Kulki Kaikanka 24 - DAWAN BÎLA AISKA

¹ Sakuna Balaam kaikan Dawan ba aitani lukisa Israel luhpia nani ra yamni wiaia, bamna witin kli Dawan wina dahra aisaia bîla ba briras kata, tâura daukan ba baku, sakuna ai mawan upla iwras tasbaya tani ra tawi kaiki kan.

² Bara Balaam kaikan, Israel luhpia nani ba ai watla mâkan ba ai kiamka nani 12 ba kulkan ba kat, bara Gâd spiritka witin purara balan.

³ Bara Balaam diara takaia ba kaikbia bîla nani ba aisin: “Balaam sturka, witinka Beor luhpia ba, nakra ingni bara laih wina param pali diara kaiki waitnika ba,

⁴ yaprisauhkan kaiki baku witin ra marikan, bara witin kau pain tânka brin. Karnika sut bri Gâdka aisi ba wali, witin aisaia bîla ba brin.

⁵ ¡Jekob, tintkam watla nani ba yamni pali sa! ¡Israel, man nani takaskisma watla ba pranakira sa!

⁶ Sila dusa nani ai lainka ra pâwi baku, awala lamara tangni giadinka ba baku, alus dusa nani Dawan mita mangkan pâwisa, yalam dusa nani lî lamara.

⁷ Israel luhpia nani lî manis diaia bribia, bara diara mangkan nani ba ra laikaia sin. Witin nani kingka ba mita Agag pura lubia; kingka karnika ba tara pali kabia.

⁸ Witin nani ra Gâd mita Idsip wina sakan, witin ai karnika tara brisa, bîp bul tara aringka nani ba baku. Israel luhpia nani mita kiamka wala ai waihla nani ra sut âpu daukbia; dusa nani ba sut krikbia, bara pantamangka bri ba ni sabia.

⁹ Witin nani ba bahara yapisa layan baku, upla kumi sin wih rakaia munbiara. ¡Yamni mai muni uplika ba, yamni munan kabia, lahtubi mai munbia uplika sin, lahtuban kabia!”

Diara takaia ba dahra Balaam aisan ba

¹⁰ Balac walan witin aisin ba, bara Balaam mapara ai kupia sauhkan, bara ai mihta pruki aisin: —Yang mai paiwri waihli nani ra lahtubaia, sakuna naha kat aima yumhpa man yamni ni munisma.

¹¹ Bara kau kanra yamni sa, wamtla ra mahka wama. Yang pramis mai munri mayunra tara maikaia, sakuna Dawan mita baha yamnika ba takaskan.

¹² Bara Balaam witin ra pana win: —Man upla nani yang ra blikram ba ra pat wîri

¹³ gul bara silbar nani king ai watla ra auhbi bri ba sut aikbia sin, yang sip Dawan bîla lulkamna apia, diara yamni, diara saura sin yang kupi lâka ba kat daukamna apia. Sakuna Dawan dîa ai wi ba baman aisi kamna wîri.

¹⁴ Baku ba ra tasbayi ra kli mahka auna, sakuna kau waras sna ba ra, mai wiaia sna naha uplika nani naika dîa daukbia ba man uplikam nani ba wal.

¹⁵ Bamna Balaam naha bîla nani na aisin, naika diara takaia ba: “Balaam sturka, witinka Beor luhpia ba, nakra ingni laih wina param pali diara kaiki waitnika ba,

¹⁶ yaprisauhkan kaiki baku witin ra marikan, bara witin kau pain tânka brin, karnika sut bri Gâdka aisi ba wali, witin aisaia bîla nani ba brin.

¹⁷ Naika diara takaia ba kaikisna, diara kaikisna, sakuna kau laihura pali sa: Jekob wina takaia slilma kum lakwisa, Israel luhpia nani tilara king kum aula. Moab lal ba dakbia, Set kiamka nani ba sut ai mina ra taibia.

¹⁸ Edom pura lubia, ai waihla Seír ba ai karnika ra alkbia. Israel ba diara tara bara sibrinkira warkka nani daukbia.

¹⁹ Pura lalura kum Jekob wina bal takbia, bara tawan ra kau takaskan nani ba sut âpu daukbia.”

²⁰ Bara Balaam bui Amalec lilka kaiki, naha dahra na aisin: “Amalec ba nisan kum yamni kulkan sa, ban sakuna sauhki âpu pali tikan kabia.”

^21-22 Baku sin quenita nani ra kaiki, mahka naha dahra aisin: “Ken kiamka nani: yukuwaikam nani ba karna kabia kra, man wamtla ba sin walpa nani tilara brima kra, baha watla ba pauta mita âpu daukan kabia, Asiria nani bal mai priski mai brih wabia.”

²³ Baha ningkara kli naha dahra na aisin: “¡Alai! ¿Ya kau raya kabia ni Gâd naha diara nani sut dauki ba ra?

²⁴ Chipre wina, kabu tani wina sin duri tara nani aula, Asiria Éber wal ba sauhki swibia, Éber ba sin sauhki tikan kabia.”

²⁵ Naha aisin ba ningkara, Balaam yabal ra aimaki mahka ai watla ra wan, Balac sin mahka ai yabalka ra wan.