Nihimaya 12 - DAWAN BÎLA AISKA

Prîs nani wihki Libait nani wal

¹ Naha nani sika prîs nani bara Libait nani sin Zorobabel, Salatiel luhpia waitna, bara Jasua aikuki alba lâka ra brih wan kan wina kli bali banhwan ba: Prîs nani ba: Seraías, Jirimaya, Esdras,

² Amarías, Maluc, Hatús,

³ Secanías, Rehúm, Meremot,

⁴ Idó, Guinetón, Abías,

⁵ Mijamín, Maadías, Bilgá,

⁶ Semaías, Joiarib, Jedaías,

⁷ Salú, Amoc, Hilquías, bara Jedaías. Naha nani sika prîs nani wihtka ba, bara ai muihni nani aikuki, Jasua yua nani ra.

⁸ Libait nani ba: Jasua, Binuy, Cadmiel, Serebías, Juda bara Matanías, witin ai pânika nani aikuki sika, mayunra lawana nani ba aiwani banhwi kan;

⁹ bara Bacbuquías bara Uní, baha nani ai pânika nani aikuki lika, wala nani tâura kan ai warkka nani daukbia dukiara.

¹⁰ Jasua ba Joaquim aisika kan, Joaquim ba Eliasib aisika kan, Eliasib ba Joiadá aisika kan,

¹¹ Joiadá ba Johanán aisika kan, bara Johanán ba Jadúa aisika kata.

¹² Bara Joaquim yua nani ra, prîs nani taika nani wihtka aimaki kan ba naha nani kata: Seraías taika tila wina, Meraías; Jirimaya tila wina, Hananías;

¹³ Esdras tila wina, Mesulam; Amarías tila wina, Johanán;

¹⁴ Melicú tila wina, Janatan; Sebanías tila wina, Josep;

¹⁵ Harim tila wina, Adná; Meraiot tila wina, Helcai;

¹⁶ Idó tila wina, Sakaraya; Guinetón tila wina, Mesulam;

¹⁷ Abías tila wina, Zicrí; Minjamín tila wina, ...; Moadías tila wina, Piltai;

¹⁸ Bilgá tila wina, Samúa; Semaías tila wina, Janatan;

¹⁹ Joiarib tila wina, Matenai; Jedaías tila wina, Uzí;

²⁰ Salai tila wina, Calai; Amoc tila wina, Éber;

²¹ Hilquías tila wina, Hasabías; bara Jedaías taika wina, Natanael.

²² Eliasib, Joiadá, Johanán bara Jadúa yua nani ra, bara Darío Persia kingka aimakan ba kat, Libait nani ba ai taika wihtka nani baku nina mangkan kata, bara prîs nani ba sin.

²³ Libait nani ai taika wihtka nani aimaki kan ba lika, nina nani wauhtaya ra kli ulbi mangkan ba yua wina, Johanán Eliasib mulika yua kat bâra ban kan.

²⁴ Libait nani wihtka nani ban naha nani kata: Hasabías, Serebías, Jasua, Binuy bara Cadmiel, bara ai pânika nani ba lika aikuki witin nani ai warkka kan ba Dawan ra mayuni tingki wiaia, Debit, Gâd waitnika dîa win kan ba kat daukan, witin nani kumi bani ai piua ba kat ai warkka daukaia.

²⁵ Bara dur ra aihwawakra nani ba naha nani kata: Matanías, Bacbuquías, Abdías, Mesulam, Talmón bara Acub.

²⁶ Naha nani sut ba, Joaquim Jasua luhpia waitna, bara Josadac mulika ba yua nani ra bâra kan; bara wihta tara Nihimaya, prîs, Esdras smasmalkra yua nani kat ban bâra kan.

Tawan kutbanka ba, Dawan mihta ra mangkan

²⁷ Jerusalem tawanka walpaya kutbanka ba liliaka daukaia yua aimakan ba ra, Libait nani ani anira bâra kan nani ba sut pliki, Jerusalem ra brih balan mayunaia, aiwanaia, pân taya nani binka daukaia, arp pulaia, bara drum kungbi lilia daukaia dukiara.

²⁸ Bara Libait aiwawanra nani ba sin asla daukan, Jerusalem lama kir, Netofá tawanka sirpi nani sut wina sin,

²⁹ Guilgal watla uplika nani wina, Gueba pliska nani wina bara Azmávet wina sin asla takan, kan aiwawanra nani ba Jerusalem lama kir iwi banhwi kata.

³⁰ Bamna prîs nani bara Libait nani ba sut sunu taki banhwan, baha purkara tawan uplika nani sin, dur nani bara walpa kutbanka ba sut sin sikbi sunu daukan.

³¹ Baha ningkara Juda wihtka nani ra wîri, tawan kutbanka purara ulbia, bara aiwanaia uplika nani dakni tara wâl sakri, baha purara wapi aiwani kaia. Daknika pas ba aihkika tani ra wapi kan, walpa kutbanka pura bâk, tawan wina Tâski Yakabaika getka tani ra.

³² Bara baha nani ninara Hosaías, Juda wihtka nani tarbaik aikuki auya kan, wibia kaka,

³³ Azarías wal, Esdras, Mesulam,

³⁴ Juda, Benjamín, Semaías bara Jirimaya.

³⁵ Bara prîs nani tila wina yula kahban trumpit nani puhbi: Sakaraya, Janatan luhpia waitna, ai damika nani ba Semaías kata, baku sin Matanías, Micaías, Zacur bara Asaf;

³⁶ baku sin ai muihni nani Semaías, Azarel, Milalai, Guilalai, Maai, Natanael, Juda bara Hananí, witin nani lika Gâd waitnika Debit mayunra daukaia dukia nani bri kan ba brih wan. Bara Esdras smasmalkra ba lika witin nani tâura wapi kan.

³⁷ Bara witin nani Lî Watla ra waia durka lama bâk wih Debit Tawanka mina mangka nani bâk uli banhwan, baha tawan kutbanka ulaika bâk, Debit Watla ba wina laih Lî Watla durka lalma tani kat wan.

³⁸ Bara dakni wala ba lika smihka tani ra auya kan. Bara yang lika baha ninara auna kapri, tawan uplika wala nani ba aikuki, tawan walpaya kutbanka pura bâk, utla purara pali paskanka ba, pauta mukaia watla bâra ba wina laih walpa paskanka tara pali ba kat;

³⁹ bara Efraín watla getka ra dimaia ba kaina wina, get almuk Jesaná dukia ba kat, baha wina Inska getka dimaika kat, Hananel tawerka bara Handat tawerka purara paskanka watla laih Sîp nani getka kat bal, bara Silak Watla getka kat takaski banhri.

⁴⁰ Baha ningkara, baha daknika wâlsut Gâd tempel kat wan, bara yang sin wihtka nani tila aikuki wari.

⁴¹ Bara prîs nani trumpit puhbi kan ba lika naha nani kata: Eliaquim, Maaseías, Minjamín, Micaías, Elioenai, Sakaraya, Hananías,

⁴² Maaseías, Semaías, Eleazar, Uzí, Johanán, Malquías, Elam bara Éser. Bara aiwawanra nani ba lika aiwani kan, bara Izraías witin nani tâ bri kan.

⁴³ Baha yua daiwan ailal pali iki angki Dawan ra yaban, upla nani ba ai lilia tara brih banhwan, Gâd ai liliaka tara upla nani ra yaban bamna. Mairin nani bara tuktan nani sut lilia pali takan, bara Jerusalem lilia dauki ba laih wina binka ba wali kan.

Prîs bara Libait nani hilpka

⁴⁴ Baha piua ra tila upla nani ba nina mâki bâk sakan kan, yuyaka nani auhbi swiaia watla, tempel ra bâra ba, plun mâ disang nani tâura sakan ba, matawalsip mânka nani bri bal ba pura kaikaia dukiara, waitna nani bâk sakan. Tawan uplika nani ai nasla wina plun saki bri balan nani ba baha plun watla ra auhbi kan, lâ ra ulban ba kat dauki kan, prîs bara Libait nani dukia. Juda uplika nani ai nasla wina bri bal kan, witin nani prîs bara Libait nani warkka dauki ba, ai âuyapah kan ba mita.

⁴⁵ Bara Gâd adarka ba kat witin nani daukan, baha purkara, saurka swih tikaia warkka ba sin pat daukan kata, baku sin aiwawanra nani ba, tempel dimaika ra aihwawakra nani ba sin baku daukan, Debit ai luhpia Salaman wal aisi daukan ba adarka kat.

⁴⁶ Kan Debit bara Asaf wal piua patitara ba wina, witin nani aiwawanra ba tâ bri kan lawana nani aiwanaia, mayunra nani dauki Gâd ra tingki wiaia dukiara.

⁴⁷ Baku bamna, Zorobabel bara Nihimaya wal yua nani ba wina, Israel luhpia nani sut mita plun nani yabi kan aiwawanra nani ra bara tempel durka aihwawakra nani ra sin, baha lika piua kat yaban, baku sin Libait nani ra yabi kan, bara Libait nani mita lika Eran luhpia nani ra yabaia kan ba yabi kan.