Kulki Kaikanka 18 - DAWAN BÎLA AISKA

Prîs nani bara Libait nani warkka pali ba

¹ Dawan mita Eran ra win: “Man bara luhpiam nani aikuki, Libai kiamka daknika uplika wala nani ba sin, holi pliska ba mapara saura daukbia kaka, baha pâtka ba man nani puramra kabia. Sakuna man bara luhpiam wal, prîs warkka dauki si saura daukma kaka, saurka pâtka ba man nani baman lamla purara kabia.

² Sakuna tamya nani Libai kiamka wala nani ba bri bal, aisikam kiamka nani, hilp mai munbia wark ba daukaia tint watla ra.

³ Witin nani ba man mihtam ra sa bara tint watla ra warkka daukaia sin, sakuna holi pliska ra wark daukaia dukia nani ba lamara lika wabiara, kîa yamni angkaia pliska ba lamara sin wabiara, kan sip sa prui banhwaia, man nani sin.

⁴ Tint watla bilara dîa warkka daukaia bâra kabia ba, man bui witin nani wal aikuki asla daukma. Sakuna kiamka wala uplika kumi sin, man nani lamamra wabia apia.

⁵ Man nani baman mihtam ra sa, holi pliska ba ra, kîa pain angkaia ba, altar ba sin. Baku daukma ba ra, Israel luhpia nani mapara kli kupi baikamna apia.

⁶ Yang mita muihkam Libait nani ba Israel wala nani tila wina aihka sakri, witin nani ba man nani ra maikaia, bara baku witin nani sin asla takaia tintka watla ra wark daukaia;

⁷ sakuna man nani bara luhpiam nani baman sip sma prîs warkka ba daukaia, baha kîa pain angkaia watlika ra, kwala paman ba nina tani ra; baha warkka nani ba man nani mihtam ra sa, bamna prîs warkka daukaia yang mita mihtam ra mangkri. Ani uplika prîs apia, sakuna ban prîs warkka daukbia kaka, witin ba pruaia pâtka ra lakan kabia.”

Prîs nani bara Libait nani kaina sunaia lâka ba

⁸ Dawan bui Eran ra win: “Upla nani ai prisantka aikaia ba mihtam ra swiri sa. Israel luhpia nani diara sut yang ra aikaia aihka saki ba, man ra maikisna, luhpiam nani ra sin. Baha ba man nani briaia kulkan sa; naha lâka na baku kulki ban kabia.

⁹ Plun mâ sâtka nani prisantka, saura daukan ba sakripaiska daukaia prisantka, swakwanka nani daukan ba sakripaiska daukaia prisantka yang ra angki aikaia Israel luhpia nani brih balbia ba, baha sut ba man bara luhpiam waitna nani dukiam sa.

¹⁰ Man nani tilamra upla nani ba sut sip kabia baha wina piaia, upla nani ai prisantka diara nani brih aula ba. Sakuna sunu daukan pliska kum tâski âpu ba ra pibia, kan diara nani ba tâski âpu daukan ba mita.

¹¹ “Baku sin yang bui man ra maikisna luhpiam waitna bara luhpiam mairin nani ra sin, witin nani man wal asla iwi kaka, Israel luhpia nani baha prisantka nani saki yang ra brih bal ba wina piaia, naha na lâ kumi piua sut ra ban alki kabia.

¹² Baku sin yang maikisna, Israel luhpia nani mani bani mâ tawahkia sal aiki ba, batana kau pain aiki ba, wain kau pain ba bara plawar mâ kau pain nani aiki ba sin.

¹³ Baku sin insla mâ tawahkia nani wina yang ra aikaia brih aula ba sin, man ra maikisna. Ya ya man wamtla ra ba sunu sa kaka, witin sin sip sa baha piaia.

¹⁴ Israel luhpia nani ai prisantka nani aiki bani ba sunu saki, baha lika man dukiam kabia.

¹⁵ “Israel luhpia nani ai luhpia waitna tawahkia bani, bara daiwan tawahkia nani sin yang ra aiki ba, man dukiam kabia. Sakuna luhpia waitna tawahkia nani bara daiwan tawahkia bani ba tâski sa kaka, baha watlika ra wala kum maikbia wis.

¹⁶ Pura mana aibapaia ba lika, aisubi takan ba wina kati kum alkan ba kat kabia, bara ibapaia ba lika silbar mâ matsip kabia, tint watla lalahka kulkanka praiska ba kat, baha ba 11 auns wirhika bri kabia.

¹⁷ Sakuna daiwan nani tawahkia nani pura mana aibapaia lâ daukpara, kan baha nani ba ikaia sakripais daukaia sa, bîp nani ba, sîp nani bara guts nani ba sin. Baha nani ba apahki bris, yang duki, bara man ikaia kama, bara tâlia ba lika aiska angkaia altarka purara bri si laikma, bara batanka ba sin, ai prisantka kîa pain angki aikuya baku kabia.

¹⁸ Daiwra wîna ba lika man sip sma briaia, lama dusa wîna ba sin briaia sip sma, yang ra aikaia prisantka ba, bara kuhma aihkika tani ba sin brima.

¹⁹ Upla nani ai prisantka yang ra aikaia brih aula ba sut, man nani ra maikisna, luhpiam waitna bara luhpiam mairin nani ra, witin nani wamtla ra kau man wal bâra ba. Lâ kum man nani wal yang daukisna, naha sip kli aihka tawaia apia sa baku dauki ban kaia.”

²⁰ Bara Dawan bui Eran ra win: “Man lika Israel luhpia nani tilara tasba brima apia, baku sin diara wala nani âpu kama. Sakuna man diara sut briaia sma ba, yang maiki kamna.

²¹ Libait nani ra lika, upla nani diara matawalsip bani wina kumi yang ra aiki kaia ba, baha yama, tint watla ra witin nani wark dauki ba mana baha bri kabia.

²² Israel uplika wala nani ba sip apia sa tint watla holi pliska ba lamara waia, kan saurka dauki ban wabia kaka, sip sa pruaia.

²³ Libait nani baman sip sa tint watla ra wark daukaia, dîa saura kum daukbia kaka, baha lika witin yakan pâtkira sa. Naha na lika lâ kum baku ban kaia sa, aisika ba wina ban luhpia nani kat. Libait nani ba tasba kum ai dukia pali briaia apia sa, Israel luhpia nani tilara.

²⁴ Witin nani briaia yâri sa, Israel luhpia nani ai pata mâ wina matawalsip mânka ba ai prisantka bri sal aikaia ba briaia. Baha mita sika yang wîri, witin nani ai dukia wisi tasba kum saki briaia apia sa Israel luhpia nani tilara.”

²⁵ Dawan ba Moses ra aisi, naku win:

²⁶ “Libait nani ra wis, Israel luhpia nani yang ra aikaia plun mâ nani matawalsip mânka bri balbia ba wina witin nani bribia, bara baha nani yang mita ai dukia wisi yâri ba wina, matawalsip mânka ba saki yang ra aikbia.

²⁷ Baha matawalsip mânka aikbia ba sika, Israel luhpia nani ai nasla ra plawar mâ ba wina, ai wainka wina sal aikaia kan ba mana brisna.

²⁸ Israel luhpia nani matawalsip mânka aiki ba baku, Libait nani sin diara bribia ba wina tnaya ra lakbia Dawan dukia, bara baha ba prîs Eran ra yabia.

²⁹ Dîa diara nani sut witin nani ra yabia ba wina, matawalsip bani ba wina, kumi tnaya ra lakbia yang ra aikaia. Bara dîa dukia yang ra aikaia sâkbia ba, baha ba tâski âpu kaia sa, bara diara kau yamni kabia.

³⁰ “Bara sin wis, witin nani diara kau yamni ba, yang ra aikaia dukiara tnaya ra lakbia. Tâka ba lika witin nani bribia, ai plawarka bara ai wainka ba

³¹ witin nani piaia sip sa, ai luhpia nani aikuki, ani anira kabia, iwi piaia sip sa. Baha ba lika witin nani tint watla ra wark taki ba mana kabia.

³² Ani piua diara kau yamni ba yang ra aikaia sâkbia ba ningkara, dîa kau tawbia ba, witin nani pibia. Bara saura tâski kulkbia apia, baku dauki kabia bara Israel luhpia nani diara prisant aiki ba sunu kulkan kabia. Bara prura pâtka ra sin, witin nani ra alkbia apia.”