Libait Lâka 22 - DAWAN BÎLA AISKA

Aikuki Dawan ra prisant nani yabi kaia

¹ Dawan ba Moses ra aisi, naku win:

² “Eran ra bara ai kiamka nani ra sin wis, Israel luhpia nani yang ra diara aikaia brih aula ba, witin nani aman kaiki kaia sa, yang nini sunu ba sauhkaia apia tâwan. Yang sika Dawan.

³ “Wis nanara wina ai kainara naha kaiki kabia, ai kiamka wina kum tâski sa kaka, bara Israel luhpia nani prisantka sunu brih aula ba brih ban Dawan mawanra bubia kaka, Dawan mawan wina klaki sakan kabia. Yang sika Dawan.

⁴ “Eran kiamka nani kum lipar brisa kaka, siknis sâtka wala sin, witin diara holi nani ba pibia apia, klin takbia ba kat. “Upla pruan dukia tâski nani kum ra ya kangbia kaka, apia kaka likia bri uplika kangbia kaka,

⁵ piuta pruan ra kangban kaka, tâski kulkan kabia. Bara upla kum tâski sa bara wala witin ra kangban sa kaka, witin sin tâski takisa.

⁶ Baha uplika ba tâski kulkan sa tihmia kat. Plun nani pat Dawan ra yan sunu ba wina pibia apia, witin ai mihta sikbi aihtabia ba kat.

⁷ Yu dimbia ba kat sunu takan kabia, baha ningkara sip sa plun nani sunu daukan ba piaia.

⁸ Daiwan mita daiwan wala ikan wîna ba pibia apia, baha tâka witin tâski takaia apia sa. Yang sika Dawan.

⁹ “Wis yang aisari ba prîs nani sut baku daukbia. Bîli walras diara dauki ai purara saurka wirhika kahbiara, bara witin nani prubia apia. Yang sika ai Dawanka, witin nani sunu daukri sa.

¹⁰ “Plun nani prisantka bri balan ba, upla wala kumi sin baha wina pibia apia. “Prîs wal wark taki ba sin apia, prîs ba watla takaski ra sin piaia apia.

¹¹ “Prîs ba ai lalahka ni alba kum atkbia kaka lika, albika ba baha pata holi ba wina pibia. Baku sin prîs watla ra aisuban kaka lika, baha pata wina piaia sa.

¹² “Prîs luhpia mairin ba upla taika wala wal marit takbia kaka, baha pata prisantka prîs ra yan ba wina witin piaia apia sa.

¹³ Sakuna witin ba piarka takbia, maya swibia kaka, luhpias kaka lika, kli ai papika watla ra aula ba ra ai papika pata ba piaia sip kabia.

¹⁴ “Ya ya prîs taika apia ba, ai dara walras prîs ra yan pata pibia kaka, witin baha mana aibapbia prîs ra. Bara kau mânka matsip pura praki aibapbia;

¹⁵ sakuna prîs nani ba, ban aitani kulkan lâka yabia apia, Israel luhpia nani baha pata nani Dawan ra yan ba wal pulaia, baku Dawan nina ba bahki kulkaia daukisa.

¹⁶ Baha pata piaia uplika nani ba swika ban pibia, bara pâtka ba witin nani twilkaia. Yang sika ai Dawanka, witin nani sunu daukri sa.”

Daiwan yabaia lâka nani ba

¹⁷ Dawan ba Moses ra aisi, naku win:

¹⁸ “Eran ra, luhpia nani ra bara Israel luhpia nani sut ra sin aisas, bara naku wis: Israel uplika kum, apia kaka tringsar kum man nani tilamra iwisa kaka, daiwan kum prisant yabia, aiska angkaia sakripaiska daukaia balbia, ban kra pramis kum daukaia apia kaka, prisant kum Dawan ra yabaia sa kaka,

¹⁹ daiwan wîna pain bara wainhka sa kaka Dawan ra bri balan kabia, baha aitani kulkan daiwra ba, bîp kum, sîp kum, guts kum,

²⁰ sakuna daiwan kum skahwa lika apia, baku kaka bribia apia.

²¹ “Ani uplika Dawan wal kli ai uplika takaia sakripaiska daukaia brih aula kaka, pramis kum taki aisin ba kat daukaia sa, apia kra prisant kum yabaia brih aula kaka, bîp wainhka nani, sîp nani, skahwa apia, watawan âpu ba bri balaia sa, aitani kulkan kaia mata.

²² Dawan ra daiwan blain bri sal yapara, yamni apia ba, skahwa, suskira, puskan ba, bara yarka altar ra angkaia.

²³ Prisantkam man kupiam lâka bîp kum sîp mina ba skahwa kabia kaka, yang brimna apia.

²⁴ Baku sin daiwan kum Dawan ra yabaia bri balaia sma ba insauhkan, prukan, klakan sa kaka, baha sât sakripaiska naha tasbaya ra daukpara.

²⁵ Baku sin tringsar nani tilamra ba wina sin baha sât daiwra piaia maikbia sa kaka, bripara, baha saura, bara baku aitani kulkamna apia.”

Daiwan nani ikaia bri balan lâka

²⁶ Dawan ba Moses ra aisi, naku win:

²⁷ “Bîp luhpia kum kra, sîp luhpia kum, apia kra guts luhpia kum kra aisubia bara yu 7 alkbia ba ra yu 8 alkbia ra sip sa iki sakripais daukan kaia, Dawan ra yabaia.

²⁸ “Daiwra nani ba taim kumi ra sut ikpara.

²⁹ “Prisant kum Dawan ra tingki wiaia brih balan ba ra, naku dauks, baha ba yamni briaia mata.

³⁰ Baku bamna, plun ba sin sut piaia, yauhka dukia swiaia apia. Yang sika Dawan.

³¹ “Yang lâika nani ba alki dauki bas, dîa daukaia wîri ba sut dauks. Yang sika Dawan.

³² “Nini holikira ba sauhkpara, baku Israel luhpia nani tilara holi ai kulkan kabia. Yang sika Dawankam, man nani holikira mai sakri ba.

³³ Idsip wina mai sakri yang na man nani Gâdkam kaia dukiara. Yang sika Dawan.”