Kulki Kaikanka 28 - DAWAN BÎLA AISKA

Yu bani Dawan ra diara yaia lâka ba

¹ Dawan ba Moses ra aisi, naku win:

² “Israel luhpia nani ra wis, ai âuya tikbiara witin nani yu bani naku dauki kaia lilia daukaia piua ra, diara aikaia ba piua kat aiki kabia, brit aikaia ba ai kupia aiska wina aikbia, kîa pain, yang aitani kulkisna ba kat angki aikbia.

³ “Naha sin witin nani ra wis, naha prisantka nani na yu bani angki aiki kaia sa, ai piua kat, yamni ai kulki ba lâka ra, sîp lupia wâl taya watawan âpu ba.

⁴ Kumi ba titan ra aiska angki aikbia, wala ba tutni ra aiska angki aikbia.

⁵ Plun sâtka nani wina prisantka bri balaia ba, plawar 4 paun pura brih, oliv batana litro kum laiki akbia.

⁶ (Sainai ra sika witin nani yu bani baha sakripaiska dauki aiki kan, kîa pain angki dauki Dawan ra yabi kan, kîa pain Dawan kiawali ba.)

⁷ Wain prisantka yabaia ba naku daukbia, sîp bani dukiara wain litro kum bribia. Wainka na altar purara laikaia Dawan ra yamni kulki. Bamna titan sîp kum, wain litro kum brih prisantka ba daukbia.

⁸ Bara tutni sîp wala ba ikbia, titan nahki daukan ba baku daukbia, sakuna baha purara prakbia barli mâ nani prisantka bara wain ba sin, Dawan ra yamni kulkanka yabaia, witin kîa pain kiawali prisantka ba.

Ris yua prisantka nani ba

⁹ “Ris yua nani ra man nani sîp wainhka wâl, mani kum bri ba, watawan âpu ba yabaia sma, bara plawar kau pain ba 9 paun prais, batana laya ra akbi, barli mâ sâtka nani prisantka daukbia, bara wain laya sin bri balbia.

¹⁰ Sabat bani daiwan aiska angki yaia sakripaiska ba dauki kaia sa, wain laya yaia prisantka ba sin, bara yu bani daiwan aiska angki yabaia sakripaiska ba sin.

Kati bani yabaia prisantka nani ba

¹¹ “Kati bani, baha yua pas ba daiwan aiska angki Dawan ra yabi kaia, baha lika bîp lupia wâl, sîp wainhka kumi, baha sîp lupia ba mani kumi alkan kaia, taya sauhkan âpu ba.

¹² Bîp lupia kumi angkaia dukiara plawar kau pain ba 6 paun bribia bara batana laiki akbia, sîp wainhka kumi angkaia plawar paun walhwal bribia, bara batana laiki akbia,

¹³ sîp lupia kumi bani ba dukiara angkbia plawar kau pain ba paun wâl, bara batana laiki akbia. Baha ba lika kîa pain angki Dawan mayuni kulkanka yabaia daukbia.

¹⁴ Bîp lupia bani ba angkaia wain batil wâl yan kaia sa, baha sika aiska angkan kabia, mani aiska kati bani sakripaiska ba dauki kabia.

¹⁵ Yu bani daiwan aiska angkaia ba purkara, guts lupia kum Dawan ra angki yan kabia saurka dauki ba mana, wain prisantka sin yabaia.

Insal luan Yua prisantka yabaia

¹⁶ “Mani tâura kati pas ba, yua 14 Insal luan Yua Liliaka ba daukbia, Dawan ra mayunaia dukiara.

¹⁷ Bara yua 15 ba lika, lilia tara daukaia yua kabia. Wik kum brit îs mangkras angki pi kabia.

¹⁸ Baha yua pas nani ra sunu takaia lâka ba pas daukbia. Bara baha yua man nani wark wala sâtka kumi sin daukpara.

¹⁹ Sakuna daiwan aiska angki Dawan ra yabaia warkka baman daukma, bîp wainhka wâl, sîp wainhka kumi, sîp lupia mani kumi bri ba 7 taya sauhkan âpu nani ba bri balbia.

²⁰ Baha sakripaiska nani ba purara, sakripais wala nani na sin daukbia, batana laya ni plawar ra laiki akbi prisantkam yabaia, baha ba naku daukma: Bîp wainhka kumi angkaia plawar 6 paun brima, sîp wainhka kumi angkaia plawarka paun walhwal brima,

²¹ bara sîp lupia kumi bani ba angkbia plawar paun wâl ba aikuki.

²² Bara guts lupia kumi sin aiska angki daukbia, saurka swih tikan lâka briaia ba mana.

²³ Baha sut ba sin, wîna aiska angki yabi ba purara praki angki kabia, titan bani, yu bani sin.

²⁴ Witin nani baku dauki kabia yu 7 lilia dauki kaia yua kumi bani ba, kîa yamni angki daukan kabia Dawan ra mayunaia. Naha daukan kaia sa, wain ba wal, yu bani daiwan aiska angki yabi ba, baha sakripaiska wala nani ba sin yabi kabia.

²⁵ Yua 7 ba, man nani sut kli paiwanka tara daukma; wark wala kumi sin baha yua ra daukaia apia.

Insla disang mâ dâkaia liliaka ba

²⁶ “Plun mâ nani pas saki liliaka ra, plun disang wina barli mâ nani Dawan ra yabaia piua ra, wibia sa kaka, Wik nani liliaka ra, asla takanka sunu kum daukbia. Baha yua ra wark sâtka wala kumi sin daukan kaia apia sa.

²⁷ Daiwan aiska angkan kîa yamni Dawan ra dauki yabia, bîp lupia wâl, sîp wainhka kumi, sîp lupia mani kumi bri ba 7, taya sauhkan âpu.

²⁸ Plawar 6 paun bribia bara batana laya laiki akbia, prisantka yabaia ba sika bîp wainhka kumi angkaia dukiara, bara plawar paun walhwal bribia, sîp wainhka kumi angkaia dukiara.

²⁹ Plawar paun wâl bribia bîp lupia mani kumi bri ba kumi angkaia.

³⁰ Guts lupia kumi sin aiska angkbia, baha lika saurka swih tikaia mana.

³¹ Daiwan aiska angkaia brih aula ba, barli mâ nani, wain sin brih aula ba, baha purkara yu bani daiwan nani aiska angki ba sut taya sauhkan kumi sin âpu kaia sa.