Libait Lâka 17 - DAWAN BÎLA AISKA

Sunu kulkan watla ba kumi baman sa

¹ Dawan ba Moses ra aisi, naku win:

² “Man bui Eran ra bara ai luhpia nani ra sin wis, Israel luhpia nani sut ra sin, Dawan naha adarka nani na mangkisa:

³ “Israel luhpia nani kum kra, bîp wainhka kum, sîp kum, guts kum kra ikbia kaka, tawan bilara, apia kaka latara,

⁴ baha daiwra ba Dawan wal aisaia tintka watla ra brih waras ba prisantka kum yabaia tempel ra, witin baha tâlia laikan ba mana pâtkira kulkan kabia, baha tâwan witin ba upla nani tila wina mawan ba tikbia.

⁵ Naha lâka tânka na sika, Israel luhpia nani ai daiwra nani plis wala ra iki kan ba. Nanara baha nani sut Dawan wal aisaia tintka watla lamara bri sal iki kaia sa. Nanara daiwan nani ba witin nani prîs ra bri balaia sa, bara prîs ba mita kli wal upliki takaia sakripaiska dauki kabia.

⁶ Prîs ba mita tala ba Dawan altarka tint watla dimaika ra srikban kabia, daiwan batanka ba sin, kîa pain Dawan kiawali ba sin angkbia.

⁷ Naiwa wina Israel luhpia nani ba kli ai daiwra nani ba, lasa nani ra yabi sakripais daukbia apia, baha nani ra witin nani mayuni ba saura takan uplika nani sa mita. Naha lâka man nani baku dauki ban kama, aisika nani mita luhpiam nani ra sin smalki ban kama.

⁸ “Witin nani ra sin wis, Israel uplika wala nani ba bara upla tringsar nani wal ai tilara iwi ba, baha nani sut daiwan aiska angkaia sakripaiska daukaia sakripais wala nani sin,

⁹ Gâd wal aisaia tintka watla ra baman brih wabia, Dawan ra prisantka yabia, baku daukras sa kaka, uplika ba upla wala nani tila wina sakan kabia.

Tala ba piaia apia win

¹⁰ “Israel luhpia nani, tringsar nani sin sut tala pisma kaka, yang lika man nani mampara kamna. Nahki natka ra kabia, yang mita baha uplika ba upla nani tila ba wina sakamna.

¹¹ Ai rayaka bri nani ba sut, tala bri ba mita raya sa. Baha mita yang bui man nani ra mai wîri, tala ba ni baman altarki purara laiki upla saurka nani dauki ba pura mana aibapaia, kan tala ba sika upla rayaka mana aibapi ba.

¹² “Baha mita, Israel luhpia nani ra mai wisna: Man nani kumi sin bara tringsar nani tilamra bâra ba sin, tala ba piaia apia sa.

¹³ Israel luhpia nani, man nani kum kra, apia kaka tringsar kum, daiwan wail kum, apia kaka tnawira kum piaia ikma kaka, piaia sip sma, sakuna tala sut wîna ra ba sakaia bara tasba ra bikaia sma,

¹⁴ kan tala ba sika baha nani sut ba rayaka yabisa, baha mita pima. Yang mai wisna man nani tala pipara, kan tala ba mita baha nani sut ra rayaka yabisa, ya pima ba mai ikan kabia.

¹⁵ “Israel uplika kum kra, tringsar nani ba kum kra daiwan pruan kan saki pibia kaka, daiwan wail mita ikan ba pibia kaka, witin ai kwalka ba tuskan kabia, witin sin aihtabi takbia bara ban tâski kulkan kabia tihmia kat. Ningkara sunu takan kabia.

¹⁶ Sakuna witin mita ai wîna tara aiska ba klin daukras kabia kaka, ai kwalka nani sin tuskras kabia kaka, baha watawika lâka mana ba witin twilkbia.”