Kulki Kaikanka 32 - DAWAN BÎLA AISKA

Ruben bara Gad kiamka nani ba, Jordan lalma tani ra ai watla mâkan

¹ Ruben bara Gad wal kiamka nani ba, bîp ailal pali bri kan. Witin nani kaikan Jazer bara Galaad tasbaya ba pain kan bîp sahwaia,

² bamna witin nani lika Moses ra aisaia wan, baku sin prîs Eleazar ra bara tawan wihta nani ra, bara naku aisi banhwan:

³ —Man nani kaiks: Atarot, Dibón, Jazer, Nimrá, Hesbón, Elalé, Sebam, Nebo bara Beor tasbaya nani na,

⁴ Dawan mita baha tasbaya nani ba dakbi Israel luhpia nani ra yan ba, baha tasbaya nani ba twi manis pâwisa bîp nani pata. Yang nani dukiam dadaukra nani brisna ba sika bîp manis.

⁵ Bamna man aitani lukisma kaka, baha tasbaya ba yang nani ra aik, bara yang nani na Jordan awala baila wala ra luaia wan wipara.

⁶ Sakuna Moses pana witin nani ra win: —¿Bamna man nani ba naha tasbaya ra takaskaia lukisma ki, man uplikam nani war aiklabaia auya ba piua ra?

⁷ ¿Dîa muni man nani takaskaisma, Israel luhpia nani kupia turbaisma, Dawan bui witin nani ra tasba yan ba ra lui waia apia?

⁸ Baha daukanka sika man nani papikam nani daukata ba, Cadés-barnea wina tasba laki kaikaia blikatna ba piua ra.

⁹ Witin nani Escol tingnika un kat wan, baha wina tasba ba laki kaikan. Baha ningkara, witin nani mita Israel luhpia nani ra kupia sauhkan, Dawan wina witin nani ra tasba yan ba tasbaya ra sip dimbia apia.

¹⁰ Baha tâwan Dawan lawan baha yua ra bara swer taki aisin

¹¹ Idsip wina takan uplika nani, mani 20 alkan ba wina ai purara bri ba, kumi sin baha tasbaya ba kaikbia apia, baha sika Ebraham, Aisak bara Jekob ra yaia win yaba, witin nani kasak wapi banhras kan ba mita.

¹² Caleb, Jefuné luhpia quenizita ba, bara Jasua Nun luhpia ba, witin nani wâl baman, Dawan dîa win ba kat wali nina blikan.

¹³ Bamna Dawan bui Israel luhpia nani ra lawi daukan, 40 mani upla iwras tasbaya ra wapi tauki kan, Dawan mapara saura daukan nani ba sut prui tiwan ba kat.

¹⁴ Bara nanara man nani, saura dadaukra luhpia nani, papikam nani daukan ba baku kli daukaia lukisma, Israel luhpia nani mapara Dawan lawanka ba kli bri balaia dukiara.

¹⁵ Man nani bui Dawan nina blikaia wilin apia sma kaka, witin mita Israel luhpia nani upla iwras tasbaya ra yaka kau takaskbia, bara man nani pâtkira kama witin nani sut sauhki tikbia kaka.

¹⁶ Bara witin nani lika Moses lamara wih, naku win: —Yang nani brin ai daukisa sîpki nani bara bîpki nani sin watla paskaia, bara wan luhpia nani iwaia tawanka ba sin paskaia.

¹⁷ Baha ningkara yang nani Israel luhpia nani tâura aimaki, war aiklabaia dukiara wamna, baha tasbaya ra dimbia ba kat. Wan watla uplika nani ba lika tawan ra kabia, naha tasbaya lamara nani ba mita sin diara munbia apia.

¹⁸ Yang nani kli waitla ra tawi wamna apia, Israel luhpia nani sut ai tasbaya brih iwras kaka.

¹⁹ Yang nani Jordan baila wala ra kli tasba briaia lukamna apia. Yang nani, tasba pat brisna Jordan lalma tani ra.

²⁰ Bara Moses pana witin nani ra win: —Man nani aisisma ba kat daukma, Dawan lâ mangkan ba kat war aiklabaia dukia nani brima,

²¹ bara Jordan baila wala ba luma, bara bahara ban bâra kama, Dawan mita waihla nani ba sut kangbi sâkbia ba kat.

²² Tawan ba sin aiklabi pura luma, baku lika Dawan bui Israel luhpia nani dukiara lâ nani mangkan ba dauki, bara man nani pri tawi balma. Bara tasbaya na, man nani dukiam kabia, Dawan aisin ba kat.

²³ Sakuna man nani baku daukras kama kaka, luki bas, Dawan mapara saura daukuma ba. Bara yu kumi baha saurka mana klala brima.

²⁴ Bamna tawankam nani paski dauks, luhpiam nani watla mâks, bara sîpkam nani watla sin, dîa aisaram ba kat dauks.

²⁵ Gad bara Ruben kiamka nani ba, pana witin ra win: —Yang nani warkkam dadaukra nani, man dîa lâ mangkram ba kat dauki banhwamna.

²⁶ Yang nani mayi, luhpi sirpi nani, bîpki nani bara daiwan nani sut brisna ba nahara takaskbia, Galaad tawanka nani ra.

²⁷ Bara yang nani warkkam dadaukra nani sut, war aiklabaia dukia nani brih wamna, Dawan lâ mangkan ba kat, man nani dîa wan wiram ba baku daukaia.

²⁸ Bara Moses bui prîs Eleazar ra lâ smalki yan, baku sin Jasua ra bara Israel luhpia nani tâ bri nani ra sin win:

²⁹ —Gad bara Ruben wal kiamka nani sut ba man nani wal Jordan baila wala ra lubia kaka, war aiklabaia dukia nani brih aiklabaia Dawan lâ mangkan ba kat, tasbaya uplika nani ba mapara aiklabi pura luma ba kat, man nani bui Galaad tasbaya ba witin nani ai tasbaya yabi banhma.

³⁰ Sakuna war aiklabaia dukia nani wal lui waras kabia kaka, man nani wal aikuki baku Kenan tasbaya ra tasba pîs yas.

³¹ Bamna Gad bara Ruben kiamka nani pana win: —Yang nani warkkam dadaukra nani, Dawan dîa lâ mangkan ba kat dauki banhwamna.

³² Dawan aisin ba kat war aiklabaia dukia nani brih, Kenan tasbaya ra lui wamna, sakuna Jordan lalmika tasbaya ba wan tasbaya baku yang nani brimna.

³³ Bamna baku, Gad bara Ruben kiamka nani bara Manasés kiamka bakriki ba, Moses mita Sihón tasbaya ba, king amorreo tasbaya ba, bara Og tasbaya, Basán kingka tasba nani bri kan ba, tnaya kir twi nani ba sut yan.

³⁴ Bara Gad kiamka nani ba lika Dibón, Atarot, Aroer,

³⁵ Atarot-sofán, Jazer, Jogbehá,

³⁶ Bet-nimrá bara Bet-arán tawanka nani ba kli karna pali paskan, sîp watla nani sin paskan.

³⁷ Ruben kiamka nani ba Hesbón, Elalé, Quiriataim,

³⁸ Nebo, Baal-meón bara Sibmá tawanka nani ba kli paskan, tawanka nani tila nina ba sin nina wala mâkan, ban sin kum kum ba ai nina mangki banhwan.

³⁹ Bara Maquir kiamka nani Manasés luhpia nani ba, Galaad tasbaya ra blikan wih aiklabi pura lui dakbi brin, bara amorreo nani bahara iwi kan kangbi sakan.

⁴⁰ Bamna Moses win Maquir kiamka nani ba Galaad tasbaya ba bribia, bara witin nani bahara ai watla paski banhwan.

⁴¹ Manasés kiamka Jaír sin, aiklabi amorreo nani ba pura lui, tawan ba dakbi brin bara nina Havot-jaír mâkan.

⁴² Bara Nóbah daknika nani mita Quenat uplika nani wal aiklabi pura luan, witin tnaya distika ra kan tawanka nani ba sin. Bara baha tawanka ba witin ai nina pali ni Nóbah mâkan.