Kulki Kaikanka 13 - DAWAN BÎLA AISKA

Kenan tawanka tânka biki kaikaia blikisa

¹ Dawan ba Moses ra aisi, naku win:

² “Man waitna nani blîks Kenan tasbaya ba tânka yukuwi laki kaikaia, baha tasbaya yang mita Israel luhpia nani ra yabaisna ba. Israel kiamka kumi bani ba wina kum blîks, witin ba karnika bri waitnika kaia sa.”

³ Bamna Dawan win ba baku Moses daukan, Parán upla iwras tasbaya ba wina baha waitna nani sut ba lika, Israel luhpia nani wihtka nani kata,

⁴ bara nina nani ba naha sa: Ruben kiamka wina Samúa, Zacur luhpia ba;

⁵ Simian kiamka wina Safat, Horí luhpia ba;

⁶ Juda kiamka wina Caleb, Jefuné luhpia ba;

⁷ Isacar kiamka wina Igal, Josep luhpia ba;

⁸ Efraín kiamka wina Oseas, Nun luhpia ba;

⁹ Benjamín kiamka wina Paltí, Rafú luhpia ba;

¹⁰ Zabulón kiamka wina Gadiel, Sodí luhpia ba;

¹¹ Josep kiamka wina (baha sika Manasés) Gadí, Susí luhpia ba;

¹² Dan kiamka wina Amiel, Guemalí luhpia ba;

¹³ Aser kiamka wina Setur, Micael luhpia ba;

¹⁴ Neftalí kiamka wina Nahbí, Vapsí luhpia ba;

¹⁵ Gad kiamka wina Gueuel, Maquí luhpia ba.

¹⁶ Naha waitnika nani na sika tasba ba tânka yukuwi kaikaia Moses mita blikan ba. Bara Moses mita Oseas, Nun luhpia ba, nina Jasua mâkan.

¹⁷ Bamna Moses baha nani ba Kenan tasbaya ba tânka kaikaia blikan bara naku win: —Naha wina Négueb bâk lui was, bara baha wina il nani tilara uli was.

¹⁸ Bara baha wina tasba ba laki kaiks, bahara iwi uplika nani ba sin, uplika nani ba swapni sa sapa, apia kaka karna sa sapa, wiria, apia kaka ailal sa sapa.

¹⁹ Utla nani mâkanka ba nahki sa, karna sa sapa, tint watla sa sapa, tasba pain ra iwisa, apia kaka tasba saura ra sapa laki kaiks,

²⁰ tasbaya ba ra diara pain pâwisa sapa, tasba mahsis sa sapa sin, tasbaya ba ra dus nani bâra sapa, dus nani âpu sapa. Man nani si bripara; tasbaya dusa mâ nani wirâ brih bal. Kan baha piua ba lika wain disang mâ dâkaia piua kata.

²¹ Bamna waitna nani ba wan, waupasa tani upla iwras tasbaya bâk. Sin langnika ba wina Rehob kat, yahbra tani ra Hamat ra dimaia lamara kat.

²² Négueb bâk lui wan ba wina, Hebrón kat aidrubi balan, bahara Anac kiamka nani bâra kan: Ahimán Sesai, Talmai. Hebrón tawanka ba pas paskan kan, 7 mani Soan Idsip ra paskan ba kainara.

²³ Baha wina witin nani Escol tingnika kat aidrubi wan, baha wina wain kiwka kum klaki brin mâ nani ba kira, bara dus kum ra pami mangki wâlsut twilki aidrubi balan, bara drap nani, kwah damni nani sin wahbi brih wan.

²⁴ Baha tingnika nina Escol mâkan, baha tânka sika mâ ailal awa ra alkan ba, kan baha wina Israel luhpia nani dus mâ ailal awa ra kan klakan bamna.

²⁵ Yu yawanaiska wâl ningkara, witin nani baha sut kaiki si kli tawi balan

²⁶ Cadés kat, Parán upla iwras ba tasbaya ra. Moses, Eran bara Israel luhpia nani sut bâra kan. Witin nani ra bara dakni aiska ra sturi ba sut maisa pakan, bara tasbaya dusa mâ nani ba sin marikan.

²⁷ Bara witin nani bui Moses ra win: —Ai blikram tialka laya nasma wal lî laiwi baku ba tasbaya ra, bara naha sika baha dusa mâ nani ba.

²⁸ Ban sakuna, baha paskanka nani ba karna pali sa, baha purkara bahara sin kaiki banhri Anac kiamka upla tara nani bâra sa.

²⁹ Amalec uplika nani Négueb tani ra iwisa, hitita nani, Jebús uplika nani bara amorreo nani ba sin il tani ra iwisa, bara kabu tani ra lika Jordan awala lamara Kenan uplika nani iwisa.

³⁰ Bara Moses wali kan Caleb mita baha nani bîla prakan, bara win: —¡Kaisa, kaisa yawan wap, baha tasbaya dakbi briaia! ¡Yawan sip sa baha nani pura luaia!

³¹ Sakuna baha waitnika nani witin aikuki wan ba mapara aisi banhwan: —¡Apia, apia, yawan baha uplika nani pura luaia sip apia! Kan baha nani ba kau karna sa yawan nani ba wal.

³² Bara witin nani mahka Israel luhpia nani ra win, witin nani baha tasbaya wih kaikan ba, tasba pain apia, saura sa. Naku aisi banhwi kata: —Baha tasbaya yang nani sâbi kaiki banhri ba naku sa: Baha tasbaya yang nani kaiki lui banhri ai tahkia ra ikisa, waitna nani ba yari, upla tara nani bâra sa.

³³ Yang nani sin kaikri upla tara nani, Anac kiamka nani, upla yari, yang nani lika witin nani nakra ra kruhkru luhpia baku katna, witin nani mita baku wan kaiki kan.