Matiu 11 - DAWAN BÎLA AISKA

¹ Jisas ai disaipilka 12 ra smalki luan ningkara, witin mahka wan baha tasbaya tawanka nani ra smalkaia.

Jan bui blikan uplika nani ba

² Jan silak watla ra kan ba ra, dîa dîa Kraist dauki kan ba walan. Bara ai disaipilka tila saki blikan wan baha kaikaia,

³ bara makabi walaia: “¿Kraist balaia ba man sma, apia kaka yang nani wala bîla kaikaia sna ki?”

⁴ Jisas mita pana baha nani ra win: “Man nani was, dîa dîa kaikisma bara walisma ba sut Jan ra wis.

⁵ Wis nahki kaikras nani kaiki ba, skahwa nani wapi ba, liparkira nani rakan sa, kiama prawan nani ba walaia sip sa, pruan nani ba kli bukan sa, bara umpira nani ra sturi yamni ba smalkan sa.

⁶ ¡Yamni pali sa ya yang dukira aihka lukras ba!”

⁷ Baha uplika nani mahka wan ba ra, Jisas Jan dukiara upla nani ra mahka aisi, win: “¿Man nani dîa kaikaia upla iwras tasbaya ra waram ki? ¿Yauhrus kum pâsa mita wauhi ba kaikaia waram?

⁸ Apia kaka, ¿man nani dîa kaikaia waram? ¿Waitna kum kwala pain dimi kan kaikaia watma? Man nani pain kaikisma kwala pain dimi uplika nani ba lika king nani watla ra iwisa.

⁹ Bamna, ¿dîa kaikaia watma? ¿Prapit kum? Âu, kasak, bara prapit ba wal witin kau purara sa.

¹⁰ Jan dukiara sika Ulbanka ra naku wi ba: ‘Yang naipakan kainamra blikuna, yabalkam ridi daukaia dukiara.’

¹¹ Kasak pali mai wisna, upla ailal naha tasba ra iwan ba tilara Jan ba kau tara sa; sakuna kasbrika purara Kingka lâka ra kau mâyara ba Jan purkara sa.

¹² “Jan Tatahbra balan wina naiwa yua kat, kasbrika purara ba King aimaki lâka ba pât wahwisa, bara upla nani mita ai karnika ni pura lui ai mihta ra briaia lukisa.

¹³ Prapit nani sut bara Moses lâka sin kasbrika purara ba king aimaki ba lâka dukiara aisin, Jan balan ba kat;

¹⁴ bara man nani baha ra kasak lukaia wilin sma kaka, Jan sika Ilayas prapit balaia kan ba.

¹⁵ Ya ai kiama bri ba, walbia.

¹⁶ “¿Naha piua uplika nani na dîa wal prakaia sip kamna ki? Witin nani lika tuktan lupia nani pulaia pliska nani ra iwi ai pânika lupia nani ra naku winbia:

¹⁷ ‘Yang nani bra puhbi maikri, kuna man nani lilia pulras; yang nani sari lawana aiwani maikri, sakuna man nani inras.’

¹⁸ Kan Jan balan, bara diara diras, plun sin uya piras, bara man nani wisma witin ba pirit saura kum brisa.

¹⁹ Baha ningkara, Upla Luhpia Waitna ba balan, witin plun pîsa diara sin dîsa, bara witin nani aisisa bîla maihsira bara diara dadira, Rom ra yaia lal mana wawahbra nani kulkanka saura bri uplika nani ba pânika. Sakuna Gâdka sinska lâka ba ai daukanka nani bâk latan marikisa.”

Bîla wali daukras tawanka nani ba

²⁰ Bara Jisas sain aihka ailal daukata tawanka nani ra lawi daukan, baha uplika nani kau ai kupia lakras kan bamna. Witin bila:

²¹ “¡Corazín tawanka, man mampara alai pali kabia! ¡Betsaida tawanka, man mampara sin alai pali kabia! Kan man nani tilamra sain aihka nani daukan baku Tiro bara Sidón tawanka ra sim baku daukan kaka, baha uplika nani pat ai kupia lakan kaia kan, bara latan marikaia kan sari kwalka dimi bara yamhpus sin aimaki.

²² Sakuna yang bui man nani ra mai wisna, lâ daukbia yua ra, Tiro bara Sidón uplika nani wal, man nani kau pât saura brima.

²³ Bara man, Kapernaum tawanka, ¿kasbrika purara ba kat mai sunan kabia lukisma? Man lika hil pauta tihuka kat mai lulkan kabia. Kan man nani tilamra sain aihka nani daukan baku Sodoma tawanka ra daukan kaka, baha tawanka naiwa kat ban bâra kaia kan.

²⁴ Sakuna mai wisna, lâ daukaia yua ra, Sodoma tawanka wal man nani kau pât tara brima.”

Man nani, yang ra bal riskam bris

²⁵ Baha piua ra, Jisas naku win: “Aisa, kasbrika purara ba bara tasba Dawanka, yang tingki mai wisna, kan sinskira nani ra bara diara lan nani ra naha dukia nani na yukukram, sakuna tuktan nani ra latan marikram.

²⁶ Âu, Aisa, kan man baku want kapram.

²⁷ “Yang Aisiki mita diara nani sut mihti ra mangkan sa. Upla kumi sin Luhpia ba pain pali kaikras, Aisa ba baman; bara Aisa ra upla kumi sin pain pali kaikras, Luhpia baman, bara ya ya Luhpia mita marikaia luki nani ba sin.

²⁸ Warkkam bara karbankam mita mai swapkan nani ba, sut yang ra bal bara yang mita maikamna ris briaia.

²⁹ Twilkaika puramra sunisna ba man nani bris, bara yang wina lan taks, kan yang lika praut âpu, kupi sin bawikira sna; baku lika man nani riskam brima.

³⁰ Kan twilkaiki ba swap sa, bara karbanki maikisna ba sin ingni sa.”