Kulki Kaikanka 15 - DAWAN BÎLA AISKA

Sakripais daukaia lâka nani ba

¹ Dawan ba Moses ra aisi, naku win:

² “Israel luhpia nani ra naha sturka na wis: Man nani ba yang maikamna tasbaya ba brima bara bahara iwi banhma ba ra,

³ bahara man nani bîp wainhka kum, sîp kum aikma, baha ba angki mayunra dauki aikaia dukiara, aiska angki kîa yamni aikbia. Bahara yang wal aisi lâ daukaia, baha sin kupiam aiska ni baku daukma, man nani yua tara lilia dauki aikisma ba piua ra.

⁴ Ani uplika ai prisantka yabaia aula ba, baha purara plawar pain ba 4 paun pura brih, batana laya litro kum laiki akbi bri balbia.

⁵ Baha purkara, wîna aiska angki aikaia daiwra nani bani ba dukiara, wain batil wâl sin yan kaia sa sîp luhpia bani dukiara.

⁶ Sîp wainhka luhpia kum sakripais daukisa kaka, plawar 4 paun prais brih, batana laya litro kum laiki akbi bri balbia.

⁷ Kau baha purara wain sin batil kum bri balbia, baha ba kîa yamni angki yang ra aiki kabia.

⁸ Bîp wainhka kum aiska angki sakripais daukaia, apia kaka kli wal uplika takaia dukiara aiska angki yaia, apia kaka pramis kum daukaia sakripaiska kaka,

⁹ plawar 14 paun brih batana laya litro wâl laiki akbi bri balbia,

¹⁰ kau baha purara wain sin batil wâl, baha ba kîa yamni angki yang ra aikaia dukiara.

¹¹ Baku dauki kabia, bîp wainhka bani sakripais daukaia ba dukiara, sîp wainhka bani sakripais daukaia dukiara sin, sîp luhpia bani sakripais daukaia ba dukiara bara guts luhpia bani sakripais daukaia ba sin.

¹² Daiwan sakripais dauki prisant yabaia brih aula ba kumi bani prisantka ba naku daukan kabia, daiwan bâra ba kulkanka kat.

¹³ Israel luhpia nani sut naha lâka na kat dauki kaia sa, ai kupia aiska ni kîa yamni ba angki dauki kabia.

¹⁴ “Israel kiamka apia nani man nani tilamra ba, piua wiria dukiara apia kaka, ban man nani tilamra iwisa kaka, witin nani sin kîa yamni angki aikaia ai kupia aiska brin daukisa kaka, witin nani dîa lâka man nani daukisma na, kiamka wala nani sin kulkan kabia. Baha sin lâka kum ba, upla sut lâka sa, aisika nani wina ban luhpia nani kat.

¹⁵ Naha lâka man nani kulkisma na, kiamka wala nani sin kulkan kabia, baha sin lâka kum ba, upla sut lâka sa, aisika nani wina ban luhpia nani kat.

¹⁶ Lâ kumi baman sa kiamka wala nani sut dukiara.”

¹⁷ Bara Dawan bui Moses ra aisi, win:

¹⁸ “Naha sturka na Israel luhpia nani ra wis: Yang brih auna ba tasbaya ra wih dimbia piua ra,

¹⁹ baha tasbaya ra plawar dâki kabia ba wina, yang ra aikaia dukiara wiria tnaya ra laki swiaia sma.

²⁰ Bara baku sin, baha plawarka dâki piaia taya saki aiki daukma ba wina, prisantka brit aikma.

²¹ Naha prisantka dauki aikuma na baku, piua bani dauki kama.

²² “Moses ra wîri lâ nani daukaia, bara ya ya baha daukaia âuya tiwan sa kaka,

²³ lâ pas yâri ba yua wina ban ai kainara auya ba, man nani bara kiamkam nani sin dauki kabia lâka nani ba. Daukras sa kaka, man nani naku daukaia sma:

²⁴ “Bara saura daukan ba, ban kra witin ai kupia lâka apia kan, upla nani sin kupia lâka apia kan kaka, baku kaka upla nani sut wina bîp wainhka aiska angki kîa pain dauki aikbia, plun nani prisantka, wain sin, Gâd mita lâ mangkan ba kat. Baha purkara, guts lupia kum sin aiska angki aikbia, saurka daukan ba dukiara.

²⁵ Baha ningkara, prîs mita Israel luhpia nani sut saurka swih tikaia pura sunra warkka ba daukbia. Bara yang mita saurka ba ban swih tikamna, kan baha saurka daukan ba upla nani kupia lâka apia kan. Bahamna witin nani ai kupia lukanka wina, prisant bara sakripais nani brih balan.

²⁶ Bara Israel luhpia nani, saura daukan ba, ban saurka swih tikamna, witin nani sut daukan ba ai kupia lâka ni apia kan kaka.

²⁷ “Saura daukan uplika kum, ai kupia brinka wina apia kan kaka, baha uplika ba witin pali ai dukiara guts mairin mani kumi bri ba aiska angki daukbia, ai saurka daukan ba mana.

²⁸ Prîs ba, witin saura daukan ba swih tikaia pura sunra warkka ba daukbia, baha uplika saura daukan ba ai kupia ra luki daukras kan ba dukiara, bara yang baha saurka ba ban swih tikamna.

²⁹ Baha lâka ba Israel luhpia nani sut ba aitani kulki kabia, bara kiamka sât wala nani man nani tilamra iwi ba sin lâka ba kulki kabia, saurka daukan ba ai kupia wina daukras kan bamna.

³⁰ “Ban sakuna, upla kum pain ai dara wali saura daukan sa kaka, Israel luhpia nani sapa, kiamka sât wala nani sapa, baha yang kupi sauhkisa. Bamna baha uplika ba upliki nani tila wina sakan kabia,

³¹ kan yang bîli ba bahki kulkan sa, lâ mangkri ba sin kulkras; bamna diara sut wina sakan kabia bara ai saurka karbanka ba yarka yakan twilkbia.”

Ris yua lâka kulkras mita pruan

³² Israel luhpia nani upla iwras tasbaya ra tauki kan ba piua ra, kaikan waitna kum ris yua ra pauta wahbi tauki kan.

³³ Waitnika ba, upla nani wih alki Moses bara Eran wal ra brih wan, upla wala nani sut ba kaiki kan.

³⁴ Bara witin nani waitnika ba aihwaki kaiki kan, dîa daukaia sapa kau tânka briras kan bamna.

³⁵ Bara Dawan mita Moses ra win: “Baha waitnika ba pruaia pâtka ra lakan kaia sa, Israel luhpia nani sut mita waitnika ba, ai tila wina latara saki bakahnu walpa ni sabi ikaia sa.”

³⁶ Bamna Israel luhpia nani sut, baha waitnika ba ai tila wina latara saki walpa ni saban, pruan ba kat, Dawan bui Moses ra win ba kat daukan.

Prâk un ra pîska praki sipaia lâka ba

³⁷ Dawan ba Moses ra aisi, naku win:

³⁸ “Naha sturka na Israel luhpia nani ra wis: Man nani bara kiamkam nani sut naha daukaia, prâmka un ra kwala blu pîs lupia nani wilkma.

³⁹ Bara baku man nani prâmka mahta ra pîska praki sipi banhwisma ba ra kupiam krauki kama, baha lâka nani sut maikri ba dukiara, bara man nani baha lâka nani ba kat sin dauki kama. Bara baku mika man nani kupiam brinka ba mita mai raski mai brih wabia apia, kan man nani ba yang maipara kasak kaia katma lâka ba swiram sa.

⁴⁰ Kwala blu pîska lupia nani kaiki ba ra kupiam krauki kama, bara lâika ba sin dauki kama; baku mika man nani lika yang maipara sunu kama, yang sika Gâdkam.

⁴¹ Yang sika man nani Dawan Gâdkam, Idsip tasbaya wina mai sakri Dawankam kaia dukiara. Yang sika man nani Dawan Gâdkam.”