Mark 11 - DAWAN BÎLA AISKA

Jisas Jerusalem ra dimisa

¹ Bara witin nani Jerusalem lamara wan ba ra, Betfagé bara Betania tawanka lamara, Olivet ilka lamara, Jisas mita ai disaipilka wâl blikan,

² witin nani ra naku wisi: —Tawan mamwan kat ba ra was, bara wama piua ra biriku kum wilkan kaikma, kau upla ulras sa. Man nani lanhki bri bal.

³ Bara upla kum kra mamkabi walbia kaka dîa muni baha daukisma, man nani wis Dawan ba want sa bara ningkara kli blîkbia.

⁴ Witin nani wan bara biriku ba dur kum lamara wilkan kan kaikan, yabal latara, bara lanhkan.

⁵ Upla tila nani bâra kan ba mita win: —¿Man nani dîa daukisma? ¿Dîa kan biriku ba lanhkisma?

⁶ Bara witin nani bui Jisas win ba baku, baha nani ra win; bara ban witin nani ra swin wan.

⁷ Biriku ba Jisas ra brih wan ba ra, ai kwalka nani purara palkan Jisas baha purara ulan.

⁸ Upla ailal ai kwalka nani yabal ra palkan, wala nani dus tnawa nani klaki yabal ra palkan.

⁹ Tâura wapi kan nani ba, ninara wapi nani kan ba sin, mahka naku winan: —¡Mayunra! ¡Yamni pali sa, witinka Dawan nina bri aula ba!

¹⁰ ¡Yamni pali sa king aimaki lâka aula ba, wan aisika Debit king aimaki lâka ba! ¡Mayunra Gâd laih purara ba!

¹¹ Bara Jisas Jerusalem ra diman, tempel ra sin, bara diara nani sut kir kaiki, disaipil 12 ba kira Betania ra wan, pat tutni kan bamna.

Jisas kwah damni dusa ra lahtuban ba

¹² Yu wala titan, witin nani Betania wina takan, Jisas plun dauki kan.

¹³ Bara laih wina kwah damni dusa kum wahia man kan kaikan; mâ bri sapa kaikaia wan, sakuna wahia baman sakan, baha mâ briaia piua kau kan bamna.

¹⁴ Bara Jisas kwah dusa ra aisi, naku win: —¡Ban kaia ra, upla kumi sin man wina mâ pibia apia! Bara ai disaipilka nani baha walan.

Jisas tempel klin daukisa

¹⁵ Baha wina witin nani Jerusalem ra diman. Bara Jisas tempel ra dimi, upla nani diara atki, pana atki nani ra, mahka kangbi sakan. Upla lalah sins mamunra nani tibilka makupan, butku atki uplika nani iwaika nani sin;

¹⁶ bara upla kumi ra sin adar yaras tempel bâk diara twilki waia.

¹⁷ Bara witin nani ra smalki win: —Ulbanka nani ra naku wisa: ‘Yang waitla ba tasba aiska ra upla nani ai pura sunaia watla mâkan kabia’, sakuna man nani lika âimplikra watla daukram sa.

¹⁸ Prîs tara nani, Lâ Smasmalkra nani sin baha ba walan, bara witin nahki ikaia ba plikan, kan baha nani witin ra sibrin kan, upla sut ai smalkanka wali tâ iwan kan bamna.

¹⁹ Sakuna tihmia iwan ba ra, Jisas ai disaipilka nani aikuki tawan ba wina taki wan.

Kwah damni dusa ba lâwisa

²⁰ Yu wala titan witin nani luan bara kaikan, kwah dusa kata ba ai playka wina sut lâwan kan.

²¹ Ba kat Pita ai kupia krawan, bara Jisas ra win: —Smasmalkra, kaikram, kwah dusa lahtubatma ba pat lâwan sa.

²² Jisas witin nani ra win: —Man nani lika Gâd ra kasak lukan lâka bris.

²³ Kasak man nani ra mai wisna: Ya ya naha ilka ra ‘Naha wina taki kabu ra dimi was’ wibia kaka, ai kupia ra namhpa namhpa lukras, bara diara aisin ba kat kasak lukbia kaka, baku takan kabia.

²⁴ Baha mita mai wisna: Dîa dîa man nani pura sunra ra makama kaka, bara pat briram wisi kasak lukma kaka, baku takbia.

²⁵ Bara man nani puram sunisma ba ra, upla kum mapara diara brisma kaka, witin ra pâtka ban swih tiks, bara Aisikam kasbrika purara ba sin man nani saurkam nani swih tikbia.

²⁶ [Sakuna man nani ban swih tikras sma kaka, Aisikam kasbrika purara ba man nani saurkam nani swih tikbia apia.]

Jisas karnika ba

²⁷ Witin nani Jerusalem ra balan, bara Jisas tempel ra watauki kan, prîs tara nani, Lâ Smasmalkra nani bara wihta almuk nani sin ai lamara balan,

²⁸ bara witin ra makabi walan: —¿Dîa karnika ni man naha dukia nani daukisma ki? ¿Ya bui naha nani daukaia karnika maikan?

²⁹ Jisas witin nani ra win: —Yang sin man nani ra diara kum mamkabi walamna; pana ai wima kaka lika, yang dîa karnika ni naha dukia nani daukisna ba mai wimna.

³⁰ ¿Jan ba ya mita tahbi daukaia blikan ki, Gâd mita, apia kaka, upla nani mita? ¡Ai wis!

³¹ Bara pana pana mahka naku aisi blahwan: “Gâd mita blikan yawan wibia kaka, naku wan wibia: ‘¿Bamna, dîa kan witin ra kasak lukras katma?’

³² ¿Apia kaka, yawan upla nani mita blikan wibia?” Witin nani lika upla nani ra sibri luki kan, upla sut Jan ba Gâd prapitka kasak kulki kan bamna.

³³ Baku bamna, Jisas ra naku win: —¡Yang nani kaikras! Bara Jisas witin nani ra win: —Bamna yang sin dîa karnika ni naha dukia nani daukisna ba mai wimna apia.