Kulki Kaikanka 25 - DAWAN BÎLA AISKA

Israel luhpia nani Baal-peor ra mayunan ba

¹ Israel luhpia nani Sitim ra ai watla mâkan ba piua ra, waitna nani ba Moab mairka nani wal saura dauki banhwan.

² Mairka nani ba mita witin nani ra paiwan ai gâdka nani ra sakripais dauki yaban piua ra. Bara Israel luhpia nani ba sin baha pata ba pih, Moab uplika nani gâdka ra bawi ai pura suni mayuni banhwi kan.

³ Bara baku ban swin, Baal-peor mayunaia lâka ba mita raski brih wan. Bamna Dawan lawan Israel luhpia nani mapara,

⁴ bara Moses ra win: —Kiamka nani wihtka bani ba paiws asla takaia, bara kakna ra yang kaikisna ba ra witin nani ba iks. Bara baku lika lawanki Israel mapara ba wiria mâyara iwbia.

⁵ Bamna Moses bui Israel kiamka wihtka bani ra win lâka na daukaia: —Man nani kumi bani kiamkam waitnika nani kiamkam tilara Baal-peor ra mayunaia wan nani ba, iki banhwaia sma.

⁶ Sakuna Israel waitnika kum Madián mairka kum ai watla ra brih wan, Moses kaiki kan ba ra, Israel luhpia nani sut sin kaiki kan witin nani Dawan wal aisaia tintka watla dimaika ra aidrubi, ini banhwi kan ba piua ra.

⁷ Finees, Eleazar luhpia, Eran mulika, witin naha na kaikan ba ra, Israel luhpia nani asla takan ba tila wina takan, bara ai mihta ra langsa kumi brin,

⁸ bara Israel waitnika ninara wan tintka watla ba kat; bahara waitnika biara ra saban bara mairka ra sin. Bara Dawan lawanka mita upla nani prui kan ba baku dauki takaskan.

⁹ Ban sakuna, uplika nani ba pat 24,000 pruan kan.

¹⁰ Bamna Dawan ba Moses ra aisi, naku win:

¹¹ —Finees daukan ba mita, Israel luhpia nani mapara lawanki ba wiria takaskamna. Yang baha nani tâwan lawisna ba baku, witin sin tâwan lawi kan. Baha mita lawanki aiska ba witin nani mapara brih waras takaskri.

¹² Bamna wis, yang lika witin wal kupia kumi lâka daukuna,

¹³ bara witin ra, ai kiamka nani ra sin kahbuna, prîs aimaki kaia warkka ba witin nani ai warkka ban kabia, yang tâiwan lawaia ba bara Israel luhpia nani pâtka swih tikaia lâka nani sin.

¹⁴ Baha Israel waitnika Madián mairka kum wal ikan ba, waitnika nina ba Zimrí, Salú luhpia bara Simian kiamka wihtka kan.

¹⁵ Madián mairka ba nina Cozbí, Sur luhpia mairin, witinka lika Madián kiamka daknika wihtka kata.

¹⁶ Dawan ba Moses ra aisi, naku win:

¹⁷ —Madián uplika nani mapara taki aiklabi pura lus,

¹⁸ witin nani ai kuninka lâka dauki man nani ra mai munan, man nani Baal-peor ra pura suni mayunaia, Cozbí daukan ba baku. Sur luhpia mairin ba, Madián uplika nani daknika kum wihtka kan ba, langsa kumi ni sabi ikan, Baal-peor ra ai pura suni mayunan tâwan pruaia pâtka ra blikri bara ikri.

Upla nani ba kli kulki kaikan

¹⁹ Pruaia pâtka ba luan ningkara,