Kulki Kaikanka 34 - DAWAN BÎLA AISKA

Tasbaya piarkika ba

¹ Dawan ba Moses ra aisi, naku win:

² “Naha lâka smalkisna na wis Israel luhpia nani ra: Man nani pat pali Kenan kuntrika ra dimma. Kuntrika ba sika man nani dukiam pali kabia, bamna naha lainka sika man nani piarkikam ba.

³ “Waupasa tani piarkika ba, sim upla iwras tasbaya piarkika ba Edom tasbaya lama kat sa. Lalma tani wina kaikbia kaka, piarkika ba tâ kulkisa, Kabu Pruan muna tani ba wina.

⁴ Baha wina waupasa tani ban impaki auya Acrabim ra waia yabalka ba kat, baha wina Sin bâk lui Cadés-barnea kat auya. Ningkara Hasar-adar bâk auya ban Asmón kat,

⁵ bara Asmón wina ban piarkika ba Idsip piarkika ra tingni bâra ba kat auya, bara Mediterráneo kat prakuya.

⁶ “Muna tani piarkika ba bri si prakisa, Mediterráneo kabu auhika un ba kat.

⁷ “Yahbra tani piarkika ba mark kum lukaia sma, Mediterráneo kabuka ba wina, Hur ilka ba kat,

⁸ bara baha wina Hur ilka bâk Hamat ra dimaia ba kat auya, ningkara Sedad kat.

⁹ Sedad ba wina naha piarkika ban auya Zifrón kat, bara baha wina Hasar-enán kat takaskbia.

¹⁰ “Lalma tani piarkika ba, mark kum luisa Hasar-enán wina Sefam kat,

¹¹ bara Sefam wina Riblá kat, Ain lalmika tani ra; baha wina piarkika ban lui auya Quinéret lakunka lalmika kat,

¹² bara ban Jordan awala bâk auya, Kabu Pruan kat bri si prakisa. “Naha tasbaya piarkika nani kulkan ba lika, man nani tasbayam piarkika nani sa.”

Tasba yuan ba

¹³ Moses bui Israel luhpia nani ra win tasba ba ai tilara nahki yui briaia lâka ba: “Naha kuntrika na sika man nani mita yuaia sma, bara upla kiamka kumi bani nahki briaia ba kat yama, lat lulki kaiki. Naha tasbaya dukiara sika Dawan aisin, baha kiamka 9 pura bakriki ba ra yabia win ba,

^14-15 Ruben bara Gad wal kiamka nani ai aisika watla uplika nani ba, Manasés kiamka nani sin baha nani tilara bakriki ba, witin nani ai tasbaya brih banhwan, Jordan, Jeriko wal lalma tani ra wan yu uli yaba tani ra.”

¹⁶ Dawan ba Moses ra aisi, naku win:

¹⁷ “Man nani tilam wina tasba yui maikaia ba lika, prîs Eleazar bara Jasua Nun luhpia ba wal.

¹⁸ Sakuna kiamka kumi bani tila wina sin, kakaira kum tasba ba yubia.

¹⁹ Baha waitnika nani ba lika naha nani: “Juda kiamka wina: Caleb, Jefuné luhpia ba.

²⁰ “Simian kiamka wina: Samuil, Amihud luhpia ba.

²¹ “Benjamín kiamka wina: Elidad, Quislón luhpia ba.

²² “Dan kiamka wina: Buquí, Joglí luhpia ba.

²³ “Josep luhpia kiamka wina: Haniel, Efod luhpia ba, Manasés kiamka tila wina;

²⁴ bara lalka Quemuel, Siftán luhpia ba, Efraín kiamka wina.

²⁵ “Zabulón kiamka wina lalka ba lika: Elisafán, Parnac luhpia ba.

²⁶ “Isacar kiamka wina: Paltiel, Azán luhpia ba.

²⁷ “Aser kiamka wina: Ahihud, Selomí luhpia ba.

²⁸ “Neftalí kiamka wina: Pedahel, Amihud luhpia ba.”

²⁹ Baha nani ba Dawan mita bâk sakan Kenan tasbaya ba Israel luhpia nani ra yui yaia.