Libait Lâka 12 - DAWAN BÎLA AISKA

Mairin ba tuktan sakan ningkara klin takaia ba

¹ Dawan ba Moses ra aisi, naku win:

² “Israel luhpia nani ra naha na wis: Mairin kum ba kwihra tiwan ba ra, ai luhpia waitna kum baikbia bara yu 7 tâski kulkan kabia, kati sikniska bri ba baku.

³ Tuktan aisuban ba wina yu 8 alkbia ba ra, Aisa sainka daukbia.

⁴ Sakuna yaptika ba lika kau ban klin taki kabia, ai tâlia plapi ba wina yu 33 kat. Diara sunu daukan dukia nani tempel ra ba, kumi sin witin kangbaia apia sa, tint ra sin dimaia apia sa, Dawan wal aisaia, ai piua win ba alkbia kat.

⁵ Sakuna ai luhpia mairin bribia kaka, wik wâl tâski kulkan kabia, kati sikniska bri ba baku, kau klin taki kabia yu 66 alkbia ba kat.

⁶ “Klin takaia piua win ba aimakbia kat, luhpia ba waitna kabia, apia kaka mairin kabia sin, yaptika ba mita sâkbia. Sîp lupia mani kum alkan ba, ai prisantka aiska angkbia, bara butku luhpia kum, apia kaka butku talia lupia ba kum brih, Dawan wal aisaia tintka watla ra wabia. Baha sut prîs ra yabia, saurka wina klin takaia sakripaiska daukaia,

⁷ bara prîs ba, baha nani ba Dawan mawanra angki, mairka pâtka ba swi tikaia makabia. Bara baku witin ba klin takan kabia ai tâlia taki ba wina.” Naha sika tuktan waitna nani bara tuktan mairin nani aisubi taki ba dukiara.

⁸ Yaptika ba sîp lupia sip atkras kabia kaka, butku talia lupia ba wâl bribia, apia kaka butku luhpia wâl, kumi ba aiska angkaia prisantka daukaia, bara wala ba saurka swih tikaia sakripaiska ba daukaia. Bara baku prîs ba witin pâtka ba swih tikaia makabia, bara baku witin klin takan kabia.