Libait Lâka 27 - DAWAN BÎLA AISKA

Gâd ra yan dukia nani sunu kulkan ba

¹ Dawan ba Moses ra aisi, naku win:

² “Israel luhpia nani ra naku wis: Upla kum bui Dawan ra pramis daukan ba aibapaia want sa kaka, upla kum mana praiska ba aibapbia.

³ Waitna kum 20 mani wina 60 mani kat bri ba, mana ba silbar mâ 50 kulkbia, Dawan watla lalahka praiska kulki ba kulkanka ba kat;

⁴ mairin kum mana ba 30 silbar kulkbia.

⁵ Wala nani mani matsip wina 20 mani kat bri ba sip sa, uplika ba waitna kaka silbar 20 aibapaia, mairin sa kaka silbar matawalsip aibapaia.

⁶ Tuktan sirpi waitna mani kum wina kati matsip kat bri ba, silbar mâ matsip aibapaia; tuktan mairin ba silbar mâ yumhpa aibapbia.

⁷ Upla almuk waitna nani 60 mani bri ba silbar 15 aibapbia, mairin nani ba silbar matawalsip aibapbia.

⁸ Sakuna uplika ba umpira pali sa kaka ai pramiska aibapaia sip apia ba, prîs ra brih wabia, bara prîs ba witin wal aisi, bara nahki aibapaia praiska wala wibia, witin aibapaia sip ba praiska ba kat.

⁹ “Daiwan nani Dawan ra yaia brih aula ba sunu kulkan kabia, Dawan ra yan bamna.

¹⁰ Daiwra ba daiwan wala wal sins munaia apia, kau pain kau saura kabia sin. Sakuna daiwan nani pat Dawan ra yan ba, baha daiwra nani ba wal lika sins munaia sip sma.

¹¹ “Daiwan kum tâski kulkan ba baha sip Dawan ra yabia apia, daiwra ba prîs ra brih wan kabia,

¹² bara witin kaikbia prisantka ba briaia aitani kabia sapa, prîs ba dîa wibia ba baha aitani kulkan kabia;

¹³ daiwra dawanka ba kli atki sakaia wibia kaka, daiwra mana nahki prais kulkan ba purara kau mânka matsip pura praki atki bribia.

¹⁴ “Upla kum ai watla ba Dawan lâka ra sunu sakaia wibia kaka, prîs baha watla ba laki kaiki bara mana kum kulkbia, bara baha mana ba aitani kulkbia witin mangkan ba.

¹⁵ Bara baha watla dawanka ai watla atki sakaia sa kaka, diara praiska kulkan ba purara kau praki aibapi atki saki ai watla kli bribia.

¹⁶ “Upla kum ai tasbaya wina pîs kum Dawan ra yabisa kaka, tasbaya mana kulkaia ba baha tasbaya wina plun nahki prais saki ba praiska ba wal praki kulkbia, silbar mâ 50 ba barli mâ 220 litro kulkbia.

¹⁷ Tasbaya ba pri lâka daukan 50 mani man aimakuya ba wina mana ba kulkisa kaka, mana kulki ba aiska aibapaia sa;

¹⁸ sakuna ningkara tasbaya ba Dawan lâka ra sunu daukaia sa kaka, prîs ba baha praiska ba kulki kaikan kabia nahki prais mana yaia ba. Pat mani an luan ba kulkanka ba dakbi sâkbia, bâra kau mani an ai kainara aibapaia ba, baha wina mana ba kulkbia.

¹⁹ “Tasba ba Dawan ra yaban ningkara kli briaia sa kaka, kulkan ba wina kau pura aima matsip pura aibapbia, bara tasbaya ba ai dukia bribia;

²⁰ sakuna atki briras kabia sa kaka tasbaya ba upla wala ra atkan kabia, witin kli baha briaia apia sa.

²¹ Baha wina 50 mani alkbia ba ra, tasbaya ba Dawan dukia yabia, bara prîs ba baha bri kaiki kabia.

²² “Upla kum tasba kum witin ai tasbaya apia kan ba Dawan ra yan kaka, witin nani ai taya prapatika apia kaka,

²³ prîs ba baha tasbaya mana ba kulki kaikan kabia, kau mani an ningkara 50 mani alkuya ba, bara nahki aibapbia win kabia ba, baha yua witin sut aibapbia, bara tasbaya ba Dawan tasbaya takbia.

²⁴ Bara 50 mani ba alkbia kat tasbaya ba kli dawanka pali ba ra yabia, apia kaka baha kiamka nani ra yabia.

²⁵ “Diara mana bara praiska sut ba, tempel lalahka praiska kulki ba wal mana ba kulkaia sa, siclo kum ba 20 gera kulkaia.

²⁶ “Bara daiwan ai tawahkia baikan ba, Dawan dukia kabia, kan baha pas baikan bamna, upla kumi sin baha daiwra ba Dawan ra yabaia brih wabia apia, bîp luhpia kabia kra, sîp luhpia kabia kra, baha pas Dawan dukia sa.

²⁷ Daiwan kum tâski kulkan ba bri balbia kaka, praiska kulkan ba kat bribia, sakuna baha purara manka matsip kulkan ba sin aibapbia. Sakuna baha praiska pura prakan ba wal witin atki sakaia apia wibia kaka, dîa mana kulkan ba kat daiwra ba upla wala ra atkbia.

²⁸ “Upla nani diara bri ba Dawan ra yabi lâ kat dauki sunu kulkan ba, upla ai taya nani, ai daiwra, ai luhpia nani, ai taya nani tasbaya sapa, pat Dawan ra yan ba, baha kli sip sa atki bribia apia, diara sut Dawan mihta ra swin ba, sunukira pali kulkan sa, baha Dawan dukia.

²⁹ Upla kum pruaia pâtka ra lakan ba, baha sin kli atki pri sâkbia: win ba kat witin pruaia sa.

³⁰ “Tasba wina plun mâ nani sâkma ba, dus mâ nani sut ba Dawan dukia bamna 10 bani ba wina kumi ba, Dawan ra yama, baha kumika ba bâk sakan witin ai dukia.

³¹ Upla kum baha witin ai dukia bâk sakan ba briaia kaka, mana kulkan ba purara kau mânka matsip praki aibapi bribia.

³² “Daiwan matawalsip bani ba wina kumi ba Dawan dukia kulkan sa, bîp sapa, sîp sapa,

³³ sakuna kau painkira ba, apia kaka kau saura baku ba sin plikaia apia, wala kum mana sin sins munaia apia; ban sins munbia kaka sin, witin nani kumi sin kli atki briaia lâka âpu sa, kan pat Dawan ra yan bamna, sip atkbia apia.”

³⁴ Naha lâka nani na sika Dawan mita Moses ra yan ba Israel luhpia nani ra smalkaia lâka, Sainai ilka ra.