Libait Lâka 18 - DAWAN BÎLA AISKA

Mairin briaia lâka ba

¹ Dawan ba Moses ra aisi, naku win:

² “Israel luhpia nani ra naku wis: “Yang sika man nani Dawan Gâdkam.

³ “Man nani Idsip uplika nani tilara iwi kapram ba, baha kuntrika uplika nani lâka ba nina blîkpara. “Kenan uplika nani daukanka ba nina sin blîkpara, bahara mai brih wamna tasbaya ra, witin nani lâka natka ra man nani iwma apia.

⁴ “Yang dîa mai wisna ba dauks, yang bui lâ maikri ba alki dauks bara baha wal iwi bas. Yang sika man nani Dawan Gâdkam.

⁵ “Lâ nani maikri lâka nani ba alki dauki bas, ani uplika lâika nani alki daukbia ba, raya kabia. Yang sika Dawan.

⁶ “Waitna kum sin ai taya mairin ba, ai mairka bribia apia. Yang sika Dawan.

⁷ “Mamikam wal prawi rug lâka daukpara, bara baku papikam ba bahki kulkpara; baha purkara mamikam ba man yaptikam sa, bamna baku daukaia apia sma.

⁸ “Papikam mairka ba yapi, witin ra bahki kulkpara.

⁹ “Lamkra wal yappara, papikam luhpia, apia kaka mamikam luhpia sapa, wamtla ra pâwan sapa, wamtla ra pâwras sapa, sakuna witin wal yapaia apia sma.

¹⁰ “Man mulam, luhpiam waitna, apia kaka luhpiam mairin luhpia ba yapi, man silp swiram takpara. Man bui witin ba yapaia apia sma.

¹¹ “Papikam mairin wala ra luhpa baikan mairka ba bripara, baha sin papikam luhpia bara man lamkra sa. Witin wal yapaia apia sma.

¹² “Papikam lakrika ba yappara, kan papikam tâlia brisa bamna.

¹³ “Yaptikam muihnika sin yappara, kan yaptikam tâlia brisa bamna.

¹⁴ “Tahtikam bahki kulkpara witin maya ba wal yapi muni, kan witin sika man antikam.

¹⁵ “Luhpiam waitna maya ba yappara, kan witin ba luhpiam waitna maya; witin lika man wal saura daukaia apia sa.

¹⁶ “Man muihkam maya ba yapi witin ra bahki kulkpara, kan witin ba man mamsaya sa.

¹⁷ “Mairin kum ra yapi, kli luhpia tiara ba sin, mulika sin yappara, luhpia waitna luhpia ba, luhpia mairin luhpia ba sin apia, witin nani sut wal tamya sa bamna. Baha nani yapaia ba watawi lâka sa.

¹⁸ “Mamsaya ba mairkam bripara, wal sin yappara mayam kau raya ba ra, wal waihla daukaia apia mata.

¹⁹ “Mairin kum kati siknis bri ba piua ra, wal yappara.

²⁰ “Uplikam maya ba yappara, baha tawan tâski mai kulkbiara.

²¹ “Luhpiam nani kumi sin gâd Moloc ra prisant baku yapara. Baku dauki Gâdkam nina ba sauhkpara. Yang sika Dawan.

²² “Waitna tamhkia ra yappara, man mairin kum wal yapisma baku. Baha sika nina sauhkaia lâka saurka kau tara ba.

²³ “Daiwan nani wal yappara, baha dauki man tâski takma. Mairin sin daiwan nani wal yapaia apia, baha sika nina sauhkaia lâka saurka kau tara ba.

²⁴ “Baha nani kumi wal sin tâski takaia apia sma, upla wala nani ba sika baku tâski takan, baha mita witin nani ba man nani tilam wina saki lulkamna.

²⁵ Tawanka nani ba sut tâski sa, baha mita yang bui witin lâka daukri bara tawan bîla wina upla nani ba sait ra saki lulkan.

²⁶ Sakuna man nani Israel luhpia nani, tringsar nani man nani tilamra iwi banhwi ba sut, yang lâ maikri ba daukaia sma, naha daukanka saura ba kumi wal tâski takpara,

²⁷ kan baha sât saurka nani daukisa naha tawanka ra iwi uplika nani ba, bara tasbaya ba sin tâski pali daukan sa.

²⁸ Man nani sin daukankam ba mita naha tasbaya wina mai saki mai lulkbia, kainamra iwi kan nani saki lulkan ba baku.

²⁹ Ya baha saurka daukbia ba, ikan kaia sa, tawanka ba wina sin sakan kabia.

³⁰ Bamna lâika nani ba alki lan taks bara saurka ra kauhpara, wala nani kainamra kauhan ba baku, witin nani wal sin tâski takpara. Yang sika man nani Dawan Gâdkam.”