Libait Lâka 24 - DAWAN BÎLA AISKA

Lamp nani laya

¹ Dawan ba Moses ra aisi, naku win:

² “Israel luhpia nani ra wis, witin nani oliv batana laya kau pain ba bri balaia, lamp nani ba angki ingni ban bri kaia.

³ Eran baha lampka nani ba ridi dauki kabia, Dawan kaiki ba ra swibia tihmia aiska daskras ingni ba bâra ban kabia, tint watla ba bilara lâ nani auhbi swin ba watla lamara, kwala paman ba lamara upla nani ra ingni yabi kaia; naha lâka na man nani kulki ban kama yuam nani sut, luhpiam nani ra sin smalki kama.

⁴ Lampka nani ba lamp swiaika watlika ra swibia, gul pali ni paskan ba, Dawan kaiki bara angki swirka ingni bâra kabia.

Dawan ra yan britka ba

⁵ “Plawar kau pain ba wina 24 paun bris, bara brit 12 angks,

⁶ bara gul aihwa ni paskan tibilka, Dawan kaiki altarka lamara swin ba purara, britka nani ba lain wâl ra suni swibia, tnaya bani ra 6 brit.

⁷ Britka nani kumi bani ba purara kîa pain angkaia dukia nani ba mangkbia, wan kupia kraukaia prisantka dauki angki Dawan ra yabi ba baku.

⁸ Britka ba sabat bani baku Dawan kaiki ba ra bri balbia, naha lâ kum piu bani Israel baku dauki ban kaia lâka ba.

⁹ Prisantka ba yaban ningkara britka ba Eran bribia, kiamka nani ba sin, bara holi daukan pliska kum ra wabia, bara baha witin nani pibia. Baha sika Dawan ra yaban pata kau sunu pali daukan ba.”

Gâd mapara ba mita klala brin

^10-11 Waitna kum bâra kan, yaptika ba Israel mairka, papika ba Idsip waitnika kan. Yaptika ba nina Selomit, Selomit ba Dibrí luhpia bara Dan kiamka wina. Baha waitna ba Israel kum wal tint watla ra blahwan kum brin, baha piua ra Selomit luhpia ba Dawan nina ba brih saura aisin. Bara waitnika ba Moses ra brih wan,

¹² bahara aihwaki kaiki kan, Dawan bui witin nani ra dîa daukaia wibia ba daukaia.

¹³ Dawan bui Moses ra aisin, bara win:

¹⁴ “Yang ra saura ai win waitnika ba kiamp wina sâks, bara ya baha sturka walan nani ba sut ai mihta waitnika lal purara kahbia bara tawan uplika nani sut bal walpa ni sabi ikbia.

^15-16 Bara Israel luhpia nani ra wis: Ya Dawan nina ra aisi saura wibia, swira daukbia, witin ai saurka pâtka ba twilkbia upla sut bal witin ba walpa ni sabi ikbia. Tringsar kabia, apia kaka tawan luhpia kabia, Dawan nina ra saura aisi ba mita pruaia pâtka ba bribia.

¹⁷ “Bara ya upla kum ikbia kaka, witin ba ikan kabia.

¹⁸ “Upla kum upla wala daiwra ikbia kaka, ikan ba mana pana daiwan wala kum yan kabia.

¹⁹ “Upla kum bui upla wala ra saura kum munbia kaka, saura munan saurka ba ni pana witin ra munbia.

²⁰ Dusa krikan kaka pana dusa krikaia, nakra baikan kaka pana sin baikaia, napa krikan kaka pana krikaia; witin sin ai wîna ra baha latwanka ba wauhbia, daukan ba baku.

²¹ “Upla daiwra kum ikbia kaka, wala kum kli yan kabia. Waitna kum ikbia kaka, pâtkira kulki ikan kabia.

²² “Naha lâka na, upla sut mapara sa baku daukaia, tringsar nani, tawan luhpia nani sin. Yang sika man nani Dawan Gâdkam.”

²³ Bara Moses naha lâka Israel luhpia nani aikuki aisin; bara upla nani ba wih baha waitnika Dawan mapara saura aisin ba tint watla wina sakan, bara witin nani waitnika ba ikan. Dawan bui Moses ra dîa win ba kat daukan.