Kulki Kaikanka 35 - DAWAN BÎLA AISKA

Libait nani ra prapati yan ba

¹ Moab twiya ra, Jordan lamara, Jeriko mawan kat, Dawan bui Moses ra aisi, win:

² “Israel luhpia nani ra smalki wis, witin nani tasba bri ba wina Libait nani ra tawan nani yabia, bahara iwaia mata, bara twi nani ai tnaya kir ba wina sin yabia daiwan nani pata.

³ Libait nani baha tawanka nani ra iwbia, bara twi ba ra lika ai daiwra nani bri kabia, daiwan wala nani sin.

⁴ Daiwan sahwaia pliska yabaia ba, tawan kutbanka ba wina tnaya kir ra bâra kaia sa 500 yar skwir, lata tani ra.

⁵ Baha tasbaya aiska ba skwir kulkan kan, wibia kaka, tnaya walhwal bri kan, lalma wina muna kat tnaya wâl; yahbra wina waupasa kat tnaya wâl; tnaya kumi bani ba 1,000 yar bri kan. Bara tawan ba lila kat kabia, daiwan sahwaia tasbaya ba lika kutban ba wina lata tani ra.

⁶ “Tawan nani Libait nani ra yabia ba, baha wina tawan matlalkahbi ba yukuwaia watla nani kabia, upla kum bui upla wala ikan kaka, bahara plapi wih ai kaina kahbaika plikbia. Sakuna baha tawanka nani matlalkahbi yama purkara, kau tawan wala 42 yama;

⁷ bara sut ba ra, Libait nani ra 48 tawan nani yabaia sma, daiwan nani sahwaia pliska sin.

⁸ Israel luhpia nani ai tasbaya pali bribia ba wina Libait nani ra tasbaya yabia ba ra, baha nani kiamka kumi bani ra nahki briaia ba tânka kat yabia. Tasba pîs kau tara ba wina, kau tara yan kabia; tasba kau sirpi ba wina kau sirpi yabia.”

Yukuwaika tawanka nani ba

⁹ Dawan ba Moses ra aisi, naku win:

¹⁰ “Naha adarka nani na Israel luhpia nani ra wis: Man nani Jordan awala ba luma ba ra Kenan ra dimma ba ra,

¹¹ man nani ra mamrikamna ani tawanka nani ba man nani bâk saki briaia, upla kum mita upla wala kum ra ikaia lukras si ban ikan ba yukuwaika.

¹² Bahara pruan taika nani tila wina plapi swak takbia, bara ikan kabia apia, ban ani piua upla nani mawanra saki lâka daukbia ba kat.

¹³ Tawan nani yabia ba wina, matlalkahbi ba yukuwi swak takaia tawanka nani kabia:

¹⁴ Jordan lalmika tani ra tawan yumhpa, bara Kenan ra tawan yumhpa.

¹⁵ Baha tawanka matlalkahbi ba sika yukuwaia tawanka nani kabia, baha ba Israel luhpia nani dukiara, bara upla sât wala nani man nani tilamra iwi ba, apia kaka impapakra nani tilamra ba dukiara sin kabia. Baha tawanka ra yukuwi kabia, ya uplika upla ra ikaia lukanka âpu si ban upla ikan nani ba.

¹⁶ “Upla kum bui upla wala ra ayan ni insauhkbia kaka, bara baha insauhkanka tâka mita uplika ba ban prubia kaka, baha uplika ba upla âikra kum kulkbia, bara upla ikan ba pruaia pâtka ra lakan kabia.

¹⁷ “Upla kumi mita upla wala ra walpa ni sabia, bara baha tâka wina ban kra sip sa uplika ba pruaia, bara latwan brin uplika ba prubia kaka, baha uplika ba upla âikra kulkbia, bamna uplika ba pruaia pâtka ra lakan kabia.

¹⁸ “Bara upla kum mita upla wala kum ra dus ni prukbia, ban kra baha tâka wina uplika ba pruaia sip sa, bara latwan bri uplika ba prubia kaka, uplika ba upla âikra kulkbia, bara uplika ba pruaia pâtka ra lakan kabia.

¹⁹ Baha pruan ba taika kau wal asla ba mita yaka uplika ba ikbia, taika ba pliki sâkbia ba ra.

²⁰ “Upla kum bui upla wala kum ra tumi platukbia kaka, ai lukanka saura bri, apia kaka diara ni lulki sabia kaka,

²¹ ai waihla kan ba tâwan ai mihta ni prukbia kaka, bara uplika wala ba prubia kaka, pâtkira ba pruaia pâtka ra lakan kabia, kan witin ba upla âikra bamna, pruan ba taika kau wal asla ba mita, ani anira wal prawbia ba ra bri sal yaka ikbia.

²² “Sakuna upla kum ra upla wala mita ai dahra walras ban platukban, wal waihla kan lika apia, apia kaka diara kum ni lulkan ai dara walras saura luki lika apia,

²³ kaikras ban walpa kum lulkan ikaia lukras kuna ikan kaka, sakuna walpa ba upla kum purara kauhi ikan ai waihla lika apia kan, bara diara saura munaia lukanka wal lika apia,

²⁴ bamna tawan uplika nani ba, lâ wihtka baku taki aisabia upla ikan ba, pruan ba taika mita pana ikaia luki ba mapara, naha lâka daukaia tânka mai wisna ba kat.

²⁵ Tawan uplika nani mita upla ikan ba wina dakbi sâkbia, bara upla ikan uplika ba, yaka kli yukuwi swak takaia tawanka ra yukuwaia sa. Bara upla ikan waitnika baha yukuwaia pliska ra kabia prîs tara ba prubia ba kat.

²⁶ Sakuna yukuwaia tawanka ba wina witin takbia kaka,

²⁷ bara pruan ba taika mita witin ra ikbia, bâra lika ai lâka âpu kabia, baha taika nani sin saura daukras kabia.

²⁸ Baha upla ikan waitnika ba witin yukuwi swak takaia tawanka ra takaskbia, prîs tara ba prubia kat. Ningkara ai tasbaya ra kli waia sip kabia.

²⁹ “Naha lâka maikisna na, man nani mampa ra lâ kumi kabia, aisika nani wina luhpia nani kat, ani anira man nani raya kama yua sut ra kulki dauki ban kaia.

Witniska aisi pura mana aibapaia lâka nani ba

³⁰ “Upla ailal witnis aisi mita upla âikra kum pruaia pâtka ra lakaia sip sa. Sakuna witnis kumi mita lika sip apia upla kum ikaia.

³¹ “Upla âikra kum pruaia pâtka ra lakan ba, sip apia sa lalah nani aibapi pri sakaia; baha uplika ba pruan kaia sa.

³² “Upla âikra kum yabalka sakan, swak takaia tawanka ra diman ba, kau prîs tara ba pruras ba ra lalah ni aibapi si ai tasbaya ra kli tawi waia sip apia.

³³ “Upla âikra nani mita man nani iwaia sma tawanka lâka ba bahki sakaia apia sa; kan upla âikra ba tawan lâka sasauhkra sa; bamna upla âikra kum pura mana aibapaia lâka wala âpu sa.

³⁴ “Man nani iwaia sma tasbaya lâka ba tâski daukpara, yang sin bahara tilamra takaskamna bamna. Yang Dawan, Israel luhpia nani tilara iwisna.”