Kulki Kaikanka 31 - DAWAN BÎLA AISKA

Madián ra pana munan ba

¹ Dawan ba Moses ra aisi, naku win:

² “Israel uplika nina ra Madián uplika nani ra pana munan lâka ba dauks, bara baha ningkara man pruma.”

³ Bamna Moses upla nani ra win: —Man nani tila war aiklabaia dukia nani ba brih mahka bûi banhs aiklabaia waia, bara Dawan nina ra was Madián uplika nani mapara aiklabi, pana muni pura lus.

⁴ Kiamka 12 bani wina waitna nani 1,000 kumi war ra blikaia sa.

⁵ Baku bamna kiamka nani bani wina war aiklabaia 1,000 sakan, bara asla lika 12,000 waitna nani war aiklabia dukia nani ba brin kan.

⁶ Bara Moses bal baha uplika nani ba war ra blikan, prîs Eleazar luhpia Finees sin tâura wabia win. Finees sika Dawan watla wina kâp bara trumpit nani sin brin, waihla nani ra aiklabi pura luaia ba dukiara.

⁷ Bara Madián uplika nani mapara aiklabi sut ikan, Dawan bui Moses ra dîa daukaia win ba kat daukan.

⁸ King nani Eví, Réquem, Sur, Hur bara Reba, Madián kingka nani matsip ba sut ikan, baha tilara Beor luhpia Balaam ba sin.

⁹ Israel luhpia nani mita Madián mairka nani bara luhpia kau sirpi nani ba sin priski brih wan, bara daiwra nani sin mihta dakban, bîp nani, diara mana tara dukia nani kan ba sin brin.

¹⁰ Baha purkara tawanka tara bara tawanka sirpi nani sin sut angkan.

¹¹ Bara dîa dîa sut mihta dakban ba, upla nani bara daiwan nani ba sut,

¹² baha dukia nani ba brih ki Moses ra bri balan, Eleazar ra, Israel upla nani sut ra sin, baha nani ba ai watla dauki Moab twiya ra kata, Jordan lamara, Jeriko ra waia yabalka ra.

¹³ Moses, prîs Eleazar bara tawan tâ uplika nani ba sin sut, ai watla wina taki wan witin nani wal prawaia.

¹⁴ Sakuna Moses ai kupia sauhkan, war aiklaban ra 1,000 nani tâ uplika nani ba wal bara 100 nani tâ uplika ba wal sin, witin nani aiklabi si balan ba ra,

¹⁵ bamna witin nani ra win: —¿Dîa muni man nani mairin nani ba ikras raya ban swih banhram?

¹⁶ Baha mairka nani sika Balaam smalkanka ba wali, Israel luhpia nani ra brih wan, Dawan mapara bûi saura daukaia, bara Baal-peor ra mayunaia, baha tâwan Dawan bui klala blikan upla nani purara.

¹⁷ Bamna na minit luhpia waitna nani bara mairin kau waitna tânka kaikras nani ba sut iks,

¹⁸ mairin tiara kau waitna tânka kaikras nani ba lika ban swis, baha nani ba lika yarka man nani wal kabia.

¹⁹ Bamna baha nani sut upla ikbia ba, apia kaka upla pruan ra kangban sa kaka, yu 7 upla tila wina utla lata tani ra kaia sa. Man nani sut bara silak ra uplika nani ba sin, yu yumhpa alkbia piua ra aima kum sunu takaia. Baha ningkara yu 7 alkbia ra kli aima wala kli sunu takbia.

²⁰ Sunu daukaia sa kwala nani ba, daiwan taya nani ba sin, guts taya ba bara dus ni daukan dukia ba sin sut.

²¹ Prîs Eleazar mita war aiklaban uplika nani ba sut ra win baku daukaia: —Naha na lâ kum sa, Dawan mita Moses ra win baku daukaia:

²² gul, silbar ni paskan dukia nani ba, bras, ayan, bras pihni daukan, apia kaka lit,

²³ pauta ra mangkan sip amras dukia nani ba sut pauta klauhan ra mangkaia ami tâskika nani sut sâkbia, tâskika sikbi sakaia laya wal sikbaia sa. Pauta ra mangkan ami luaia dukia ba, lî ni baman sikbaia sa.

²⁴ Yua 7 kat kwalka nani ba lî ni tuski tâskika ba sakaia sma, bara sunu kabia. Baha ningkara utla ra upla tilara dimaia sip kama.

War aiklaban ra dakban ba yui brin ba

²⁵ Dawan bui Moses ra win:

²⁶ “Prîs Eleazar bara tawan tâ upla nani sut hilpka wal, Madián uplika nani wina upla, daiwan bara diara nani dakbram ba yui bris,

²⁷ diara nani ba kulki bri, baikanka wâl ra sakan bara baikanka kum ba, war aiklaban nani ra yas, baikanka wâl ba war ra waras kan nani ra yama.

²⁸ Bara daiwan yang duki nani ba tnaya ra lakma, war aiklaban uplika nani ra yaia sma ba wina sâkma. Upla priski bri ba wina, bîpka wainhka nani wina, birikuka wainhka nani, sîpka wainhka kat, 500 bani wina kum yang ra aikma,

²⁹ bara baha ba prîs Eleazar ra yama yang duki.

³⁰ Israel luhpia nani ra yabisma ba daiwra nani 50 bani ba wina, kumi tnaya ra laki upla nani ba wina bris: Bîp 50 bani ba wina kumi, biriku 50 bani ba wina kumi, sîp 50 bani ba wina kumi, daiwan nani sut ba wina baku brih Libait nani ra yas, baha nani ba Dawan watla ra wark taki bamna.”

³¹ Moses bara Eleazar wal, Dawan mita dîa daukaia win ba kat daukan.

³² Waihla nani wina diara nani sut dakban ba, war aiklaban uplika nani, witin nani pat brin ba lika kulkras kata: 675,000 sîp nani bâra kan,

³³ bîp wainhka nani 72,000

³⁴ 61,000 biriku nani

³⁵ bara 32,000 mairin tiara kau waitna tânka kaikras nani ba.

³⁶ Baku bamna, war aiklaklabra nani ra bakriki yaia ba lika 337,500 sîp nani, baha wina

³⁷ 675 sîp nani Dawan dukia yan;

³⁸ bîp nani 36,000 wina Dawan ra yan ba lika, 62 bîp wainhka nani,

³⁹ biriku nani 30,500 ba wina, 61 Dawan dukia yan,

⁴⁰ tiara nani kau waitna tânka kaikras ba 16,000 ba wina 32 ba Dawan ra yan.

⁴¹ Dawan dukia nani sakan ba sut Moses mita prîs Eleazar ra yan, Dawan mita dîa lâ mangkan ba kat daukan.

⁴² Diara nani bakrikika wala ba, Israel luhpia nani dukia kan ba bara Moses mita tnaya ra sakan ba, war aiklabaia wan uplika nani dukia wina,

⁴³ baha sika wibia kaka, 337,500 ba, sîp nani, suldiar nani ra yan ba kulkanka praiska ba kat,

⁴⁴ 36,000 bîp wainhka nani,

⁴⁵ biriku nani 35,500

⁴⁶ bara tiara aihwa nani 16,000

⁴⁷ Baha nani ba wina Moses mita handat bakriki bani ba wina kumi sakan, daiwan bara upla nani ba wina sin, bara Libait nani Dawan watla ra wark dauki nani ba ra yan, Dawan mita dîa lâ mangkan ba kat daukan.

⁴⁸ Bamna war aiklaklabra nani 1,000 bara 100 nani tâ bri kan nani ba balan, Moses ra wan,

⁴⁹ bara aisi banhwan: “Yang nani na man nani albikam nani, war aiklaklabra nani ba kulki kaiki banhri kumi sin pruras sa.

⁵⁰ Bamna gul dukia nani witin nani wal prawan brih balan ba nâra sa: bangkil nani, mihta lula mangkaika dukia nani, mihtadingka, kiamka lula nani bara sakahkaia dukia wala nani sin Dawan ra yaia, swaki wan sakan ba mana.”

⁵¹ Bamna Moses bara Eleazar wal baha gul dukia nani ba witin nani wina brin.

⁵² Baha 1,000 aiklaklabra nani, 100 aiklaklabra nani daknika tâ bri kan nani, ai prisantka yabaia gul nani bri balan ba sut 400 paun pura kan,

⁵³ kan war aiklaklabra nani ai waihla nani wina dîa dakban ba wina kumi bani diara brih balan.

⁵⁴ Baku bamna, Moses bara Eleazar wal, war uplika tâ brin nani gul bri balan ba brin bara asla takaia tintka watla ra brih wan, baku Dawan bui Israel luhpia nani dukiara luki ban daukan.