Libait Lâka 14 - DAWAN BÎLA AISKA

Liparkira nani klin sakaia lâka

¹ Dawan ba Moses ra aisi, naku win:

² “Naha lâka nani na sika lipar alkan ba klin sakaia lâka nani: Sikniskira ba prîs ra brih wan kabia,

³ tawan wina latara saki, bahara sikniska ba laki kaikbia. Prîs ba kaikbia lipar sikniska alkan ba pat rawan sa kaka,

⁴ uplika ba klin takaia prisantka tnawira klin wâl, yalam dusa pîs kum, kwala pauni bara hisop sin brih balbia.

⁵ Bara prîs ba bal wibia, lî kârma wina panhkan laya ba sumi kum ra laikbia, bara baha purara tnawira kum ba ikbia,

⁶ yalam dusa ba, kwala pauni ba, hisop ba sin. Bara tnawira raya ba sin bribia, bara tnawira pruan ba tâlia ra, baha nani sut ba buskbia, sumi laya ba ra;

⁷ bara baha tâlia ba ni uplika ba ra 7 taim srikban kabia, lipar ba wina klin takaia, bara wibia witin ba klin sa. Tnawira raya ba lika, swika wabia.

⁸ “Klin takan uplika ba ai prâka ba witin tuskaia sa. Ai unmaya sin irbaia sa, baku klin pali takbia. Baha ningkara kau wik kum pâsa dih tauki si bara tawan ba ra dimaia sip sa.

⁹ Bara kli yu 7 alkbia ba ra, witin ai tâwa ba sut, ai unmaya ba, ai nakra tamaya ba, ai tamaya wala ba sut irbaia sa; ai kwalka sin tuskan kabia, baku klin sunu takan kabia.

¹⁰ Bara yu 8 alkbia ba ra, sîp wainhka wâl bri balbia taya sauhkan âpu ba, sîp mairin sin kum taya sauhkan âpu, mani kum alkan ba. Baha purara plawar kau pain ba 5 paun oliv batanka ra akbaia, bara oliv batana ba batil kum.

¹¹ Baha prîs mita sunu lâka warkka daukaia ba sunu takaia uplika ra wibia ba, diara nani bri ba sut, Dawan wal aisaia Tintka dimaika ra bri balbia wibia Dawan kaiki ba ra.

¹² Prîs ba, sîp wainhka ba kum bribia, batana laya sin batil bakriki bribia, bara saurka daukan sakripaiska daukbia, lilia lâka daukbia Dawan kaiki ba ra.

¹³ Daiwan ikaia pliska ba ra sîpka ba ikan kabia, prîs ba holi takaia ba mata, saurka daukan mana sakripaiska ba. Baha angkaia pliska ra aiska angkbia, pâtkira sakripaiska, saurka daukan mana sakripaiska dauki ba baku, naha sin daukbia, baha ba holikira pali kulkan bamna.

¹⁴ “Baha ningkara prîs ba tala ba wina wirâ brih, pâtkira ba klin daukbia, kiama smihka tani ba, mihta wihtka tara aihkika ra bara mina wihtka tara aihkika ra yuki muni.

¹⁵ Batana laya wina sin wirâ ai mihta ra brih uplika mihta aihkika bîla ba ra buskan kabia,

¹⁶ mihta wihtka ba ra sin buskan kabia, bara mihta wihtka ba ni aima 7 srikban kabia Dawan kaiki ba ra.

¹⁷ Batana laya ai mihta ra bri ba bara tala sin, baha nani wal uplika ba kiama playa aihkika ra, mihta aihkika wihtka ra, mina wihtka tara ba sin yûkbia, bara tâski âpu sunu daukan kabia.

¹⁸ Bara batana laya kau bâra ba ni, uplika lal ba ra buskan kabia, klin sakaia dukiara. Baku prîs ba uplika pâtka ba swih tikaia lâka ba, Dawan wina bribia.

¹⁹ Baha ningkara prîs ba sakripais wala ba daukbia, saura daukan mana ba yaia. Warkka daukan ba ningkara, daiwan aiska angkaia sakripaiska ba daukbia.

²⁰ Altar purara angkbia, dus mâ nani prisantka ba sin brih balbia. Baku prîs ba witin pâtka swih tikaia lâka ba bribia, uplika ba sin klin takan lâka brin kabia.

²¹ “Ban kra uplika siknis ba hilpkas sa kaka, diara ailal yaia âpu sa kaka, sîp kum bri balbia, prisant kum sakripaiska baku kulkan kabia, baku saurka pâtka ba swin tikan kabia. Baha purara plawar kau pain ba paun wâl oliv batana ra akbia, dus mâ prisantka nani ba bara oliv batana sin batil kum bri balbia.

²² Butku sirpi wâl, apia kaka butku kau tara wâl, dîa sip ba kat bri balbia, kumi ba saurka daukan sakripaiska mana, wala ba aiska angkaia.

²³ Sakuna yu 8 alkbia ra, baha dukia nani ba sut brih prîs ra wabia, witin klin takaia, Dawan wal aisaia tintka watla ra, Dawan kaiki ba kat dukia sut prîs ra yabia.

²⁴ Prîs baha bribia bara saurka mana sakripaiska sîpka ba sin bribia, oliv batana laya batil kum ba sin, bara Dawan kaiki ba ra baha prisantka ba yabia;

²⁵ sîpka skiru ni ikan kabia, saurka mana sakripaiska ba daukaia. Tâlia ba wirâ brih, klin taki ba uplika ra yukan kabia kiama playa aihkika ba ra.

²⁶ Baha ningkara prîs ba ai mihta smihka ra batana wirâ laikbia,

²⁷ bara ai mihta wihtka aihkika ba ni, batana bri ba wina 7 taim srikban kabia, altar Dawan lamara witin kaiki ba ra.

²⁸ Baku sin batana laya ba ni, kiama playa aihkika ra wirâ buskbia, mina wihtka aihkika ra sin. Tala ni buskan pliska ba kat batana laya ba sin buskbia,

²⁹ bara batana laya kau bâra ba ni, klin taki ba lal ra yûkbia, bara baku Dawan wina pâtka swin tikan lâka briaia.

³⁰ Baha ningkara prîs ba butku sirpi ba, apia kaka butku tara ba kum bribia, uplika ba dîa yabaia sip kan ba, baha brih sakripais daukbia, witin sunu klin takaia.

³¹ Tnawira kum ba saurka mana sakripaiska kabia, wala ba aiska angkaia kabia, dus mâ nani prisant ba sin. Baku lika prîs ba, Dawan wina uplika ba pâtka swin tikan lâka brin kabia.”

³² Baha lâka nani ba sika lipar sikniska bri uplika prisant yaia lâka ba, hilpkas sip diara tara yaras ba klin takaia dukiara.

Lipar uplika watla ba klin daukaia lâka

³³ Dawan bui Moses bara Eran ra aisi, naku win:

³⁴ “Man nani Kenan ra tasba maikaia wîri ba tasbaya ra, yang lipar sikniska blikamna, bahara iwi uplika tawanka nani ra.

³⁵ Bara utla dawanka ba prîs ra wabia bara wibia: ‘Yang kaikisna waitla ra lipar sikniska bâra sa.’

³⁶ “Prîs ba kau waras ba kainara wibia, watla ba wina diara sut sâkbia, apia kaka diara nani bâra ba sut tâski kulkan kabia. Baha ningkara prîs ba dimi sikniska ba laki kaikbia, watla bulni takan ba sin.

³⁷ “Witin watla ba laki kaikbia, bara utla tnaya ba sut bulni takan, mapla sangni, pauni takan, tat ba yula pin kaka,

³⁸ latara taki bara wibia, watla ba yu 7 praki swibia.

³⁹ Bara wik kum ningkara kli wih laki kaikbia, bara sikniska yula ba kau pîsa kaka,

⁴⁰ prîs ba wibia, baha walpaya nani ba latara sâkbia, bara tawan ba wina saki laihura plis kum tâski ba ra lulki swibia;

⁴¹ bara wibia watla bîla ba kusbi sâkbia, bara kusban yuyaka sut ba tawan wina laihura bri si tâski pliska ra lulkbia.

⁴² Bara walpa wala raya nani bribia ba ra, walpa sakan ba watlika ra mangkaia, bara slaubla sin raya bribia walpa ba prakaia.

⁴³ “Sakuna watla ba kli bulni takbia sa kaka, walpa raya mangki watla ba wisbi sakan ba ningkara,

⁴⁴ prîs ba kli dimi laki kaikbia. Kaikbia bara sikniska ba utla ba ra sa kaka, param wibia watla ba tâski sa.

⁴⁵ Bara watla ba slingbi, bara tawan ba wina saki laihura bri si lulki swibia plis tâski kum ra.

⁴⁶ Prîs mita wih baha watla prakan kabia ba watla ra dimbia kaka, tâski kulkan kabia ban tihmia kat.

⁴⁷ Ya baha watla ra plun pibia bara yapbia kaka, ai kwalka ba tuskan kabia klin takaia mata.

⁴⁸ “Prîs ba utla ba ra dimi laki kaikbia lipar siknis ba ban bâra sa sapa. Siknis ba kau tâura waras kaka, prîs ba wibia utla ba klin sa, sikniska ba pruan.

⁴⁹ Utla ba sunu klin daukaia dukiara tnawira wâl, yalam dusa pîs kum, kwala pauni pîs kum, hisop sin brih balbia.

⁵⁰ Lî, kârma wina lî panhkan laya ba sumi kum ra laikbia, bara baha purara tnawira kum ba ikbia.

⁵¹ Ningkara yalam dusa ba, hisop ba, kwala pauni ba, tnawira raya ba sut bahara buskan kabia, tnawira pruan ba tâlia bara baha laya ba wal watla ba 7 taim srikbia.

⁵² Bara baku baha watla ba klin daukan kabia tnawira tâlia ba ni, lî kârma wina panhkan laya ba ni, yalam dusa, kwala pauni, hisop ba ni sin.

⁵³ Baha sut daukbia ningkara, tnawira raya ba pri swin kabia, tawan ra swika latara wabia. Bara baku dîa win ba kat daukan kabia, utla klin daukaia lâka ba kat.”

⁵⁴ Naha sika lipar sikniska mita upla taya sukwi, utla bulni taki ba klin daukaia lâka nani ba.

⁵⁵ Lipar sikniska kwala bara utla nani ra alkan ba,

⁵⁶ sukwan nani, puskan, laya plapi, tâski taki ba,

⁵⁷ baha wina kaikaia sip sa, sunu bara tâski ba baku tânka wibia. Lipar sikniska dukiara smalkanka ba naha kat sa.