Kulki Kaikanka 30 - DAWAN BÎLA AISKA

Pramis takaia lâka nani ba

¹ Moses bal, Israel kiamka tâ bri nani ra win: “Dawan lâ mangkan sa,

² upla kum Dawan nina ra aisi diara kum daukaia aisin kaka, witin dîa dîa daukaia win ba kat daukaia sa.

³ “Mairin tiara kumi, witin kau ai aisika lâka munhtara ba, bara witin Dawan nina mâki pramis kum diara kum daukaia wisa,

⁴ bara ai aisika baha wali, witin Dawan nina mâki diara daukaia win ba, sakuna mapara diara kumi sin aisaras sa kaka, witin dîa daukaia aisin ba kat daukaia sa.

⁵ Sakuna papika ba walan ai luhpia mairin dîa daukaia wi ba papika ba âu takras sa kaka, tiara ba dîa aisi daukaia win ba daukbia, bara ai papika âu takras ba tâwan Dawan aitani kulkbia apia.

⁶ “Mairin kumi witin ai dahra yamni walras, pramis daukisa Dawan ra, apia kaka wal pramis takan ningkara witin ba ai maya brin,

⁷ bara ai maya waitna walan naha pramiska ba, sakuna baha mapara diara aisaras sa kaka, mairin ba daukaia sa ai pramiska daukan ba.

⁸ Sakuna ai maya waitna baha ba walan ba ra, âu takras sa kaka, pramis Dawan ra win ba witin daukaia apia sa, bara Dawan mita sin baha aitani kulkbia.

⁹ “Piarka mairin kum pramis takisa kaka, apia kaka wal swiaia wauhkataya ulban kaka, sakuna witin Dawan nina mâki aisin sa kaka, Dawan ra diara dauki yaia win ba witin dauki yaia sa.

¹⁰ “Ani taim mairin kum ai maya watla ra, witin Dawan ra yaia pramis taki aisin ba,

¹¹ bara maya waitna ba ai maya mairin dîa Dawan ra daukaia aisin ba walan, sakuna diara aisaras sa kaka, witin dîa daukaia win ba kat daukaia sa.

¹² Sakuna ai maya waitna baha walan bara apia wisa kaka, witin dîa pramis takan ba daukaia apia sa, kan ai maya apia win ba mita, bara Dawan sin aitani kulkan sa.

¹³ “Maya waitna baman lâ brisa ai maya mairin dîa pramis daukan ba, Dawan nina mâki yarka ai maya mairin ba daukbia kaiki plun wahwaia ba.

¹⁴ Sakuna maya waitna mita mapara diara aisaras sa kaka, bara baku baman sip sa kaka, maya mairin Dawan ra dîa daukaia aisin ba daukaia.

¹⁵ Sakuna maya waitna ba baha walan ba ningkara, ai maya mairin ba swika ai pramiska daukras sa kaka, witin pâtkira takisa ai maya mairin Dawan ra dîa daukaia wisi daukras ba mita.”

¹⁶ Naha lâka nani sika Dawan mita Moses ra yan ba, mairin ai maya bara waitna ai maya ba wal dukiara, aisa ba ai luhpia mairin wal dukiara, mairin tiara aihwa pali kau ai papika wina hilp brisa kaka baku daukaia sa.