Matiu 13 - DAWAN BÎLA AISKA

Mamangkra maprika lilka ba

¹ Baha sim yua Jisas utla ba wina taki, lakun un ra iwan.

² Witin bâra kan ba tasbaya ra upla ailal asla takan bamna, Jisas duri kum ra aimaki iwan, bara uplika sut ba lika sauhka ra takaski banhwan.

³ Bara baha nani ra diara ailal maprika lilka nani wal smalki, naku wisata: “Mamangkra kum mangkaia taki wan;

⁴ bara mangki auya kan, mâ kum kum yabal ra kauhan, bamna daiwan tnawira nani bal, sut pin.

⁵ Saumuk kum kum walpa nani tilara kauhan, bahara tasba uya âpu kan; tasbaya ba tihu apia kan bamna, saumuk nani ba pat pali baiwi takan.

⁶ Sakuna lapta ba takan, sut aman, bara plamaika âpu kan ba ra, sut srawi luan.

⁷ Mâ wala nani kiaya nani tilara kauhan, bara kiaya nani ba pâwi, baha sut blaki ikan.

⁸ Sakuna wala nani lika tasba yamni ra kauhan, mâ sin pain sakan; kum kum mâ kum wina 100 mâ sakan, wala nani 60, bara wala nani 30.

⁹ Man nani kiamam walaia brisma kaka, wali bas.”

Maprika lilka nani tânka pali ba

¹⁰ Bara disaipil nani Jisas lamara wih, naku makabi walan: “¿Dîa kan upla nani ra maprika lilka nani ra man aisisma?”

¹¹ Witin bila: “Man nani ra lika Gâd mita kasbrika purara ba Kingka Lâka dahra yukukan nani ba param mamrikisa; sakuna witin nani ra lika apia.

¹² Kan ya diara bri ba, bâra kau yaban kabia, bara witin kau ailal bribia; sakuna ya diara âpu ba lika, wiria lupia bri ba sut dakbi brin kabia.

¹³ Baha mita sika yang maprika lilka nani wal witin nani ra aisisna; kan witin nani kaikisa, bara kaikras baku sa; walisa, kuna tânka briras sa, bara walras kan baku sa.

¹⁴ Baku, witin nani bâk prapit Aiseya aisin ba tânka aimakisa: ‘Dîa nahki prais walma sin tânka sip brima apia; dîa nahki prais kaikma sin sip kaikma apia.

¹⁵ Kan naha uplika nani lukanka na warwan sa, ai kiama ba praki brisa, bara ai nakra nani sin prakan sa, baku lika kaikbia apia bara walbia sin apia, bara sin tânka bribia apia, baku sin yang ra tawi balbiara bara yang sin rakamna apia.’

¹⁶ “Sakuna yamni pali sma man nani, kan namkra ni kaikisma, kiamam ni sin walisma bamna.

¹⁷ Kasak pali man nani ra mai wisna, man nani naha kaikisma na prapit ailal bara upla kasakkira sin ailal kaikan daukan, sakuna kaikras kata; naha walisma nani na walan daukan, sakuna walras kata.

Mamangkra maprika lilka tânka ba Jisas param smalkisa

¹⁸ “Bamna wali banhs, dîa pali aisaia want sa mâ mamangkra maprika lilka tânka ba.

¹⁹ Yabal ra saumuk nani kauhan ba lika, Gâd king aimaki ba lâka sturka yamni walan sakuna tânka briras nani ba baku sa; dibil ba aula, bara ai kupia ra sturi yamni mangkan kata ba, mihta dakbisa.

²⁰ Walpa nani tilara saumuk nani kauhan ba lika, upla nani sturi yamni ba wali, liliakira bri banhwi ba baku sa,

²¹ sakuna plamaika aitani tihu apia bamna, aihwa sip ban takaskras; bara sturi yamni ba tâwan trabil nani bara rausauhkan nani brisa piua ra, witin nani ba batakan sa.

²² Kiaya nani tilara saumuk mangkan ba lika, sturi yamni ba walan, sakuna naha tasbaya dukia nani ra lukan man, bara yuyaka nani mita kunin munisa. Naha sut mita sturi yamni ba blaki ikisa, bara naha uplika nani ra sip yan mâ sakras.

²³ Sakuna saumuk nani tasba yamni ra mangkan ba lika, sturi yamni walan bara tânka ba brisa, ba mita mâ sin pain sakisa, kum kum ba mâ kumi wina 100 sakan ba baku, wala nani 60 sakan ba baku, apia kaka 30 sakan ba baku.”

Inma saura plawar mâ tilara mangkan maprika lilka ba

²⁴ Naha maprika lilka wala na sin Jisas mita baha nani ra wisata: “Gâd king aimaki lâka ba waitna kum ai nasla ra saumuk yamni mangkan ba baku sa;

²⁵ sakuna sut yapi kan ba ra, insla dawanka waihla kum insla ra dimi, plawar mâ tilara inma saura mangki si, mahka wan.

²⁶ Plawar mâ ba pâwi ai wihta sin sakan ba ra, bahara inma saura ba sin pâwi takan.

²⁷ Bara wark tatakra nani ba ai kiaptinka ra wih win: ‘Dawan, ¿namsla ra saumuk yamni mangkram apia? ¿Bara inma saura ba ani wina takan?’

²⁸ Dawanka ba bila: ‘Wan waihla kum naha na daukan.’ Bara wark uplika nani ba mita makabi walan: ‘¿Man want sma yang nani wih inma saura nani ba daikamna?’

²⁹ Sakuna witin bila: ‘Apia, kan inma saura ba daikma ba ra, ban kra plawar mâ ba sin daikma.

³⁰ Swis wâlsut pâwbia dâkaia piua kat; bara baha piua ra, wark uplika nani blikrika inma saura ba pas daiki, karban nani dauki, angkbia, bara baha ningkara, plawar mâ ba lika pati watla ra sunbia.’ ”

Mostard mâ maprika lilka ba

³¹ Jisas mita maprika lilka wala na sin witin nani ra aisin: “Gâd king aimaki lâka ba waitna kum ai nasla ra mostard mâ kum mangki ba baku sa.

³² Naha mâ lika mâ nani sut tilara kau sirpi sa; sakuna pâwuya ba ra, dus nani sut tilara kau tara takisa. Dus tara bamna, daiwan tnawira nani pâli ba bal, dus tnawa nani ra ai watla nani mâkisa.”

Îs maprika lilka ba

³³ Naha maprika lilka wala na sin baha nani ra win: “Gâd king aimaki lâka ba îs wal baku sa. Baha ba mairin kum mita brih plawar paun yumhpa ra mangkisa, plawarka miks munan ba sut puskuya kat.”

¿Dîa kan Jisas maprika lilka nani aisi kan?

³⁴ Naha sut Jisas mita upla nani ra maprika lilka nani baman aisin, bara maprika lilka âpu baha nani ra diara kumi sin aisaras kan.

³⁵ Naha na baku prapit aisan ba bîla kat aimakbia dukiara sa: “Maprika lilka bâk aisamna; Gâd tasba na paskan piua wina diara nani yukuwan ra ba wimna.”

Plawar mâ tilara inma saura maprika lilka tânka ba Jisas param smalkisa

³⁶ Bamna Jisas mita upla nani mahka blikan wan, bara witin utla ra diman ba ra, ai disaipilka nani ai lamara bal, naku win: “Insla ra inma saura maprika lilka tânka ba wan wis.”

³⁷ Bara Jisas bila: “Saumuk yamni mamangkra lika Upla Luhpia Waitna ba,

³⁸ nasla ba lika naha tasbaya. Saumuk yamni ba king tasbaya uplika nani sa; inma saura ba dibil uplika nani,

³⁹ bara waihla inma saura mangkan ba lika dibil pali. Dâkaia piua ba lika tasba tnata, bara dâki uplika nani ba lika insal nani.

⁴⁰ Inma saura ba wahbi pauta ra lulki angki ba baku, tasba tnata ra sim baku kabia.

⁴¹ Upla Luhpia Waitna mita insal nani blîkbia bara witin nani mita Gâd king aimaki tasbaya ba wina, upla wala nani ra saura lâka ra bataki nani ba, bara saura dadaukra nani ba sut asla wahbia.

⁴² Baha nani pauta klauhi watla ra lulkbia, bara baha ra sika inan man kabia, ai napa nani sin arkbi kabia.

⁴³ Bara Gâd bîla wali dauki nani ba, ai Aisa king aimaki tasbaya ra lapta baku ingwan kabia. Man nani kiamam brisma kaka, wali banhs.

Diara manira yukukan maprika lilka ba

⁴⁴ “Gâd king aimaki lâka ba tasba kum ra diara manira yukukan ba baku sa. Baha ba upla kum sakisa, bara baha sim tasbaya ra yukukisa. Ai lilia bamna, ai dukia nani bri ba sut wauhi atki muni, baha tasbaya atkisa.

Walpa klauhira maprika lilka ba

⁴⁵ “Gâd king aimaki lâka ba diara âiatkra kum walpa manakira nani pliki ba baku sa,

⁴⁶ bara kumi kau mana pali ba witin sakuya ba ra, witin auya bara diara bri ba sut wauhi atki, bara baha walpaya kau manakira ba atki brisa.

Sîn maprika lilka ba

⁴⁷ “Gâd king aimaki lâka ba sîn kum kabu ra lulki, inska sât sât alki ba baku sa.

⁴⁸ Sîn ba banhki takan ba ra, inska âialkra nani ba sauhka ra uli, bahara iwi inska nani ba wahbisa; pain nani ba baskit nani ra auhbisa, saura nani ba lika lulkisa.

⁴⁹ Tasba tnata ra sim sât baku kabia: insal nani ba taki wih, upla saura nani ba pain nani wina sait ra sâkbia,

⁵⁰ bara saura nani ba pauta klauhi watla ra lulkbia, bara bahara sika inan kabia, ai napa nani sin arkbi kabia.”

Diara manira raya nani bara almuk nani ba

⁵¹ Bara Jisas mita witin nani ra makabi walan: —¿Man nani naha sut tânka brisma ki? Witin nani bila: —Âu, Dawan.

⁵² Baku bamna, Jisas bila: —Lâ Smasmalkra kum kasbrika purara ba kingka aimaki ba lâka tânka ba pain lan takuya ba ra, kiaptin kum baku sa; witinka ai yuyaka nani wina diara raya nani bara almuk nani sin sakaia ba pain kaikisa.

Jisas Nasaret ra sa

⁵³ Naha maprika lilka nani na aisi takaskan ba ra, Jisas baha wina mahka wan,

⁵⁴ bara witin ai tasbaya pali ra wata. Bahara prias watla ra mahka smalkan, bara upla nani tâ iwi, naku aisi kan: —¿Waitnika na sins lâka tara bri na, anira lan takan? ¿Sain aihka nani na, witin nahki daukisa ki?

⁵⁵ Kan naha lika kiamda ba luhpia, ai yaptika ba Meri. Jems, Josep, Saiman bara Judas kat witin muihnika nani sa,

⁵⁶ bara ai lakra nani sin nahara yawan tilara iwisa. Bamna, ¿ani wina naha tânka sut lan takan sa ki?

⁵⁷ Baha mita witin ra bîla walras munan. Sakuna Jisas witin nani ra win: —Plis sut ra prapit kum ra kulkisa, sakuna ai tasbaya pali ra bara ai watla uplika nani mita lika kulkras.

⁵⁸ Bamna bahara sain tara uya sip daukras kan, uplika nani ba witin ra kasak lukras kan bamna.