Kulki Kaikanka 27 - DAWAN BÎLA AISKA

Selofhad luhpia nani ai raitka makaban

¹ Manasés kiamka ba tilara mairin nani ai muihni matsip bâra kan nina nani ba Mahlá, Noa, Hoglá, Milcá bara Tirsá. Witin nani ba Selofhad luhpia mairin nani kata, Héfer, Galaad, Maquir, Manasés bara Josep kiamka aihwa nani.

² Mairka nani ba ai muihni matsip ba aikuki, Dawan wal aisaia tintka watla ra dimi wan, Moses ra bara prîs Eleazar ra aisin bara tawan wihtka nani ra sin, bara witin nani ra win:

³ “Yang nani papiki ba upla iwras tasbaya ra pruan, sakuna witin ba Coré daknika Dawan mapara buata ba tilara lika apia kan. Witin luhpa waitna sakras kan, witin sin ai saurka dauki pruan.

⁴ Ban sakuna, yamni apia sa yang nani papiki nina ba ai masraka nani tila ba wina tiwaia, witin luhpa waitna sakras kan tâwan baman. Yang nani ra sin tasba pîs aikaia sma papiki muihnika nani tilara.”

⁵ Moses bui baha mairka nani makaban ba Dawan mawanra kahban,

⁶ bara Dawan bui Moses ra win:

⁷ “Selofhad luhpia mairin nani ba aitani aisisa, bamna ai papika muihnika nani tilara tasba pîs kum yaia lâka ba dauks bara papika prapatika ba witin nani ra yan kabia.

⁸ Naha sin Israel luhpia nani ra wis, upla kum luhpa waitna âpu prubia kaka, ai prapatika ba ai luhpia mairin mihta ra laki mangkan kabia;

⁹ sakuna luhpa mairin sin âpu kabia kaka, ai prapatika ba ai muihni nani ra yan kabia;

¹⁰ bara ai muihni nani sin âpu kaka, ai prapatika ba ai aisika muihnika nani ra yan kabia.

¹¹ Sakuna ai papika muihnika sin âpu kabia kaka, ai prapatika ba ai taya kau wal asla ba mihta ra mangkan kabia. Naha Israel luhpia nani tilara lâ kum kabia, yang mita baha lâka man mihtam ra mangkri ba baku dauks.”

Jasua ba Moses watlika ra mangkan

¹² Dawan bui Moses ra win: —Abarim ilka ra uli bal, bara kaiks Israel luhpia nani ra yabri tasbaya ba.

¹³ Man baha kaikma ba ningkara, pruma bara almukkam nani wal asla takma, man muihkam Eran pruan ba baku,

¹⁴ kan man nani wâlsut bîli lulkram, Sin upla iwras tasbaya ra upla nani maipara aisin ba piua ra, bara witin nani lî makaban ba piua ra man nani bui yang ra bawi ai mayunras kapram. (Naha na Meribá laya kârma dukiara aisisa, baha lika Cadés ra ba, Sin upla iwras tasbaya ra.)

¹⁵ Bara Moses bui Dawan ra win:

¹⁶ —Dawan Gâd, man sika upla nani sut ra rayaka yabisma ba; bamna witin nani wihtka kum sâks, upla nani tâura aimaki brih waia,

¹⁷ bara tâ brih wabia ani ani sut ra, baku mika sîp sepadkas baku kabia apia.

¹⁸ Bara Dawan bui Moses ra win: —Jasua Nun luhpia ba lika, spirit bri waitnika sa. Witin ba bris bara lal ra mihtam kahs.

¹⁹ Ningkara prîs Eleazar lamara upla nani kaiki ba ra yas bubia, bara witin nani sut kaiki ba ra dîa ai warkka kabia ba adarka ba yas;

²⁰ man lâ karnika alkisma lâka ba witin ra yas, baku mika Israel luhpia nani sut mita ai bîla walbia.

²¹ Sakuna Jasua ba prîs Eleazar mawanra buaia sa, bara prîs Eleazar ai nina ra luki Urim bâk yang ra ai aisabia. Jasua mita Israel luhpia nani ra lâ nani mangki yabi kabia, dîa dîa sut daukaia ba.

²² Moses daukan dîa daukaia Dawan mita win ba kat. Witin Jasua ra wan, bara prîs Eleazar lamara upla nani sut kaiki ba ra sin yan buan.

²³ Witin Jasua lal ra ai mihta nani kahban, witin dîa pali daukaia kan ba sin win, Dawan mita bâk dîa lâ win ba lâka kat.