Kulki Kaikanka 21 - DAWAN BÎLA AISKA

Hormá ra Kenan uplika nani ra pura luan

¹ Kena kingka Arad wina ba, Négueb ra iwi kan ba, witin walan Israel uplika ba Atarim yabalka bâk aula. Bamna taki wan mapara aiklabaia, bara tila nani ba alki priskan.

² Bara Israel luhpia nani Dawan ra ai pura sunan ai tâ baiki baha kuntrika ba yaka pura lubia kaka, witin nani aiklabi kuntrika ba sut âpu pali daukaia.

³ Israel luhpia nani makabanka ba Dawan walan bara tâ baikan Kenan uplika nani ra pura luaia, bara Israel luhpia nani mita Kenan uplika nani ra âpu pali daukan bara tawanka nani ba sin, baha tâka sika pliska ba nina Hormá mâkan.

Bras piutka ba

⁴ Israel luhpia nani Hur ilka bâk taki Kabu Pauni ra waia yabalka bâk impakan, yabal krutni kum tawaia kan, Edom piarkika bâk luaia apia dukiara. Yabal ra, upla nani sip ai kupia alki takaskras taki banhwan,

⁵ bara witin nani mahka Gâd bara Moses mapara rangbi aisi banhwan, bara win: —¿Man nani dîa muni Idsip wina wan sakram ki? ¿Naha upla iwras tasbaya ra pruaia dukiara? Nâra yang nani lî âpu, plun sin âpu. ¡Yang nani nâra plun saura pin baman swapi banhri!

⁶ Bara Dawan mita piuta puisinkira nani blikan, uplika nani ba saman, bara Israel luhpia nani ailal pali pruan.

⁷ Bara upla nani ba plapi wan Moses bâra kan ba kat, bara win: —¡Yang nani Dawan mapara saura aisari, bara mampara sin aisi banhri! ¡Bamna Dawan ra makas naha piuta saura nani ba sut yang nani wina sâkbia! Bara Moses bui Dawan ra makaban, upla swakwanka ba ban swih tikbia.

⁸ Bara Dawan bui witin ra win: —Bras ni piuta kum paskma baha piutka ba wal baku, bara dus kum tâura wilki purara pami swis. Ani uplika ra piuta sambia kaka, uplika ba baha dusa ra bras ni piuta paskan ba ra kaikbia bara prubia apia, rawi bûi kabia.

⁹ Bamna Moses bras piutka ba paski, dus kum ra paman, bara piuta saura ba mita saman uplika ba, bras piutka ra tawi kaikuya ba ra, rawi kan.

Plis nani ra takaski impaki kan

¹⁰ Bamna Israel luhpia nani ban impaki Obot kat wih takaskan.

¹¹ Obot wina taki impaki, Iié-abarim ra takaskan, diara sip pawras tasbaya ra, Moab tasbaya piarkika lalmika tani ra.

¹² Baha wina kli taki impaki, Zéred tingnika ra takaski bahara ai watla mâki banhwan.

¹³ Baha wina impaki banhwan ba, Arnón awala yahbra tani baila wala ra takaski, ai watla mâki banhwan. Naha awalka na upla iwras tasbaya ra sa, baha lika amorreo nani tasbaya wina drawi ba, bara Moab uplika nani wihki amorreo nani tasbaya piarkika ba lamara.

¹⁴ Baha dukiara sika aisi ba, Dawan War Aiklabanka nani Wauhkataya ulbanka ra wi yaba: “Yang nani Sufá tasbaya ra Vaheb bâk lui wari, tingni nani bâk bara Arnón bâk sin,

¹⁵ bara tingni nani un bâk, baha nani impaki Ar ra waia tasbaya kat wi ba, bara ban Moab tasbaya ra waia piarkika bâk wisa.”

¹⁶ Arnón awala wina, Beer kat wi banhwan. Bahara liwanhta kum sa, baha layawanhta ba ra sika Dawan bui Moses ra win: “Upla nani ba asla dauks, bara yang bui witin nani ra lî yabamna.”

¹⁷ Baha piua ra sika Israel luhpia nani ba aiwanan: “¡Lî, liwanhta ba wina bal taks! ¡Liwanhta ra aiwani banhs!

¹⁸ ¡Wihtka nani ba bui ai karnika kînka ni salhki banhwan, upla tara kulkanka nani ba sin kîn nani bri kan ba wal salhkan!” Upla iwras tasbaya ba wina ban impakan, witin nani Mataná kat balan;

¹⁹ Mataná wina Nahaliel kat, Nahaliel wina Bamot kat,

²⁰ Bamot wina Moab tasbaya ra il bîla langnika ba kat, baha wina Pisgá ilka bahna ba kat, baha wina sika upla iwras tasbaya ba kaikisa.

Israel luhpia nani mita Sihón pura luan

²¹ Israel luhpia nani ba Sihón ra ai bîla blikan, witin lika amorreo nani kingka ba, bara naku wibia win:

²² “Yang nani lika man nani tasbayam piarkika bâk luaia brin ai daukisa. Insla mangkan nani bâk lika luamna apia, wain nasla bâk sin apia, lamyawanhta nani wina sin lî di banhwamna apia. Yang nani ban impakamna tasbayam piarkika bâk, yabal ra aimaki banhwamna ba kat.”

²³ Sakuna Sihón mita Israel luhpia nani ba yan ai tasbaya piarkika bâk luras kan, sakuna witin ai uplika sut asla dauki, aikuki taki wan upla iwras tasbaya ra, witin nani wal prawaia, bamna Jahas ra balan ba ra, Israel luhpia nani mapara aiklaban.

²⁴ Sakuna Israel luhpia nani ba witin nani wal aiklabi pura luan, bara tasbaya ba dakbi brin Arnón awalka ba wina Jaboc awalka ba kat, wibia kaka, Amón uplika tasbaya piarkika ba kat, baha nani ba ai kaina kahbaika pain bri kan.

²⁵ Baku bamna, Israel luhpia nani ba amorreo nani tawanka nani ba sut dakbi brin, wibia kaka, Hesbón uplika nani bara ai karnika munhtara tawanka nani ba, bara Israel luhpia nani bahara takaski banhwan.

²⁶ Hesbón tawanka ba ra sika amorreo nani kingka Sihón iwi kan. Sihón lika blasi Moab kingka ba wal aiklabi tasbaya nani ba dakban kan, baha piarkika ba ban Arnón awalka kat.

²⁷ Baha mita âiulbra tara nani ba aisisa: “¡Man nani Hesbón ra aidrubi bal, king Sihón iwi yaba tawanka tara ra! ¡Baha kli paski, karna dauki banhs!

²⁸ Bamna Hesbón wina, Sihón tawanka ba, pauta klauhan kiasmika ba bal takan, Moab ra Ar tawanka nani ba âpu daukan, bara baku sin Arnón tasbaya pura nani ba.

²⁹ ¡Moab, mampara alai pali kabia! ¡Tanis tiwram sa, Quemós ra gâdkam brisma uplika nani! Gâdkam ba mita munan waitna nani ba sut plapi yukuwan, bara mairkam nani ba lika king Sihón albika takbia.

³⁰ Hesbón karnika ba âpu daukan; Dibón wina Nófah kat sut sauhkan, bara pauta klauhan ami ban Medebá kat wan.”

Israel luhpia nani mita Basán kingka Og ba pura luan

³¹ Bamna baku sika Israel luhpia nani ba amorreo tasbaya ra iwi banhwan.

³² Baha purkara, Moses sin waitna nani saki blikan wan Jazer tasbaya ba laki kaikaia, bara Israel luhpia nani tawan nani baha tnaya ra kan ba sut pura luan, bara amorreo nani sut ai tasbaya ra iwi kan ba kangbi sakan.

³³ Baha ningkara kli Basán tani ra balan, sakuna Basán kingka Og lika, war uplika nani sut aikuki taki Edrei kat wan Israel luhpia nani mapara aiklabaia.

³⁴ Bara Dawan bui Moses ra win: “Witin ba mapara si bripara, kan yang bui witin ba man nani mihtam ra mangkamna, war uplika nani ba bara ai tasbaya ba sin. Bara man nani, Sihón, amorreo nani kingka Hesbón ra iwi kan ra dîa munram ba baku, witin ra daukma.”

³⁵ Bara baku sika Israel luhpia nani mita Og bara luhpia nani ba ikan, bara war aiklaklabrika nani sut ba sin. Upla kumi sin raya swiras, tasbaya ba pura lui brin.