Kulki Kaikanka 19 - DAWAN BÎLA AISKA

Sunu takaia lâka nani ba

¹ Dawan bui Moses bara Eran ra aisi, win:

² “Yang Dawan mita naha lâka mangkisna: Israel luhpia nani ra wis, bîp mairin taya pauni kum brih balbia, taya sauhkan kumi sin âpu kabia, raskaia dusa kau lal ra wilkras ba.

³ Man nani mita prîs Eleazar mihta ra mangkma, bara witin mita latara saki brih wabia, witin kaiki kaka ikbia.

⁴ Bara prîs Eleazar bal, ai mihta sirpika tala ba ra buski, tint watla ra dimaika ba 7 taim srikban kabia.

⁵ Ningkara bîpka mairin ba, witin kaiki kaka angkan kabia, taya bara wîna ba sin, bara tâlia ba sin angkbia.

⁶ Baha ningkara prîs ba yalam dusa kum bribia bara hisop dusa tnawa luhpia sin kum bribia, bara kwala pauni pîs kumi sin. Bara baha sut asla kuki bîp mairin wîna ami ba, pauta klauhan ra baha sin angkbia.

⁷ Baha ningkara prîs ba ai kwalka nani tuski aihtabi takbia, bara baha daukbia ningkara ai watla ra wabia, sakuna lâ ba kat, tâski kulkan kabia ban tutni ba kat.

⁸ Bîp mairin angkan waitnika ba sin, ai kwalka nani ba tuskbia, bara lâ ba kat daukbia, ban tâski kulkan kabia tutni kat.

⁹ Waitna wala kum, witin lâ ba kat sunu kulkan ba, bîp mairin angkan yamhpuska ba wahbi brih, utla lata tani ra plis kumi tâski âpu ba ra swibia. Baha yamhpuska ba Israel luhpia nani sikbi sunu sakaia laya ba ra mangkbia, baha daukan sut ba lika saura dauki ba mana prisantka yabisa.

¹⁰ Ani uplika yamhpus asla daukan ba, ai kwalka ba tuskan kabia, bara lâ ba kat tutni kat tâski kulkan kabia. Naha na lâ kum, man nani baku dauki ban kama, man nani Israel luhpia nani kulki kama, baku sin kiamka wala nani man nani tilamra iwi ba sin ban kulkan kabia.

¹¹ “Ani uplika upla pruan kum ra alkbia kaka, yu matlalkahbi pura kumi tâski kulkan kabia.

¹² Yu yumhpika bara yu matlalkahbi pura kumika alkbia ba ra, witin baha laya ba ni sikbi sunu takbia. Bamna yu yumhpika bara matlalkahbi pura kumika ra klin takras sa kaka, sunu takbia apia.

¹³ Upla kum upla pruan ba alkbia ba ra sunu takras sa kaka, Dawan watla sunu ba sauhkisa. Baku bamna, Israel luhpia nani tila wina sakan kaia sa, kan witin sunu saki laya ba ni srikbras kan bamna, witin lika tâski ban sa.

¹⁴ “Upla kumi ai watla bilara prubia kaka, naku sa baha lâka nani ba mapara: Baha watla bilara uplika nani ba sut, upla wala ai watla ra diman ba sin, yu matlalkahbi pura kumi tâski kulkan kabia.

¹⁵ Lî watla nani sut ba pura prakras sa kaka, apia kaka pura bika ba pain prakras kan kaka, baha laya ba sut tâski kulkan kabia.

¹⁶ “Upla kum ra upla wala mita ikan ba, apia kaka ban pruan ba, upla kum pruan dusa nani ba, apia kra raiti kum ra ya ya mihta baha nani kangbia kaka, baha uplika yu matlalkahbi pura kumi tâski kulkan kabia.

¹⁷ “Bahmuna tâskika nani ba sikbaia dukiara lika, naku daukbia: Saura daukan ba mana, bîp mairin iki aiska angkan yamhpuska ba wiria bribia lî watla kum ra, bara lî kârma wina panhkan laya sin purara laikbia.

¹⁸ Baha ningkara waitna kum sunu ba, hisop tnawa lupia kumi brih, liura buski bara baha watla ra srikban kabia. Lî watla nani ba bara upla nani sin bahara kan ba, upla pruan dusa nani ra kangban ba, ban kra upla kumi mita upla wala kum ra ikan, apia kaka upla ban pruan ba alkan ba, ban kra raiti kum ra kangban ba sut.

¹⁹ Waitna kum lâ kat sunu ba, witin mita tâski takan uplika ra yu yumhpa ra bara yu matlalkahbi pura kumi ra sin lî ba ni srikbaia sa. Bara yu matlalkahbi pura kumi yua ba kat sunu kulkan kabia, bamna upla tâski ba ai kwalka nani tuskbia, bara lî ni aihtabia, sakuna ban tutni kat tâski kulkan kabia.

²⁰ Bamna lâ ba kat tâski kulkan uplika ba, sunu takras sa kaka, uplika ai kiamka ba tila wina dakbi sakan kabia, kan Dawan tintka watla sunu ba bahki kulki ba mita. Witin sunu saki laya ba ni srikbras kan ba mita, witin ba ban tâski kulkan sa.

²¹ Naha lâka na man nani kulki ban kama. Upla mita upla wala ra sunu saki laya ni srikbi ba, witin ai kwalka ba tuskaia sa. Ya ya sunu sakaia laya ba ra kangbia kaka, witin ba tutni kat tâski kulkan kabia.

²² Tâski kulkan uplika ba, dîa dukia ra kangbia ba sut lika, tâski kulkan kabia. Ya ya tâski uplika kum ra alkbia kaka, witin sin tutni kat tâski kulkan kabia.”