Sakaraya 4 - DAWAN BÎLA AISKA

Batana laya watlika maprika lilka aihka kaikan ba

¹ Baha insalka yang wal aisi kata ba kli balan, bara upla kum yapi kan tatukbi buki ba baku taitukban. Bara maikabi walan:

² “¿Man dîa kaikisma?” Bara yang pana witin ra wîri: “Batana laya watlika gul ni paskan kum kaikisni, batana laikaika kum pura tani ra brisa. Purara lamp 7 bâra sa, batana laya nani ba baha kat wisa, untika 7 bâk.

³ Batana laya watlika lama ba ra kaikisna oliv dusa wâl bâra sa, kumi aihkika tani ra bara wala ba smihka ra.”

⁴ Insal yang wal aisi kata ba ra naku makabi walri: “¿Baha ba dîa tânka, wihtki?”

⁵ Insal ba naku ai win: “¿Man baha tânka briras sma ki?” Bara yang bui witin ra wîri: “Apia, wihtki.”

⁶ Bara witin naku ai win: “Naha bîla sika Dawan mita Zorobabel ra aisi ba: ‘Aiklabaia daknika ra luki tniwpara, man karnikam ra sin apia; ban sakuna, yang Spiritki ra luki tniws. Karnika sut bri ba Dawanka aisisa.,

⁷ Il tara, ¿man ba ya sma ki? ¡Zorobabel mawanra man ba tasba langni baku takma! Witin sika tempel walpaya wihtka ba, ai watlika ra mangkbia bara upla nani wini kabia: ¡Pranakira sa! ¡Pranakira sa!’ ”

⁸ Baha ningkara, diara wala smalkaia Dawan ai win:

⁹ “Zorobabel mita naha tempelka playka nani ba bapan sa, bamna witin mita aiska mâki daukbia.” Baku man nani damra walma, karnika sut bri Dawanka ai blikan ba.

¹⁰ “Zorobabel kainara wark tâ bukan nani ba, yamni wark sirpi nani ba tâ krikras kan, sakuna nanara Zorobabel wark aiska daukbia ba kaiki, witin nani sin lilia takbia.” Baha ningkara insal ba bal pura praki, aisin: “Ingni nani 7 bâra ba sika, Dawan nakra nani, tasba aiska ra kaiki tauki ba.”

¹¹ Yang bui witin ra makabi walri: “¿Batana laya watlika tnaya bani ra, oliv dusa kum bâra ba tânka ba dîa?”

¹² Naha sin makabi walri: “¿Dîa tânka brisa, baha nani tnawa wâl ba, batana laya watlika ra waia untika lamara, gul ni paskan ba baha batana laya ba lamp ra wi ba?”

¹³ Insal ba pana ai win: “¿Man baha nani tânka briras sma ki?” Bara yang pana wîri: “Apia, dawanki.”

¹⁴ Bara witin kli ai win: “Baha nani wâl ba sika, bâk saki ridi daukan sa, Dawan warkka daukaia tasba aiska ra.”