Kulki Kaikanka 17 - DAWAN BÎLA AISKA

Eran kînka ba pâwan

¹ Dawan ba Moses ra aisi, naku win:

² “Israel luhpia nani lalka bani ra wis, witin nani, kumi bani kîn kumi brih balaia, bara asla lika 12 kîn kabia. Bara man mita witin nani bani nina ba kînka ba ra ulbi yas,

³ bara Libai kiamka nani kînka ra, Eran nina ba ulbi yama, kan kiamka bani wihtka dukiara kîn kum bâra kaia sa.

⁴ Baha nani Dawan wal aisaia tintka watla ra bri si swima, lâ auhban bakska ba lamara, baha sika yang bâra man nani wal aisi kaia sna ba.

⁵ Bâk wahbi sakri waitnika kînka ba, yarka pâwbia, bara baha kaiki Israel luhpia nani kli maiwanra man nani dukiamra saura aisabia apia.”

⁶ Baha sturka Moses bui Israel luhpia nani sut ra maisa pakan, bara kiamka bani wihtka ba wina, kîn kum witin ra yan, bara sut ba ra 12 kîn nani bri balan. Baha tilara Eran kînka sin bâra kata.

⁷ Bamna Moses bui baha kînka nani ba sut, Dawan lamara witin kaiki ba ra tint watla ra bri si swin,

⁸ Yapra wala, Moses tint watla ra wan ba ra, witin kaikan Eran kînka, Libai kiamka nani witniska bâra ba, urhwi takan bara tangnika baiwan kan, bara amans pâwan nani bâra kan.

⁹ Bara Moses bui Dawan lama wina kîn nani ba sut saki, Israel luhpia nani ra marikan. Baha nani kaikan bara kumi bani ai kînka ba brin.

¹⁰ Bara Dawan bui Moses ra win: “Eran kînka ba kli bri si, wal lâ daukan lâka auhbaia watla ba lamara swis. Bahara bri bas, baha ba naha uplika kiamapara nani ra kupia kraukanka kum kabia. Baha kaiki ba ra witin nani maipara saura aisabia apia, bara sin prui banhbia apia.”

¹¹ Bamna Moses lika Dawan bui witin ra dîa daukaia win ba kat daukan,

¹² sakuna Israel luhpia nani Moses ra win: “¡Yang nani na tiwri pali sna! ¡Sut prui banhwamna sa!

¹³ Upla sut Dawan watla holi pliska lamara auya ba, prui banhwisa. ¿Bara yang nani sut na pruaia sna ki?”