Kulki Kaikanka 14 - DAWAN BÎLA AISKA

Israel luhpia nani Dawan mapara buan

¹ Bamna Israel luhpia nani ba sut mahka wini ini banhwan ai bîla baikra karna wal, bara baku tihmia aiska ini banhwan.

² Witin nani sut Moses bara Eran wal mapara brukwi saura aisi banhwan. Witin nani aisi kata: “¡Yawan Idsip tasbaya ra pruan kaka kanra yamni kaia kan, apia kaka nâra upla iwras tasbaya ra yawan pruaia!

³ ¿Dîa muni Dawan naha tasbaya ra wan brih balan? ¿Yawan aiklabi prubia bara wan maya nani, wan luhpia nani sut sin silak ra kauhaia? ¡Kau yamni sa, yang nani kli Idsip ra tawi waia!”

⁴ Bara kumi bani pana pana tawi aisi banhwi kan: “¡Kaisa, yawan wan tâ uplika wala kum briaia bara Idsip ra kli tawi wap!”

⁵ Bamna Moses bara Eran wal, Israel luhpia nani sut kaiki kan tasba ra kauhi ai lula kriki banhwan.

⁶ Bara Jasua, Nun luhpia ba, Caleb Jefuné luhpia ba wal, naha nani sika tasba tânka sâbi kaiki banhwan ba, witin nani sari tukinka mariki ai prâka nani kalki banhwan.

⁷ Bara Israel luhpia nani daknika aiska ra aisi, win: —Baha tasbaya bâk lui kaiki banhwi ba lika, tasba yamni pali sa.

⁸ Yawan wan dukiara Dawan yamni lukbia kaka, witin mita baha tasbaya ra wan brih wabia, wan mihta ra sin mangkbia. Baha tasbaya ra tialka laya nasma wal ba lî laiwi baku sa.

⁹ Sakuna man nani lika Dawan mapara bûi banhpara, baha tasbaya uplika nani ra sin sibrin lukpara, kan baha uplika ba yawan mapara brit baku pibia, witin nani ra hilp yabaia uplika âpu sa bamna, sakuna yawan lika Dawan wan tâ baikisa. ¡Man nani si bripara!

¹⁰ Baku aisin, ban sakuna upla nani sut mita witin nani ra walpa ni sabaia buan. Bara Dawan prana ba Israel luhpia nani ra param takan tintka watla ra, Israel luhpia nani sut kaiki kan,

¹¹ bara Dawan mita Moses ra win: —¿Ahkia kat naha uplika nani ban bahki ai kulki kabia ki? ¿Ahkia kat ban kasak ai lukras kabia ki, baha diara aihkakira nani witin nani tila kat daukatna ba?

¹² Siknis baku yang blikamna, insauhki prui âpu takaia daukamna, baha tasbaya witin nani briaia sip apia daukamna; bara yang bui man kiamkam wina upla kau ailal, kau karna kaia daukamna.

¹³ Sakuna Moses pana Dawan ra aisin: —Man bui karnikam ni naha uplika nani na Idsip wina sakram. Bara nanara man daukaia wisma na Idsip uplika nani walbia ba ra,

¹⁴ Kenan uplika nani ra sin aisisma na wibia. Man Dawan naha uplika nani lilapas ra katma, witin nani mai kaiki kan man param taki katma ba, âu, Dawan, kasbrika bukram witin nani purara kata, bara kakna ra witin nani tâura impaki katma kasbrika playa kumi ni, bara tihmia ra lika pauta klauhan playa kumi ni.

¹⁵ Bamna aima kumi ra baku yarka naha uplika nani prui tiwbia kaka, nisan nani sut ba man tânkam aisi wibia:

¹⁶ ‘Dawan ba baha uplika nani ra tasba kum yaia win ba, sip apia takan bahara brih waia, bara upla iwras tasbaya ra sut iki tikan.’

¹⁷ Bahamna Dawan, nanara man karnikam tara ba mariks, man aisi katma ba baku.

¹⁸ Pat pali kupiam sauhkpara bara kupiam takaski bris; kupiam pihni lâka ba kau tara sa, watawika lâka mapara buan lâka sin pâtkas ra swiras sma sakuna, man uplikam nani saura dauki ba ban klala yabisma, aisika bara yaptika nani watawika ba, luhpia nani ra, mulika nani ra, snawika kat.

¹⁹ Bamna man kupiam pihni lâka pali ba mita naha uplika nani watawanka ba ban swih tikma. Man naha uplika nani pâtka ba kupiam alki takaski swih tikatma ba baku, Idsip ba wina ban naha kat.

Dawan bui Israel luhpia nani ra klala yabisa

²⁰ Bamna Dawan pana win: —Yang bui witin nani pâtka ba ban swih tikri, man aisaram ba kat.

²¹ Ban sakuna, kasak pali sa, yang raya sna ba mita praina ba tasba aiska ra banhwan kabia.

²² Baha nani sut Idsip ra praina kaikan ba, naha upla iwras tasbaya ra sin sain nani daukri kaikan. Pat aima ailal traiki kaikan bara bîli ba sip wali banhras sa,

²³ aisika nani ra tasba yaia wîri ba witin nani kumi sin kaikbia apia; bahki ai kulki uplika nani ba kumi sin baha kaikbia apia.

²⁴ Sakuna Caleb baman bîli wali dadaukra spirit sât wala brisa, bamna witin baman swirka baha tasbaya ra dimbia, baha tasbaya wih kaiki balan ba, ai kiamka nani ba bahara iwbia.

²⁵ (Bara nanara Amalec uplika nani, Kenan uplika nani ba il bîla langnika ra iwi banhwisa.) Bahamna man nani yauhka kli upla iwras tasbaya bâk lui Kabu Pauni tani ra was.

²⁶ Bamna Dawan mita Moses bara Eran ra aisi, win:

²⁷ —¿Ahkia kat yang naha Israel uplika watawikira nani maipara brukwi aisi ba mapara, kupi alki takaski wali kamna ki? Witin nani maipara saura aisi ba aitani pat walri sa.

²⁸ Bamna man wih wis, yang mai wisna na: ‘Yang, Dawan swer taki mai wisna, baku sika daukamna man nani wal.

²⁹ Baha nani sut pat mani yawanaiska wina ai purara bri kan, pat kulki nina nani ulbi swin ba, maipara brukwi aisin ba sut, naha upla iwras tasbaya ra witin nani ba prubia.

³⁰ Kasak pali man nani baha tasbaya ra dimma apia, man nani dukiamra mihti buki swer taki aisari kan ba. Caleb, Jefuné luhpia ba, Jasua Nun luhpia ba wal baman lika bâra dimbia.

³¹ Sakuna man nani luhpiam nani ba, baha nani waihla ba mihta ra kauhbia aisi banhwatma ba, yang bui witin nani ba yarka baha tasbaya ra dimbia. Bara witin nani baha tasbaya ra liliaka ba bribia, man nani mita kulkras sma ba.

³² Sakuna man nani lika, wînam tara nani ba upla iwras tasbaya ra lulki sin kabia.

³³ Luhpiam nani ba naha upla iwras tasbaya ra 40 mani sepad nani baku tauki kabia. Baku man nani lukraskam lâka brisma ba mana witin nani aibapbia, man nani sut naha upla iwras tasbaya ra pruma ba kat.

³⁴ Man nani yu yawanaiska wâl baha kuntrika tânka ba yukuwi kaiki kapram; baha baku sin mani yawanaiska wâl pâtkam wirhika ba twilki tauki kama. Yu kumi ba, mampara mani kum takbia, bara yang klailka ba bri banhma.’

³⁵ Yang, Dawan, kasak aisisna: Yang naku daukamna naha uplika nani asla taki maipara bûi banhwi ba mapara. Naha upla iwras tasbaya ra ai rayaka ba tiwbia; nahara prui banhbia.

Mapara saura aisin nani ba pruan

³⁶ Tasba ba wih kaikan waitnika nani Moses mita blikan kan ba, witin nani kli tawi balan ba ra upla nani ra kupia tuski banhwan, Moses mapara aisaia, tasbaya ba dukiara sin saura aisaia.

³⁷ Baha waitnika nani baha tasbaya tânka ba saura aisin nani ba, Dawan mita sut ikan.

³⁸ Jasua Caleb wal baman pruras raya kan.

Israel Hormá ra aiklaban bara pura luan

³⁹ Dawan dîa Moses ra win ba, witin bui Israel luhpia nani ra maisa pakan, bara witin nani sut sari pali taki banhwan.

⁴⁰ Yu wala titan pali bûi banhwan, bara witin nani il bahna pali ba kat uli wih naku aisi banhwan: —¡Yawan pat nâra balan sa! Kaisa, Dawan wan win pliska ra yawan mahka wap, kasak pali aisisa yawan saura daukan sa.

⁴¹ Sakuna Moses mita win: —¿Dîa muni Dawan dîa mai win ba bîla lulki banhwisma? ¡Baha lukankam ba lika bahki ra tawbia!

⁴² Bamna kainamra kau wapara, kan Dawan ba man nani wal apia sa. Waihlam nani bui puram lubia.

⁴³ Bahara Amalec uplika nani bara Kenan uplika nani ba sin, man nani wal aiklabaia kainamra bîlam kaikisa bara mai iki âpu mai daukbia. Man nani mita Dawan ra lulkram piua ba kat auma, witin lika man nani wal apia sa.

⁴⁴ Ban sakuna, witin nani walras mahka impakan il bahna pali ba kat uli waia. Sakuna Dawan lâka watla, tintka watla ba brih ulras kan, Moses sin ai watla wina taki, il bahna ra uli waras kan.

⁴⁵ Bamna baha tasbaya ra iwi kan nani ba bal takan, Amalec uplika nani bara Kenan uplika nani sin. Bara Israel luhpia nani ra nina blikan ban Hormá kat, iki âpu daukan.