Kulki Kaikanka 36 - DAWAN BÎLA AISKA

Mairin nani ra tasba yan

¹ Galaad masraka kiamka tâ uplika nani ba, Maquir kiamka pali nani ba, Manasés bara Josep wal Moses ra wan bara Israel uplika wihtka nani ba sin kaikaia, bara witin nani ra win:

² —Dawan lâ mangkan, Moses, man pali bal tasba na Israel luhpia nani ra kulki yama, lat lulki kaiki, upla bani dîa briaia kan ba kat. Bamna yang nani taiya Selofhad dukiara sin mai win kata, tasba witin ra yaia kan ba ai luhpia mairin nani ra yama.

³ Sakuna mairka nani ba Israel kiamka wala wal marit takbia kaka, tasba witin nani dukia ba swibia, yang nani kiamki dukiara. Bara witin nani wabia ani daknika kiamka aikuki ai maya takan ba tilara dimbia, bara baku wan tasbaya ba lat lulki kaiki, dakbi wankbia.

⁴ Ningkara, Israel ra pri sakaia lâka manka ba aimakbia piua ra, witin nani ai tasbaya ba ani kiamka ra wan ba bahara yan kabia, bara baha kat yang nani kiamki wal diara daukaia âpu kabia.

⁵ Bamna Moses, Dawan bui witin ra dîa smalkan ba kat Israel luhpia nani ra lâ smalki win: —Josep kiamka waitnika nani ba aitani kat aisisa.

⁶ Dawan win, Selofhad luhpia mairin nani ra yabalka param swisa, witin nani sika ani ani kiamka ba tilara marit takaia brin dauki ba sip sa takaia, sakuna upla kum witin nani ai aisa tani ra kiamka tila wina kaia sa.

⁷ Baha tasbaya Israel ra kiamka kumi bani ra yaia kan yan ba, kiamka wala ra laki yan kaia apia sa, Israel luhpia bani ai tasbaya ba alki briaia sa, ai kiamka nani tilara.

⁸ Ani ani kiamka wina mairin kum ai prapatika bri ba, witin ai maya takbia waitna kumi witin ai kiamka daknika ba tila wina ba wal. Baku lika Israel luhpia nani kumi bani ai aisika wina tasba yan ba alki bri kabia.

⁹ Prapati kumi sin sip apia sa kiamka wala ra laki yaia. Israel luhpia kiamka bani ai prapatika witin ra yan ba alki bri kaia sa.

^10-11 Bamna Mahlá, Tirsá, Hoglá, Milcá bara Noa, Selofhad luhpia mairin nani ba, Dawan mita Moses ra dîa lâ smalki win ba kat daukan, witin nani ai tahti luhpia waitna nani wal ai maya taki banhwan, witin nani lika ai aisika kiamka,

¹² Manasés kiamka nani ba, Josep luhpia nani ba. Baha nani prapatika ba ai aisika kiamka nani tilara takaskan, ai aisika prapatika kan ba tilara.

¹³ Naha lâka sika Dawan bui Israel luhpia nani ra smalki yan ba, Moab twiya ra, Jordan lamara, Jeriko mawan tani ra.