Sakaraya 13 - DAWAN BÎLA AISKA1 “Baha piua ra lî kârma kum takbia, bara baha laya ra Debit kiamka nani, Jerusalem ra iwi nani ba ai saurka nani ba sikbia. 2 Bara naha kuntrika aiska ra gâd bahki nani ba nina ba kat sin sut sauhki tikamni, ban baha nani nina ra ai pura suni kaia apia dukiara. Prapit nani lukan tâski bri nani ba sut, naha kuntrika wina sakamna. Yang, Dawan, naha aisisna. 3 “Bamna upla kum ban dahra aisaia wibia kaka, aisika bara yaptika wal witin ra wibia: ‘¡Man pruaisma, kan Dawan ai bîla dahra aisi ba ninak man kuninkam ba aisaisma ba tâwan!’ ¡Ai aisika, ai yaptika pali mita skiru ni sabia, witin prapit baku aisi kabia ba ra! 4 Baha piua ra, prapit nani, witin nani diara kaikan wisi aisaia ai swira bri kabia. Upla kumi sin upla ra kunin munbia apia, prapit nani daiwan taya prâka dimi ba prâka ba dimbia apia; 5 ban sakuna, upla kumi bani aisabia: ‘Yang prapit apia, yang insla dadaukra. Yang tuktan wina insla dadaukra sna.’ 6 Bara upla kum witin ra naku makabi walbia kaka: ‘¿Ban kaka, dîa muni wînam insauhkan na?’, witin pana wibia: ‘Upliki nani watla ra naku ai daukan.’ ” “Dawan ba yang Gâdki sa” 7 Dawan karnika sut bri ba, kasak aisisa: “¡Sord, bus, sepadki ba mapara hilp ai muni ba mapara sin! ¡Sepad ba iks, bara daknika ba yakabrira takbia, bara yang sin sîpki lupia nani ba mapara buamna! 8-9 Naha kuntrika ra iwi nani ba tila wina kwâra tara prui banhbia; bara kwârika wala baman raya kabia. Baha raya nani ba pauta klauhi bâk bri lui wamna; silbar baku slilki sunu sakamni, gul lipni daukan ba baku daukamni. Bara witin nani bui yang ra ai pura sunbia, yang sin pana witin nani ra aisamna. Bara ai nina ba sin ‘Yang upliki nani’ mâkamni, bara witin nani sin pana ai wibia: ‘Dawan ba yang nani Gâdki.’ Yang, Dawan, naha aisisni.” |
© 2010 Bible Society in Nicaragua
Bible Society in Nicaragua