Kulki Kaikanka 16 - DAWAN BÎLA AISKA

Mapara buan tâwan, Coré pât diman ba

¹ Quehat kiamka wina Libait kum, nina ba Coré, Ishar luhpia, Ruben kiamka wina kau waitna yumhpa, nina nani ba Datán, Abiram, Eliab luhpia nani, bara On, Pélet luhpia ba,

² witin nani bui Moses ra saura aisin. Bara baha nani tilara 250 Israel luhpia nani asla takan, baha nani sut ba upla nani tâ wihta aimaki kan. Witin nani ba wala nani ra lâ smalki daknika tilara kan, ai dahra upla sut yamni aisi kan.

³ Witin nani sut asla taki banhwan ba ra, Moses wihki Eran wal mapara naku aisin: —Naha kat ba aitani sa, man nani wal. Upla sut ba Gâd mita sunu atia sakan sa, bara Dawan sin yang nani wal sa. ¿Bara dîa muni man nani baman kau karnika bri baku Dawan uplika nani purara aimakisma?

⁴ Moses naha walan ba ra ban ai mawan tasba kat bawan,

⁵ bara Coré nina blablikra nani ra sin win: —Yauhka titan ra Dawan mita mamrikbia yamna witin ai uplika sa bara yamna sin sunukira sakan ba, witin nani ai lukanka yamni diara bri sal yabaia. Yamna witin mita bâk sakan ba kaikma, baha nani baman ai mawanra balbia altar ra.

⁶ Bamna man nani naku dauks: kîa yamni angkaia watlika Coré bri ba, wala nani bri ba sin bri bal,

⁷ bara baha nani masku klauhan nani auhs; kîa yamni dukia nani ba sin auhs, bara yauhka Dawan altarka ra swis. Ani waitnika ra Dawan mita bâk sâkbia ba, baha uplika sika sunukira kulkan kabia. ¡Libait nani, naha kat aitani!

⁸ Ningkara Moses kli Coré ra win: —Libait nani, yang ra man nani wals:

⁹ ¿Man nani ra baha ba diara apia sa ki, Israel Gâdka mita bâk mai sakan ba Israel uplika wala nani ba tila wina, bara man nani bui witin ai lamara Dawan watla ra warkka nani ba dauki kaia, bara upla nani wal sin baha warkka dauki kaia ba?

¹⁰ Dawan brin daukan man bara kiamkam Libait nani ba sut sin, witin ai lamara kabia. ¿Bara nanara prîs lâka ba sin brin mai daukisa ki?

¹¹ Eran ba ya wisi witin mapara saura aisisma ba, kasak pali sa man wihki uplikam nani aikuki Dawan mapara si brisma.

¹² Baha ningkara Moses bui Datán bara Abiram Eliab luhpia nani ba sin paiwan balaia. Sakuna witin nani mita pana win: —Yang nani wan ai daukras sa.

¹³ ¿Aitani apia sa ki, tasba kum tialka laya nasma wal lî laiwi baku sakram ba bara nanara upla iwras tasbaya ra wan ikaia daukisma, baha purkara man nani wan tâ uplika aimakaisma?

¹⁴ Man mita sin kau plis kumi ra sin kau wan brih waras, anira tialka laya nasma wal lî laiwi baku ba pliska ra. Man sin kau wain nasla kumi sin wankras. ¿Bara brin mai daukisa ki, upla sut na nakras baku brih waia? Apia, yang nani lika mai kaikaia wamna apia.

¹⁵ Baha nani wal aisi Moses kasak pali ai kupia sauhkan, bara Dawan ra win: —¡Ai prisantka nani maikaia brih aula ba bripara! Yang sin witin nani wina biriku kumi sin dakbi briras, baha purkara, yang bui witin nani kumi ra sin saura munras.

¹⁶ Baha ningkara Moses tawi Coré ra win: —Yauhka titan, man bara walkam nani ba aikuki, Dawan mawanra wih bûi banhs. Eran sin bahara kabia.

¹⁷ Man nani kumi bani kîa yamni angkaia dukia ba bri balma bara bilara kîa pain angkaia dukia ba sin. Man bara Eran wal sin kîa yamni angkaia dukia ba brih wama, bara man nani wal aikuki wala nani 250 ba sin Dawan mawanra bûi banhbia.

¹⁸ Bamna kumi bani kîa yamni angkaia dukia bri ba brin, bara angkaia watlika ra masku klauhan ba auhban bara kîa yamni nani sin, Moses bara Eran wal, tint watla, Dawan wal aisaia pliska ba ra wih buan.

¹⁹ Bara Coré mita Moses bara Eran wal mapara buaia wisi, pat upla nani ba paiwi, Dawan wal aisaia tintka watla latka ra wih banhwan bûi banhwi kan. Bamna Dawan prana ba latan takan upla nani sut kaiki kan,

²⁰ bamna Dawan bui Moses bara Eran wal ra naku win:

²¹ —Man nani baha uplika nani tila wina dakwi taks, yang bui witin nani ba naiwa âpu daukaisna bamna.

²² Sakuna Moses bara Eran wal bawan, ai mawan ba tasba kat bri si praki, bara win: —Ay, Gâd, man sika upla sut ra rayaka ba yabisma ba, ¿man kupiam sauhkaisma ki upla nani sut ra, upla kumi tâwan?

²³ Bara Dawan bui Moses ra win:

²⁴ —Israel luhpia nani sut ra wis Coré, Datán bara Abiram tintka watla nani ba wina tnaya ra takbia.

²⁵ Moses buan ba ra, Israel almukka nani mita sin, nina bliki ban wan Datán bara Abiram wal bâra kan ba kat.

²⁶ Bara upla nani ra win: —Baha uplika saura nani tintka watla ba wina taki banhs, witin nani dukia kumi ra sin kangpara, man nani sin witin nani saurka tâwan pruma ra sîa.

²⁷ Bara upla nani ba Coré, Datán bara Abiram bâra kan ba wina tnaya ra taki banhwan. Datán bara Abiram wal lika ai tintka watla durka ra bûi kan, ai maya bara ai luhpia nani wal aikuki.

²⁸ Bara Moses kau ban aisi, win: —Naha diara nani daukma na wal, mamrikan ai daukisa, Dawan mita ai blikan sa, naha warkka na daukaia, yang brinki kat diara daukras sna ba tânka.

²⁹ Naha waitnika nani, upla nani pruaia kan prui ba baku prubia dukiara Dawan mita ai blikras sa;

³⁰ sakuna Dawan ai warkka nani daukbia ba ra, tasba kwâki naha waitnika nani ra langkbia, diara nani bri ba sin sut, raya banhwi ba ra tasba mununhtara dimi wabia. Man nani sut mita kaikma, naha waitnika nani na sika Dawan ra bahki kulkan ba.

³¹ Moses aisi takaskan ba ra, witin nani bûi kan ba kat tasba ba kwawan,

³² bara waitna nani an pali Coré wal asla takan kan ba sut langkan, ai watla uplika nani bara dîa dîa bri kan ba sin sut langkan.

³³ Bamna witin nani pruras ban diara nani bri kan sut aikuki, tasba ai bîla kwâkan ra kauhan, tasba mununhtara ai dukia nani sut wal aikuki, bara baha ningkara tasba ba kli prawan. Baku witin nani ba Israel luhpia nani tila wina sakan kata.

³⁴ Witin nani ai pura wini, ini banhwi kan walan ba ra, Israel luhpia nani baha nani tnaya kir bûi kan ba taki plapi kan, bara aisi banhwan: “¡Tasba yawan ra sin wan langkbia!”

³⁵ Baha purkara Dawan pauta klauhan blikan bara 250 upla kan ba sin angki ikan.

³⁶ Bara Dawan ba Moses ra aisi, naku win:

³⁷ “Eran luhpia Eleazar ra wis, pauta klauhan tila ba wina kîa pain angkaia watlika nani bras ni daukan ba sâkbia, bara masku klauhan nani kau bras ni daukan bâra ba saki laihura lulkbia.

³⁸ Baha waitnika nani, kîa pain angkaia watlika nani bri kan ba, witin nani pruan saura daukan ba tâwan. Baha watlika nani ba sunu kulkan sa, kan witin nani lika yang kainira kîa pain daukaia warkka daukan; baha pânka nani ba pruki plit nani dauks altar pura prakaika, bara baha Israel luhpia nani mapa ra smalkanka tara kabia.”

³⁹ Baha waitnika nani pauta klauhan mita iki tikan nani ba, kîa pain angkaika watlika bras ni daukan brih balan kata ba, prîs Eleazar bal sut asla wahban, bara win baha nani ni kîa pain angkaia altarka ba pura prakaika paski bribia.

⁴⁰ Baha takan ba Israel luhpia nani mapara smalkanka tara kata, bara marikisa sip apia sa kiamka wala kum Eran kiamka wina apia ba, kîa pain angkaia watlika ba lamara waia bara Dawan ra kîa pain angki yaia. Baha uplika ra sip sa, Coré bara ai uplika nani ra dîa takan ba baku takaia. Bara Dawan bui Moses ra dîa daukaia win ba baku, Eleazar mita daukan.

⁴¹ Yu wala Israel luhpia nani sut kli Moses bara Eran mapara aisin: —¡Man nani mita Dawan uplika nani ba ikisma!

⁴² Bara upla nani ba Moses bara Eran wal ra kutbi brin; sakuna Moses bara Eran wal lika, Dawan wal aisaia tintka watla ra wan. Bara baha kat kasbrika bal madiskan, bara Dawan prana ba latan takan.

⁴³ Moses bara Eran wal, Dawan wal aisaia tintka watla ba lamara wan,

⁴⁴ bara Dawan mita Moses ra win:

⁴⁵ —¡Naha uplika nani tila wina tnaya ra taki banhs, naiwa baha nani âpu daukaisna bamna! Bamna Moses bara Eran wal ai lal bawi ai mawan ba tasba kat prakan.

⁴⁶ Bara Moses mita Eran ra win: —Kîa pain angkaika brisma ba wih bri bal, bara altar ba wina masku nani saki mangks, bara kîa pain nani sin mangks; baha ningkara upla nani bâra ba kat plapi was, Gâd ra makas, naha uplika nani pâtka ban swih tikbia. Kan Dawan lawanka ba pat aula sa; kaiks, pât tara ba pat tâ krikan sa.

⁴⁷ Bara dîa Moses win ba kat, Eran daukan. Witin lika upla nani bâra kan ba kat plapi wan. Pruaia pâtka ba pat upla nani ra alkan kan, bara Eran kîa pain ba angkan, upla nani tawan pâtka swih tikbia Gâd ra makaban.

⁴⁸ Bara raya nani ba pruan nani lamara bri si asla daukan, bara pruaia pâtka ba takaskan.

⁴⁹ Baha kat pruan upla nani ba 14,700 kan, bara Coré Dawan mapara buan piua ra prui tiwan nani ba lika baha tilara kulkras kata.

⁵⁰ Pruaia pâtka ba luan ba ra, Eran kli tint watla ra diman Moses wal aisaia.