Kulki Kaikanka 33 - DAWAN BÎLA AISKA

Israel luhpia nani impakanka ba

¹ Naha sika Israel luhpia nani impakanka ba, witin nani Idsip wina takan, takaski impaki kan war aiklaklabra nani baku, Moses bara Eran wal witin nani tâ brin.

² Witin nani plis bani ra takaski ba impakuya ba Moses ulbi bri kan pliska nani nina, dîa Dawan bui witin ra win ba kat dauki kan. Pliska nani bani wina takan ba naha nani sa.

³ Israel luhpia nani Ramsés wina takan, kati pas yua 15 ba. Insal luan yaprika liliaka pas ba dauki si, yua wala ba impakan. Witin nani Dawan wina karnika tara bri ba, Idsip uplika nani kaiki kan taki wan.

⁴ Idsip uplika nani ai luhpia tawahkia pruan nani ba biki banhwi kan ba ra, baku Dawan ai karnika ba witin nani ra mariki kan, Idsip gâdka nani lâka sin daukan.

⁵ Israel luhpia nani Ramsés wina taki Sucot ra wan bara ai watla mâkan.

⁶ Sucot wina takan bara Etam ra wan, bara ai watla mâkan upla iwras tasbaya lamara.

⁷ Etam wina taki witin nani kli Pi-hahirot tani wan, baha ba Baal-sefón lalmika tani ra sa, bahara ai watla nani mâki banhwan Migdol lamara.

⁸ Witin nani Pi-hahirot wina taki, Kabu Pauni ba lui upla iwras tasbaya ra aidrubi wan; witin nani Etam wina yu yumhpa baha yabalka ra wapan, ai watla nani kiamka Mará kat mâkan.

⁹ Mará wina taki Elim ra aidrubi wan, bahara sika lî kârma 12 bâra kan, sila dusa sâtka sin 70 bâra kan. Bara bahara ai watla nani mâki banhwan.

¹⁰ Elim wina taki, Kabu Pauni lamara ai watla nani mâki banhwan.

¹¹ Kabu Pauni wina taki, sim upla iwras tasbaya ra takaski ai watla mâki banhwan.

¹² Sin upla iwras tasbaya wina takan, bara Dofcá ra wih ai watla mâki banhwan.

¹³ Dofcá wina takan bara Alús ra wan, bahara ai watla mâki banhwan.

¹⁴ Alús wina takan bara Refidim ra ai watla mâkan, bahara upla nani diaia lî âpu kan.

¹⁵ Refidim wina takan bara Sainai upla iwras tasbaya ra ai watla mâkan.

¹⁶ Sainai wina takan bara Quibrot-hataavá ra ai watla mâkan.

¹⁷ Quibrot-hataavá wina takan bara Haserot ra ai watla mâkan.

¹⁸ Haserot wina takan bara Ritmá ra ai watla mâkan.

¹⁹ Ritmá wina takan bara Rimón-peres ra ai watla mâkan.

²⁰ Rimón-peres wina takan bara Libná ra ai watla mâkan.

²¹ Libná wina takan bara Risá ra ai watla mâki banhwan.

²² Risá wina takan bara Quehelata ra ai watla mâkan.

²³ Quehelata wina takan bara Séfer ilka ra ai watla mâkan.

²⁴ Séfer ilka wina takan bara Haradá ra ai watla mâkan.

²⁵ Haradá wina takan bara Maquelot ra ai watla mâkan.

²⁶ Maquelot wina takan bara Táhat ra ai watla mâkan.

²⁷ Táhat wina takan bara Térah kat ai watla mâkan.

²⁸ Térah wina takan bara Mitcá ra ai watla mâkan.

²⁹ Mitcá wina takan bara Hasmoná ra ai watla mâkan.

³⁰ Hasmoná wina takan bara Moserot ra ai watla mâkan.

³¹ Moserot wina takan bara Bené-jaacán ra ai watla mâkan.

³² Bené-jaacán wina takan bara Hor Guidgad wina ba ra ai watla mâkan.

³³ Hor Guidgad ba wina takan bara Jotbata ra ai watla mâkan.

³⁴ Jotbata wina takan bara Abroná ra ai watla mâkan.

³⁵ Abroná wina takan bara Esión-guéber ra ai watla mâkan.

³⁶ Esión-guéber wina takan bara sin upla iwras tasbaya ra ai watla mâkan, baha nina wala ba Cadés.

³⁷ Cadés wina takan bara Hur ilka ra ai watla mâkan, Edom tani ra waia piarkika ra.

³⁸ Dawan dîa win ba baku Eran, Hur ilka ra uli wan, kati matsip yua pas ba aimakan ra. Witin nani Idsip wina takan yua wina kulkan, baha yua kat ba 40 mani alkan, bara witin bahara pruan.

³⁹ Eran Hur ilka ra pruan ba kat, witin mani 123 bri kan.

⁴⁰ Arod kingka Kena wina ba, Kenan tasbaya Négueb ra takaski kan ba, witin walan Israel luhpia nani baha tasbaya ra wan ba.

⁴¹ Baha nani Hur ilka wina taki Salmoná ra wih ai watla mâkan.

⁴² Salmoná wina taki Punón ra wih ai watla mâkan.

⁴³ Punón wina taki Obot ra wih ai watla mâkan.

⁴⁴ Obot wina taki Iié-abarim ra wih ai watla mâkan Moab yabalka tani ra.

⁴⁵ Iié-abarim wina taki wih Dibón-gad ra ai watla mâkan.

⁴⁶ Dibón-gad wina taki wih Almón-diblataim ra ai watla mâkan.

⁴⁷ Almón-diblataim wina taki wih Abarim ilka ra ai watla mâkan, Nebo lalmika tani ra.

⁴⁸ Abarim ilka wina taki wih Moab upla iwras tasbaya ra ai watla mâkan, Jordan lamara, Jeriko yabalka tani ra.

⁴⁹ Jordan lamara ai watla mâkan ba lika Bet-jesimot wina ban Abel-sitim kat wan, Moab twiya ra.

Kenan tasbaya nahki yui brin lâka ba

⁵⁰ Moab twiya ra, Jordan awala lamara, Jeriko tani ra, Dawan ba Moses ra aisi, naku win:

⁵¹ “Naha mai wisna na Israel luhpia nani ra wis: Man nani Jordan baila wala lui Kenan tasbaya ra dimma ba ra,

⁵² upla nani bahara iwi ba sut kangs taki wabia. Lilka nani walpa ni, bras ni paski bapi bri ba sut sauhki tiks, ani ani pliska ra kabia, kiuhsi nani ra ai gâdka mayuni ba sut bataks.

⁵³ Tasbaya ra ba pura lui, bahara iwi banhs, kan yang mita man nani mihtam ra mangkuna man nani bahara iwaia.

⁵⁴ Sakuna masraka kumi bani daknika ba kat, tasbaya ba yuaia sa. Dakni kau tara ra, tasba pîska kau tara yama, daknika bani dîa briaia kan praiska ba kat brin kabia, lat kulki kaiki.

⁵⁵ Man nani tasbaya uplika nani ba kangbi sakras kama kaka, baha nani takaskuya ba man nani mampara pât bukbia, dus tatwa baku kiaya wînam ra ba dimi baku kabia, tasba ba man nani paskma piua ra.

⁵⁶ Bara yang dîa witin nani wal daukaia luki katna ba kli man nani wal daukamna.”