Kulki Kaikanka 4 - DAWAN BÎLA AISKA

Libait nani warkka ba

¹ Bamna Dawan bui Moses bara Eran wal ra naku win:

² “Libait nani tila wina Quehat luhpia nani baman wauhkataya kum ra nina ba uls, ai taya nani bara ai aisika nani watla bîla masraka ba sut,

³ mani 30 wina 50 mani kat alkan nani ba, baha nani sip kabia Dawan wal aisaia tintka watla ra wark takaia.

⁴ “Quehat kiamka nani warkka ba, Dawan ra yan dukia nani sunu daukan ba pliska ra wark takbia. Warkka nani ba naha sa:

⁵ Upla nani ba mahka yabal ra impakaia bûi banhbia ba ra, Eran ai luhpia nani wal bal, tint watla durka ra kwalka paman ba lanhki sâkbia, bara baha kwalka bani lâ nani auhban watla ba pura prakbia.

⁶ Bara baha purara daiwan taya ni pura prakaika pain nani daukan ba ni pura prakbia, bara kli baha purara kwala blu ni pura prakbia, bara twilkaia dusa nani ba sin untika ra dingkbia.

⁷ Brit tibil ra kahban ba, Dawan lamara ba sin, kwala blu ni purara palkbia; bara baha purara plit nani ba swibia, ispan tara nani ba, kapka nani ba, kâp tara nani ba, wain laiki prisantka yabaia watla ba bara brit nani ba sin bâra ban kabia.

⁸ Bara baha sut purara kwala pauni palkan kabia, kli baha purara prakan kabia, daiwan taya ni palkaia daukan ba ni, bara twilkaia dusa nani sin untika ra dingkbia.

⁹ Baha ningkara kwala blu ba, kiandil bapi angkaia dusa ba, lamp nani ba, diara alkaika nani ba, plit nani, glas nani ba, batana laya laikaia watlika nani ba sut pura prakbia.

¹⁰ Baha nani ba sut, daiwan taya ni daukaia kwalka ba ni pura prakan kabia; bara ningkara twilki brih waia dusa nani purara swibia.

¹¹ “Gul ni daukan altarka ba, purara kwala blu, bara daiwan taya ni daukan kwalka maman tanta ni pura prakbia, bara twilkaia dusa nani ba purara swibia.

¹² Bamna ningkara holi pliska ra wark daukaia dukia nani ba sut pali asla bribia, bara sut ba kwala blu kum ra mangkbia, bara daiwan taya ni daukan kwalka maman ba ni pura prakbia, ningkara twilki brih waia dusa purara swibia.

¹³ Batana laya, yamhpus nani altar ra alkan ba sut klin daukbia, bara kwala blu ni pura prakbia.

¹⁴ Bara baha purara, altar ra wark daukaia diara nani yus munan ba sut kahbia: ispan tara nani, park, masku mangkaika nani, kâp tara nani bara diara yus muni nani ba sut. Bara kli baha purara daiwan taya maman kwalka nani ba ni pura bâk palkbia, bara twilkaia dusa nani ba sin mangkbia.

¹⁵ Eran ai luhpia nani aikuki, holi pliska ra naha dukia nani sut ba pura prakbia. Bara utla ba mahka saki brih impakaia bubia ba ra, Quehat kiamka nani ba balbia baha twilki brih waia, sakuna diara holi ba kangbia apia, pruaia apia dukiara.

¹⁶ Eleazar, prîs Eran luhpia ba, tint watla ra naha dukia nani sut ba aihwaki kaiki kabia, kîa yamni angkaia dukia ba, plun mâ nani ba, bara batanka laikma ba sin; baku diara wala nani bâra ba sin, holi pliska ba bara wark daukaia dukia nani ba sut.”

¹⁷ Bara Dawan ba Moses bara Eran ra aisi, naku win:

¹⁸ “Ban swirka Quehat kiamka taika nani ba, Libait nani tilara bal prui tiwbiara.

¹⁹ Baku witin nani holi pliska ra dimi, diara sunu nani ba alki prubia apia dukiara, man nani naku dauks: Eran ai luhpia nani wal bal, witin nani kumi bani ra wibia dîa daukaia bara dîa alkaia ba.

²⁰ Diara holi nani pura praki ba ra, witin nani dimi kaikbia apia; baha kaikbia kaka, prui banhbia.”

²¹ Dawan ba Moses ra aisi, naku win:

²² “Guersón luhpia nani ba sin, asla an pali sapa kulki bris, ai aisika nani watla bîla wina bara ai masraka nani sut sin,

²³ mani 30 wina 50 kat bri uplika nani ba, baha nani tint watla ra wark takaia sip nani ba.

²⁴ “Guersón taika nani warkka ba naku kabia:

²⁵ Dawan wal aisaia tintka watla kwalka nani twilki brih wabia, tint watla ba pura prakaika ba, diara nani pura prakaika daiwan taya ni maman nani ba, watla ra dimaika kwalka nani ba,

²⁶ utla kutbanka kwalka nani ba, utla kutbanka ra dimaika kwala paman nani ba, baha ba tint watla ba lamara sa, baku sin kîa yamni angkaia pliska tnaya kir ra paman ba, wilkaia kiwka nani ba, wark daukaia dukia nani bara dîa dîa sut watla ba dukia wisi daukan ba sut twilkaia ai warkka nani kabia.

²⁷ Eran ai luhpia nani aikuki, Guersón masraka kiamka nani ba pura kaiki kabia, witin nani ra wark yan ba daukaia, diara nani twilki brih waia. Witin nani mita wibia, dîa dîa warkka daukaia, baha nani mihta ra ba, yamni daukaia aihwaki kaiki kabia.

²⁸ Naha warkka nani ba sika Guersón luhpia nani tint watla ra daukaia sa, bara daukaia wiaia ba lika, prîs Eran luhpia Itamar mihta ra sa.

²⁹ “Merarí luhpia nani ba kulkma, ai kiamka nani ba, ai aisika nani watla uplika nani ba sut,

³⁰ mani 20 wina 50 mani kat alkan uplika nani ba, baha nani tintka watla ra wark takaia sip ba.

³¹ Baha nani sika tint watla ra diara nani bâra ba twilki kabia, tatka nani ba, twilkaia dusa nani, playa tara nani ba, mununhtara playka alkaika nani ba sin,

³² utla latka kutban playka tara nani ba, mununhta alkaika playka ba, tasba ra bapan dusa nani ba, kiwka nani ba, wark daukaia dukia wala nani ba sut, warkka wala nani sin sut. Bara man bui witin nani ra pain wiaia sma, twilkaia dukia bani ba nina mâki wina.

³³ Baku kabia Merarí luhpia kiamka nani warkka ba, tint watla ba ai mihta ra bri kabia, sakuna Eran luhpia Itamar mita tâura aimaki kabia.”

³⁴ Baku bamna Moses bara Eran wal, tâ uplika nani ba sin aikuki Quehat luhpia nani kiamka ba kulkan, ai aisika taika nani ba masraka nani ba kat,

³⁵ mani 30 wina 50 mani alkan nani ba kat, baha nani ba sut tint watla ra wark takaia sip ba.

³⁶ Sut kulkan ba asla 2,750 kan.

³⁷ Naha nani sika Quehat kiamka nani wina kulkan ba, baha nani tint watla ra warkka nani daukaia sip nani ba Moses bara Eran wal kulkan nani ba, Dawan mita Moses ra win ba baku daukan.

³⁸ Bara Guersón luhpia nani, kiamka ai pamali nani kulkan ba kat,

³⁹ mani 30 wina 50 mani kat alkan nani ba, baha nani sut tintka watla ra wark daukaia dimi banhwan.

⁴⁰ Asla sut kulkan ba 2,630 nani kan.

⁴¹ Naha nani sika, Guersón luhpia nani kiamka ba, baha nani sut asla watla ra wark dauki banhwi ba, baha nani ba Moses bara Eran wal kulkan nani ba Dawan win ba adarka kat.

⁴² Bara Merarí luhpia nani, masrika nani kulkan ba lika, ai kiamka nani ba kat, ai aisika nani watla nani ba kat,

⁴³ mani 30 wina 50 mani alkan ba kat, baha nani sut tint watla ra wark takaia sip ba kulkan,

⁴⁴ baha nani asla sut 3,200 kan.

⁴⁵ Baha nani sika Merarí luhpia kiamka nani kulkan ba, baha nani ba Moses bara Eran wal kulkan, Dawan mita Moses ra win ba kat daukan.

⁴⁶ Moses bara Eran wal, Israel tâ uplika nani ba sin aikuki, Libait nani kiamka nani wina kulkan ba, ai aisika nani watla ba kat,

⁴⁷ mani 30 wina 50 mani alkan baha nani tint watla ra dimi wark daukaia ai mihta ra brih banhwi kan ba,

⁴⁸ baha nani asla sut kulkan ba lika 8,580 kan.

⁴⁹ Dawan mita Moses ra win ba baku kulkan kata, upla bani dîa ai warkka daukaia win ba kat, baha nani witin mita kulkan ba.