Lawana Nani 144 - DAWAN BÎLA AISKA

LAWANA 144 (143) King kum Dawan ra tingki wisa

Debit lawana.

¹ ¡Dawan ba yamni pali kabia, witin kaini kakahbra sa bamna! Witin mita sika ai smalkisa bara ridi ai daukisa war aiklabaia;

² witin sika upliki kasak ba, yang kaini kahbaika ba, yukuwaiki kau purara ba, pri ai sasakra; kaini kahbaika sa, witin ra sin yukuwaiki brisni; witin upliki banhwi ba, karnika mununhtara mangkisa.

³ Dawan, ¿upla ba dîa sa, man bui witin dukiara luki kaia? ¿Dîa kan man upla ra latwan sma, upla ba dîa?

⁴ Upla ba wan wingka puhbra kumi baku sa; upla raya ba dista kumi baku lui auya sa.

⁵ Dawan, kasbrika purara durka kwalka nani ba, saki bal iws; il nani ba mihtam kangs, bara kiasma takbia;

⁶ trisbaikam nani lulks, imyula takbia, bara waihlam nani ba tanis man plapi tiwbia.

⁷ Pura pali ba wina mihtam sakbi bris, bara kabu tihuka ba wina dakbi ai sâks; karnikam ni dakbi ai sâks, upla tringsar nani mihta wina;

⁸ baha nani kunin aisi banhwisa, bara ai mihta aihkika buki, kunin swer aisisa sika.

⁹ Dawan, lawana raya kum aiwanisna; lawana kum man ra aiwani maikaisna arp sâtka ba wal.

¹⁰ Pura luaia ba, man mita king nani ra yabisma; man sika napakankam Debit pât wina dakbi sakram ba,

¹¹ prura sordka wina dakbi sâks; dakbi ai sâks upla tringsar nani karnika mihta wina, kunin aisi nani ba wina, witin nani ai mihta aihkika bukisa kunin swer taki aisaia.

¹² Wan luhpia waitna nani ba pâwisa giadin ra mangkan pain pâwi ba baku; wan luhpia mairin nani ba lika tempel playka karbi paskan ba baku sa, tempel tâ baiki alki buki bri bûi ba baku.

¹³ Wan pata watla nani ba banhki sa; banhki sa plun sâtka nani wal. Wan daiwra daknika nani ba tausin nani sahwisa wan nasla nani ba tausin bara tausin brisa.

¹⁴ Wan bîpka mairin nani ba kwihra tiwi banhwisa, bara ai luhpia nani ba, piua kau kan baikisa. Wan yabalka nani ra sibrin mita wan pura winanka âpu kabia.

¹⁵ ¡Lilia pali kabia baha uplika nani naha diara sut bri ba! ¡Lilia pali kabia baha uplika nani Gâd ba witin nani ai Dawanka ba!