Sakaraya 5 - DAWAN BÎLA AISKA

Wauhtaya ulban lilka aihka kaikanka

¹ Lilka wala kumi aihka kaikri. Wauhtaya ulban kum pâsa ra pâli tauki kan.

² Insal ba maikabi walan: “¿Man dîa kaikisma?” Yang pana witin ra naku wîri: “Wauhtaya ulban kum pâsa ra pâli tauki ba kaikisna. Yarika ba param matsip bara bîla yahpika ba param wâl pura bakriki brisa.”

³ Bara witin naku ai win: “Wauhkataya ba ra ulban sa, naha kuntrika aiska ra lahtubanka alkuya ba. Tnaya wâl ra naku ulban sa, kunin aisi impliki swer taki nani ba sut klala briaia sa.

⁴ Dawan, witin karnika sut alki bri ba, kasak aisisa: ‘Naha lahtubanka yang blikisni, impliki kunin aisi yang nini bri swer taki nani ba watla ra dimaia, bara lahtubanka ba bahara ban takaskbia, watla playka nani ba sukwi âpu takbia ba kat.’ ”

Mairin kum bara kulki kaikaia kiwka lilka aihka kaikanka

⁵ Bara insal yang wal aisi kata ba kli balan, bara naku ai win: “¡Nanara diara taki aula ba kaiks!”

⁶ Bara yang bui witin ra makabi walri: “¿Baha ba dîa?” Witin pana ai win: “Baha sika diara kulki kaikanka tânka kum. Naha kuntrika uplika nani saura daukan ba kulki kaikanka.”

⁷ Patakika ba lit ni prakan kan. Baha bukutban ba ra, mairin kum baha bilara iwi kan kaikri.

⁸ Insal ba ai win: “Baha mairka sika watawika lâka ba.” Bara diara kulki kaikan ba bilara, platukbia bara litka ba ni kli pura prakbia.

⁹ Kli kaikri ba ra, mairin wâl bal takan. Tnawa nani bri kan, bara pâsa mita aiki kan. Tnawa ba suk tara tnawa baku kan, bara patakika ba pâsa ra brih auya kan.

¹⁰ Insal yang wal aisi kata ba ra makabi walri: “¿Pataki ba anira brih auya?”

¹¹ Bara pana naku ai win: “Witin nani Babilon ra mairka ba tempelka kum mâkaisa. Mâki danh takbia ba ra, playa tara kum purara mairka ba suni swibia.”