Kulki Kaikanka 9 - DAWAN BÎLA AISKA

Insal luan Yua Liliaka ba

¹ Israel luhpia nani ba Idsip wina takan piua wina, mani wâl aimakan katka ba mani tâura, Dawan bui Moses ra aisin Sainai upla iwras ba tasbaya ra, bara witin ra win:

² “Insal luan Yua Liliaka daukaia piua win ba yua kat, Israel luhpia nani baha liliaka ba daukbia.

³ Naha katka yua 14 mahka yu dimaia ba ra, yua tara na liliaka nahki daukaia lâka win ba kat daukbia.”

⁴ Bamna Moses bui Israel luhpia nani ra aisin, Insal luan Yua Liliaka tara ba daukaia.

⁵ Bamna witin nani Insal luan Yua Liliaka tara ba daukan baha katka yua 14 aimakan ba ra Sainai ra, upla iwras tasbaya ra, Dawan mita Moses ra dîa win ba daukan mahka yu dimaia ba ra.

⁶ Sakuna upla kum kum ba tâski takan upla pruan kum ra kangban ba mita, bara Insal luan Yua Liliaka tara ba sip baha yua daukras kata. Naha nani sika Moses bara Eran ra aisaia wan ba, baha yua ra,

⁷ bara witin nani bui Moses ra win: —Yang nani upla pruan kum ra alkri, baha mita yang nani tâski sna. ¿Bara baha wisi, yang nani na ai takaskaia ki, Israel uplika wala nani ai prisantka Dawan ra yabaia piua pat mangkan ba tilara, yang nani sin prisant yabaia sna ba wina?

⁸ Bara Moses pana win: —Wirâ bîla kaiks, bara Dawan ra walamna dîa wisa sapa man nani dukiamra.

⁹ Dawan ba Moses ra aisi, naku win: “Israel luhpia nani ra aisi, naku wis:

¹⁰ Man nani sut, ya ya kabia, kiamkam nani sut, upla pruan ra kangban ba mita tâski takan sapa, apia kaka laihura impakan sa kabia sin, sakuna sut Dawan ra luki Insal luan Yua Liliaka tara ba daukbia,

¹¹ kati wala yua 14 aimakbia ba ra, man nani sut sip sma yu dimaia ra yua tara ba daukaia, brit îs âpu bara dus wahia tahpla sin piaia.

¹² Bara daiwan wîna yauhka dukiara swibiara, dusa nani ba sin krikbiara, Insal luan Yua Liliaka tara daukaia kulkanka lâka ba kat.

¹³ Ban sakuna, ani uplika tâski takras ba, laihura sin impakras kan ba, bara Insal luan Yua Liliaka tara ba kulkaia balras kabia kaka, baha uplika ba upla nani tila wina dakbi sakan kabia, Dawan ra prisant yaia yua ra ai prisantka yaras ba tâwan, baha uplika ai saurka ba ai purara kulkan kabia.

¹⁴ “Bamna upla tringsar man nani tilamra takaski ba sin, Insal luan Yua Liliaka ba, Dawan ra pain kulkanka ba daukbia, baha yua liliaka nahki daukaia Dawan mita win ba tânka ba kat. Tringsar nani ba sin baha lâka ba kat daukbia, baha kuntrika ra aisubi takan ba baku.”

Kasbrika tint watla purara

¹⁵ Tint watla ba bapan yua ra, lâ daukan tintka watla ba purara kasbrika bal madiskan. Tutni yu dimaia ra, pauta klauhan baku tint watla ba purara klauhi kan, ban yu wala titan ba kat.

¹⁶ Bara baku ban kan, kakna ra kasbrika mita madiski bri kan, bara tihmia ra pauta ba klauhi kan.

¹⁷ Tint watla pura ba wina, kasbrika ba purara uluya piua ra, Israel luhpia nani ba mahka impaki kan. Bara kasbrika ba ani pliska ra takaskuya ba ra, baha pliska ra Israel luhpia nani ba takaski ai watla mâki kan.

¹⁸ Dawan lâ daukan ba kat Israel luhpia nani ba impaki kan, Dawan lâ dauki ba kat ai watla nani ba mâki kan. Yu bani tint watla ba purara kasbrika ba bâra sa kaka, witin nani takaski kan.

¹⁹ Kasbrika ba tint watla purara piu wihka takaski ba ra, Israel luhpia nani impaki kan ba sin takaski kan bara bahara Gâd warkka nani ba dauki kan.

²⁰ Tila taim yu kulki baman kasbrika ba tint watla ba purara kan bamna, Dawan ahkia witin nani ra maisa paki dauki ba kat takaski bâra ba piua witin nani takaski kan, apia kaka impaki kan.

²¹ Bara ani piua, kasbrika ba tutni wina titan kat takaskan kaka, apia kaka kasbrika ba titan ra purara bukan kaka, witin nani ba impaki kan.

²² Ban kra yu kum, apia kaka kati kum, apia kaka mani kum kra kasbrika ba tint watla ba purara ban takaskan sa kaka, Israel luhpia nani ba ban takaski kan impakras. Sakuna ani piua purara bukan ba ra, witin nani sin impaki kan.

²³ Dawan lâ mangkan ba kat takaski kan, bara Dawan lâ daukan ba kat impaki kan. Bara baku witin nani, Dawan adarka ba kat dauki kan, witin mita Moses ra win ba baku.