza ra king âpu kabia, Ascalón ra sin upla âpu!

⁶ Upla masraka sât sât Asdod ra iwi kabia, bara baku daukrika filisteo nani prautka lâka ba mâyara iwbia.

⁷ Witin nani bîla wina, wîna tala wal pi ba sakamna, piaia win pata nani pi ba, napa nani wina sakamna. Ban sakuna, baha uplika nani ba tila wina, yang upliki nani kaia takaskbia; baha nani ba, Juda kiamka tilara kulkan kabia, bara Ecrón ba sin, upliki nani tilara kulkbia, Jebús uplika nani upliki nani takan ba baku.

⁸ Upliki nani ba kan kahbaia dukiara, ya nahak bal lubia ba kainara yang bûi kaisna. Tataibra ba kli witin nani ra rausauhki kabia apia, kan nanara yang pali aihwaki kaikisna bamna.”

Israel ra naika king aimakbia ba

⁹ ¡Liliam pali bas, Saion tawanka! ¡Âmyapah kira aiwans, Jerusalem tawanka! Kingkam man nani ra aula; kasakkira, pura lalura, sakuna bawikira, biriku kum ra uli aula, biriku kum, biriku luhpia ra uli aula.

¹⁰ Witin mita Efraín waginka nani ba sauhki tikbia, Jerusalem ra araska nani ba bara war aiklabaia pantamangkika nani ba sin. Kupia kumi lâka ba nisan nani ra wibia; bara kabu kum wina, kabu wala kat king aimakbia, Éufrates awala wina ban tasba aiska pali ba kat.

Israel blasi kata baku kli takbia

¹¹ Dawan naku aisisa: “Jerusalem, man tala laiki lâ daukram ba mita, liwanhta lâwan ra uplikam nani silak ra mangkan bâra ba, yang baha wina sakamna.

¹² ¡Man nani tasbayam wina kangbi mai sakan, sakuna kli balaia bîla kaikisma ba, kan kahbaika pliskam ra kli tawi bal!

¹³ Kan war aiklabaiki pantamangka nani baku ba kulki brisma, baha ba Juda sa, bara Efraín ba trisbaiki mangkri sa. Saion, man wina sord kum paskaisna, bara uplikam nani ba lika, Grik tasbaya uplika nani mapara aiklabaia blikamni.”

¹⁴ Dawan bal ai uplika nani purara latan takbia; imyula lipi baku ai trisbaika nani lulkbia. Dawan, Gâd, trumpit ba puhbia, waupasa payaska karna krawi nani ba tilara wapi balbia.

¹⁵ Dawan, karnika sut bri ba mita, ai uplika nani kan kahbia, bara praukpraukia lalulkra nani walpaya ba ai mina ra taibia, bara ai waihla nani ba langki pibia; tâlia ba wain baku witin dibia, kâp tara kum baku witin nani ba banhki takbia, aringka nani altar purara tala laiki kahbi swin ba baku.

¹⁶ Baha yua ra, Dawan ai Gâdka ba mita ai uplika nani ba swaki sâkbia sîp daknika kum baku, bara witin ai uplika nani ba ai kuntrika pali ra king kraunka walpaya pranakira nani baku ingwi kabia.

¹⁷ ¡Baha kuntrika ba nahki yamni, nahki pranakira kabia! Plawar, wain ailal bri ba mita, ai luhpia waitna bara ai luhpia mairin nani ba pranakira pain pâwi kabia.